AMOSE 6

₁A tatlhego ya bone wee ba ba ikgodisetsang Sione, ba ba ikanyang thaba ya Samaria! Ba e leng ditlhogo tsa moeteledi pele wa ditšhaba, ba ba okameng Baiseraele. ₂Tshelelang kwa Kalene, lo ye go bona; lo tswe teng lo ye kwa Hamathe yo mogolo, lo be lo ye kwa Gathe wa Bafelesita. A ga ke re, ba phala magosi ano! A ga ke re, mafatshe a bone a atlhame bogolo go a lona! ₃Lona ba lo reng lo kgakala le letsatsi le le bosula, mme lo atametsa tshiamololo gore e nnele ruri; ₄ba lo rapamang mo malaong a dinaka tsa ditlou, lo itshidila mo “disofeng” tse di boleta, lo ja dikwana tsa letsomane le dinamane tse di tswang mo lesakeng; ₅ba lo opelang dipina tsa boeleele le medumo ya harepa; lo itlhoma lo itiretse diletso jaaka Dafita; ₆ba lo nwang weine ka megotšwana ya ditshupelo; lo tlôla lookwane lo lo tlhaotsweng, mme lo sa utlwele tshenyego ya Josefa botlhoko; ₇ke ka moo lo tla isiwang mo botshwarong jaanong, lo etelela batshwarwi pele; mme tlhapelo ya ba ba rapameng mo malaong e tla khutla.

₈Morena Modimo o ikanne ka bophelo jwa gagwe, go bua Morena, Modimo wa masomosomo, a re: “Ke tenwa ke boikgodiso jwa Jakobe, ke ila matlo a borena a bone; ke ka moo ke latlhang motse le tsotlhe tse di mo go ona.”

₉Mme le fa go ka sala banna ba le some mo ntlong e le nngwe, ba tla swa. ₁₀Jaanong fa wa ga gabo moswi yo o mo fisang a mo tsaya go tlosa setoto mo ntlong, a raya yo o kwa tengteng ga ntlo a re: “A o sa ntse o na le yo mongwe?”

Mme yoo a araba a re: “Ba feleletse,” foo mofitlhi o tla re: “Didimala o re tu! Leina la Morena le se ka la umakiwa.”

₁₁Gonne bonang, Morena o tla laola gore ntlo e kgolo e itewe, e phatlakanngwe, le ntlo e nnyane e itewe, e thubaganngwe. ₁₂A dipitse di ka siana mo mafikeng? Gongwe a lewatle le ka lengwa ka dipholo? Gonne lo fetotse katlholo mogau, le leungo la tshiamo lo le fetotse longana.

₁₃Lona ba lo thabelang motse wa “Se-e-seng-sepe”, lo re: “A ga re a thopa wa Karenaime ka thata ya rona?”

₁₄Gonne bonang, lona Baiseraele, go bua Morena, Modimo wa masomosomo, a re: “Ke tla lo tsosetsa setšhaba se se tla lo pitlaganyang go simolola ntlheng ya Hamathe le go fitlha kwa molapong wa sekaka.”