AMOSE 2

₁Morena o bua jaana a re: “Ga nkitla ke thibela petso ka ntlha ya maleo a le mane a Moabe, le fa e le a mararo fela, ka ba fisitse marapo a kgosi ya Etomo, ya nna molora. ₂Mme ke tla latlhela molelo kwa Moabe gore o je matlo a borena a Keriothe; mme Moabe o tla swa ka modumo wa ntwa, fa go opiwa mokgosi, fa go lediwa lonaka. ₃Ke tla nyeletsa mmusi mo gare ga bone, ke bolaya dikgosana tsotlhe tsa bone nae.” Morena o buile jalo.

₄Morena o bua jaana a re: “Ga nkitla ke thibela petso ka ntlha ya maleo a le mane a Juta, le fa e le a mararo fela, ka ba latlhile molao wa Morena, ba se ka ba tshegetsa ditaolo tsa gagwe, mme medimo ya maaka ya bone e ba timeditse e borraabo ba neng ba e sala morago. ₅Mme ke tla latlhela molelo kwa Juta gore o je matlo a borena a Jerusalema.”

₆Morena o bua jaana a re: “Ga nkitla ke thibela petso ka ntlha ya maleo a le mane a Iseraele, le fa e le a mararo fela. Gonne ba rekisitse mosiami, go bona madi, le motlhoki go bona ditlhako tse pedi. ₇Le gona ba batla go gatelela ba ba kwa tlase mo leroleng. Tsela ya ba ba bogisegang ba a e sokamisa. Motho le rraagwe ba tlhakanela morweetsana gore ba itshepolole leina le le boitshepo la me. ₈Ba kanama mo diaparong tse di gapetsweng molato fa thoko ga aletare nngwe le nngwe, ba nwa weine e batho ba lefileng molato ka yona, ba e nwela mo ntlong ya modimo wa bone.

₉“Mme nna ke nyeleditse Baamori ba ba godileng jaaka mesetere, ba ba thata jaaka metswere, fa pele ga bone; ka senya maungo a bone kwa godimo le medi ya bone kwa tlase. ₁₀Gape ke nna ke lo ntshitseng kwa lefatsheng la Egepeto, ka lo etelela pele mo sekakeng dinyaga di le 40 gore lo ye go rua lefatshe la Baamori. ₁₁Ka ba ka tsosa baporofeti mo go bomorwaa-lona, le baikiledi mo makaung a lona. A ga go a nna jalo, lona Baiseraele?” go botsa Morena. ₁₂“Mme lona lo nositse baikiledi weine, lwa laola baporofeti lwa re: ‘Lo se ka lwa bolela Lefoko la Modimo.’ ₁₃Bonang, ke tla theekedisa lefatshe fa tlase ga lona, jaaka go tle go theekele koloi e e tletseng dingata tsa mabele. ₁₄Mme yo o lebelo o tla tlhoka botshabelo; yo o thata ga a nke a itse go dirisa thata ya gagwe; seganka ga se nke se pholosa bophelo jwa sone. ₁₅Yo o hulang ka bora ga a nke a ema; yo o maoto a lobelo ga a kitla a falola; mopalami wa pitse ga a kitla a pholosa bophelo jwa gagwe. ₁₆Le yo o pelokgale go phala bagale botlhe o tla tshaba a sa ikatega ka letsatsi leo,” go bua Morena.