DITIRO 26

₁Jaanong Ageripa a raya Paulo a re: “O letleletswe go ipuelela.” Paulo a tsholetsa letsogo, a ikarabela a re:

₂“Ke ikaya ke le sego, kgosi Ageripa, ka ke tshwanetse go ikarabela fa pele ga gago kajeno ka ga dilo tsotlhe tse ke latofadiwang ke Bajuta ka tsona; ₃bogolo ka o na le kitso ka ga mekgwa le dikgang tsotlhe tse di mo Bajuteng; ke ka moo ke go rapelang gore o ntheetse ka bopelotelele.

₄“Jaanong fa e le tsa bophelo jwa me go tloga bošweng jwa me jo ke bo phedileng go tswa tshimologong mo morafeng wa ga etsho le mo Jerusalema, Bajuta botlhe ba a di itse, ₅ka ba sa le ba nkitse go tloga tshimologong; fa ba rata, ba ka bo ba supa gore ke phedile ke le Mofarisai mo lesomong le le nang le molao o o gagametseng thata la tumelo ya rona. ₆Mme jaanong ke eme fano go sekisiwa ka ntlha ya go solofela se Modimo o se solofeditseng borraetsho; ₇se ditso tsa rona tse di 12 di solofelang go se bona ka go direla Modimo ka tlhoafalo bosigo le motshegare. Mme kgosi, ke latofadiwa ke Bajuta ka ntlha ya tsholofelo eo. ₈Ke ka ntlhaang, fa mo go lona go kaiwa go twe, ga go dumelesege gore Modimo o tsosa baswi?

₉“Fa e le nna, ke ne ke itheile ka re, ke tshwanetse go dira dilo tse dintsi tsa go lwantsha leina la ga Jesu wa Nasaretha. ₁₀Ke bile ke dirile jalo mo Jerusalema, ka tswalela baitshepi ba bantsi mo matlong a kgolegelo, ke sena go amogela thata mo baperesiting ba bagolo; e ne ya re ba bolawa, ke dumele. ₁₁Ke ne ke ba betsa gantsi mo disenagogeng tsotlhe, ke ba pateletsa go kgala, mme ya re ka ke ba gakaletse mo go fetisang, ka ba ka ba bogisa le kwa metseng e e ka kwa ntle.

₁₂“E rile ke ya kwa Damaseko go dira jalo ka thata le tetlelelo ya baperesiti ba bagolo, ₁₃foo, kgosi, motshegare, ke le mo tseleng, ka bona lesedi le le tswang legodimong, le gaisa kgalalelo ya letsatsi, le phatsima tikologong ya me le ya ba ba tsamayang le nna. ₁₄Ya re re wetse rotlhe fa fatshe, ka utlwa lentswe le nthaya ka puo ya Sehebere le re: ‘Saule, Saule, o mpogisetsang? Go thata mo go wena go raga ditlhabi tsa lešwane.’ ₁₅Nna ka fetola ka re: ‘Morena, o mang?’ Morena a re: ‘Ke nna Jesu yo ò mpogisang. ₁₆Jaanong tsoga o eme ka dinao; gonne maikaelelo a ke go bonaletseng ka ona ke gore ke go dire modiredi le mosupi wa dilo tse o mponyeng ka tsona, le wa tse ke tla bonalang mo go wena ka tsona. ₁₇Ke tla go golola mo Bajuteng le mo baheitaneng ba ke go romang kwa go bone, ₁₈go ba budulola matlho gore ba sokologe, ba tswe mo lefifing, ba tsene leseding, ba tswe mo thateng ya ga Satane, ba ineele Modimo, gore ba amogele boitshwarelo jwa dibe le boswa mmogo le ba ba itshepisitsweng ka go dumela mo go nna.’

₁₉“Kgosi Ageripa, ke ka ntlha ya moo ke sa ganang go utlwa pono eo ya legodimo; ₂₀mme ke ne ke rerela ba ba mo Damaseko pele, ke bile ke bolelela le ba ba kwa Jerusalema le ba naga yotlhe ya Jutea le Baditšhaba gore ba fetoge pelo, ba sokologele Modimong; ba dire ditiro tse di tshwanetseng boikwatlhao. ₂₁Ke ka ntlha ya tseo, fa Bajuta ba ntshwere mo Tempeleng, ba leka go mpolaya. ₂₂Jaanong ka ke bonye thuso mo Modimong, ke eme go fitlhela letsatsing le, ke supetsa bannye le bagolo, ke sa bue sepe, fa e se tse baporofeti le Moše ba rileng, di tla dirafala, ₂₃ba re, Keresete o tshwanetse go boga le go nna wa ntlha mo tsogong ya baswi gore a tle a rerele Baiseraele le Baditšhaba lesedi.”

₂₄Ya re a ntse a ikarabela jalo, Feseto a bua ka lentswe le legolo a re: “Paulo, o a tsenwa! Thutego e kgolo e go dira setsenwa.”

₂₅Paulo a fetola a re: “Feseto, motlotlegi yo mogolo, ga ke tsenwe, ke bua mafoko a boammaaruri le a tlhaloganyo. ₂₆Kana kgosi e itse dilo tseo; e bile ke bua ka bopelokgale fa pele ga yona; gonne ga ke dumele gore sengwe sa dilo tseo se e fitlhegetse; gonne ga di a ka tsa direlwa mo sephiring. ₂₇Kgosi Ageripa, a o dumela baporofeti? Ke itse gore o a ba dumela.”

₂₈Mme Ageripa a raya Paulo a re: “O gaufi le go nkgona go ntira Mokeresete.”

₂₉Paulo a mo fetola a re: “Le fa go le gaufi gongwe kgakala, ke rapela Modimo gore e se nne wena fela, mme le botlhe ba ba nkutlwang gompieno ba tshwane le nna, ke sa ree dikgole tse.”

₃₀Jaanong kgosi ya nanoga le molaodi yo mogolo le Berenike le ba ba ntseng nabo; ₃₁ba emela fa thoko, ba bua mmogo ba re: “Motho yo ga a a dira sepe se se tshwanetseng loso, le e seng dikgolego.” ₃₂Ageripa a raya Feseto a re: “Motho yo, o ka bo a gololwa, fa a ka bo a sa ipiletsa Kaisara.”