2 JOHANE 1

₁Nna yo mogolo, ke kwalela mohumagadi yo o tlhaotsweng, le bana ba gagwe ba ke ba ratang ruri, mme e seng nna fela, ba bile ba ratwa ke botlhe ba ba itseng boammaaruri. ₂Ke ka ntlha ya jona boammaaruri jo bo ntseng mo go rona, jo bo tla nnang le rona ka bosakhutleng.

₃Ka re: Bopelotlhomogi bo tla nna le rona le boutlwelo-botlhoko le kagiso tse di tswang mo go Modimo Rara le mo go Jesu Keresete, Morwa Rara, ka boammaaruri le ka lorato.

₄Ke itumetse thata, ka ke fitlhetse bangwe ba bana ba gago ba tsamaya mo boammaaruring, jaaka re amogetse taolo mo go Rara. ₅Mme jaanong ke a go rapela, mohumagadi, e seng jaaka e kete ke go kwalela taolo e ntšhwa, mme ke e re sa leng re e tshola go tswa tshimologong gore re ratane. ₆Mme lorato ke lwa gore re tsamae ka fa ditaolong tsa ona; taolo ke ya gore lo sepele mo go lone jaaka lo sa le lo e utlwa go tloga tshimologong; ₇gonne batsietsi ba bantsi ba bololetse mo lefatsheng, ba ba sa ipoleleng Jesu yo o tsileng mo nameng. Yo o ntseng jalo ke ene motsietsi le moganetsa-Keresete. ₈Itlhokomeleng gore lo se ka lwa latlhegelwa ke dilo tse re di dirileng, lo tle lo amogele tuelo e e tletseng.

₉Mongwe le mongwe yo o fapogang, a sa nne mo thutong ya ga Keresete, ga a na Modimo; yo o nnang mo thutong eo ke ene yo o nang le Rara le Morwa. ₁₀Fa mongwe a ka tla go lona, a sa rute thuto e, lo se ka lwa mo tsholela mo ntlong, le gona lo se ka lwa mo dumedisa. ₁₁Gonne yo o mo dumedisang o tlhakanela ditiro tse di bosula tsa gagwe nae.

₁₂Le fa ke na le dilo tse dintsi go di lo kwalela, ke ne ke sa rate go dira jalo ka pampiri le enke; gonne ke solofela gore ke tla tla koo go lona, mme re tla buisanya ka molomo gore boitumelo jwa rona e nne jo bo tletseng.

₁₃Bana ba ga morwadia-mmaago yo o tlhaotsweng ba a go dumedisa.