1 TIMOTHEO 5

₁O se ka wa kgalemela monnamogolo, mme o mo kaele jaaka e kete ke rraago, ₂le basadi-bagolo jaaka e kete ke bommaago, le ba bašwa jaaka e kete ke bokgaitsadio, ka boitsheko jotlhe.

₃Batlholagadi ba e leng batlholagadi tota o ba tlotle. ₄Mme fa motlholagadi a na le bana gongwe bana ba bana, a bao ba ithute go supa bodumedi pele mo go ba ga bone le go leboga batsadi ba bone; gonne seo ke se se kgatlhang Modimo. ₅Mme ene yo e leng motlholagadi tota, a tlogetswe a le esi, o solofetse mo Modimong, o tswelela pele ka mekokotlelo le ka merapelo bosigo le motshegare; ₆mme yo o phelelang dikgatlhego tsa gagwe ene o sule, le fa a ntse a phela. ₇Dilo tseo le tsona o di ba laele gore ba nne ba ba se nang molato. ₈Fa motho a sa tlamele ba ga gabo, bogolo ba e leng ba ntlo ya gagwe, o itatotse tumelo, o bosula bogolo go yo o sa dumeleng.

₉A mo palong go kwalwe motlholagadi fela wa dinyaga tse di sa tlhaeleng 60, yo o neng e le mosadi wa monna a le mongwe fela, ₁₀a na le tshupo ya ditiro tse di molemo tsa gore o godisitse bana, a tshola baeng, a tlhapisa baitshepi dinao, a thusa ba ba pitlagantsweng, a tlhokomela tiro nngwe le nngwe e e molemo.

₁₁Batlholagadi ba e sa ntseng e le ba bašwa, o ba gane; gonne e a re fa ba fenngwa ke dikeletso mo go tlotlololang Keresete, ba rate go nyalwa, ₁₂ba welwe ke katlholo ya gore ba dirolotse maikano a bone a pele. ₁₃Mme le gona ba ineela botshwakga, ba tlwaela go tlhôtlhôma le malapa; mme ga se go tshwakgafala fela, e bile ke babalabadi le batshwenyi ba ba buang tse di sa tshwanelang. ₁₄Ka ntlha ya moo ke batla gore batlholagadi ba e sa ntseng e le batho ba bašwa ba nyalwe, ba tshole bana, ba dise lelapa, gore ba se nee moganetsi lebaka la go kgoba. ₁₅Gonne bangwe ba setse ba fapogile, ba latela Satane. ₁₆Fa modumedi a na le batlholagadi, a a ba tlamele gore phuthego e se ka ya imediwa, yona e tlamele ba e leng batlholagadi tota.

₁₇Bagolo ba phuthego ba ba tshwereng tiro sentle a ba kaiwe ba tshwanetswe ke tlotlo e e menaganyeng, bogolo bone ba ba dirang ka lefoko le ka thuto; ₁₈gonne Lokwalo lo a re: “Kgomo e e phothang o se ka wa e bofa molomo;” gape lo a re: “Modiri o tshwanetswe ke tuelo ya gagwe.” ₁₉Fa mogolo wa phuthego a latofadiwa, se amogele tatofatso eo, fa e se ka basupi ba babedi gongwe ba bararo. ₂₀Ba ba leofang o ba kgalemele fa pele ga botlhe gore ba bangwe le bone ba boife.

₂₁Ke go laya fa pele ga Modimo le Keresete Jesu le baengele ba ba tlhaotsweng gore o tlhokomele dilo tseo; o se ka wa atlhola o ise o tlhotlhomise, o se dire sepe ka go gobelelela motho. ₂₂O se ka wa baya motho ope diatla ka potlako, le gona o se ka wa itsenya mo maleong a batho ba bangwe. Wena o nne o itshekile.

₂₃O se tlhole o nwa metsi fela, mme o nwe weinenyana ka ntlha ya mala a gago, le ka o fokola gantsi.

₂₄Maleo a batho bangwe a itsege gotlhe, a ba etelela pele kwa katlholong, mme a ba bangwe a a ba latela. ₂₅Go ntse jalo le ditiro tse di molemo, di itsege gotlhe; mme tse di sa itsegeng ga di ka ke tsa fitlhegela ruri.