1 BATHESALONIKA 5

₁Jaanong, bakaulengwe, ga go batlege gore lo kwalelwe ka ga dipaka le dinako; ₂gonne lona ka losi lo itse sentle gore letsatsi la Morena le tla tla fela jaaka legodu bosigo. ₃Gonne e tla re go twe: “Go kagiso le polokego!” ke gona tshenyego e tla ba welang ka tshoganyetso, jaaka ditlhabi di wela mosadi yo moimana, mme ga ba kitla ba falola. ₄Mme lona, bakaulengwe, ga lo mo lefifing, mo letsatsi leo le ka lo welang jaaka legodu. ₅Nnyaya, lona lotlhe lo bana ba lesedi le bana ba letsatsi; ga re ba bosigo le e seng ba lefifi. ₆Ka moo he a re se robaleng jaaka ba bangwe, mme a re nneng re thantse, re nne tekano; ₇gonne ba ba robetseng ba robetse bosigo, le ba ba tagilweng ba tagilwe bosigo. ₈Mme rona ba re leng ba letsatsi, a re nneng tekano, re apere sefemela-sehuba sa tumelo le sa lorato, le tsholofelo ya phologo go nna kuane ya phemelo. ₉Gonne Modimo ga o a re beela bogale, mme o re beetse go bona phologo ka Morena wa rona Jesu Keresete ₁₀yo o re swetseng gore le fa re tsogile gongwe re robetse, re phele mmogo nae. ₁₁Ka moo gomotsanyang lo agane jaaka lo ntse lo dira.

₁₂Mme, bakaulengwe, re lo rapela gore lo tlotle bone ba ba itapisang ka lona, ba ba lo okameng mo Moreneng, ba ba lo layang, ₁₃lo ba kaye segolo bogolo ka lorato ka ntlha ya tiro ya bone. Agisanyang nabo.

₁₄Bakaulengwe, re lo kaela re re: Kgalemelang ba ba bofafalele, nametsang ba ba nyemang moko, tlhokomelang ba ba bokoa, lo nne pelotelele le botlhe. ₁₅Tlhokomelang gore go se nne ope yo o busetsang yo mongwe bosula ka bosula, mme tlhoafalang ka gale go direlana molemo le go o direla botlhe.

₁₆Itumeleng ka gale. ₁₇Se khutleng go rapela. ₁₈Lebogang mo dilong tsotlhe; gonne moo ke thato ya Modimo mo go Keresete Jesu ka ga lona.

₁₉Se timeng Mowa. ₂₀Se nyatseng dithuto tsa Lefoko la Modimo. ₂₁Tlhotlhomisang tsotlhe, lo boloke tse di siameng. ₂₂Fapogang mofuta mongwe le mongwe wa bosula.

₂₃Mme a Modimo wa kagiso ka osi o lo itshepise gotlhe; a mewa ya lona le maphelo a lona le mebele ya lona di bolokwe, e nne tse di itekanetseng, di se na molato mo go tleng ga Morena wa rona Jesu Keresete. ₂₄Ona o o lo bitsang o a ikanyega, o bile o tla dirafatsa.

₂₅Bakaulengwe, re rapeleleng.

₂₆Dumedisang bakaulengwe botlhe ka katlo e e boitshepo.

₂₇Ke lo tiisetsa ka Morena gore lokwalo loo lo buisediwe bakaulengwe botlhe ba ba boitshepo.

₂₈A bopelotlhomogi jwa Morena wa rona Jesu Keresete bo nne le lona!