1 BATHESALONIKA 3

₁Ka moo e rile re sa tlhole re kgona go itshoka, ra utlwanela go sala mo Athene re le rosi, ₂mme ra roma Timotheo mokaulengwe wa rona, modiredi wa Modimo, modiri-ka-rona mo Efangeleng ya ga Keresete, gore a lo tiise le go lo kgothatsa mo tumelong ya lona ₃gore go se nne ope yo o tshikinngwang ka dipitlagano tseno; gonne lo itse ka losi gore re di beetswe. ₄Gonne e rile re sa ntse re na le lona, ra lo bolelela pele gore re tla pitlaganngwa, fela jaaka go dirafetse, e bile lo a itse. ₅Jaanong ya re ke palelwa ke go tlhola ke itshoka, ka roma motho ka ntlha ya moo gore ke tle ke itse tumelo ya lona, e se re gongwe moraedi a bo a lo raetse, mme tiro ya rona ya nna lefela.

₆Mme jaanong Timotheo o bile a tla, a tswa koo go lona, a re tsholetse mafoko a a itumedisang ka ga tumelo ya lona le lorato lwa lona le a gore lo ntse lo re gopola ka molemo, lo tlhologeletswe go re bona jaaka le rona re tlhologeletswe go bona lona; ₇ka moo bakaulengwe, re gomotsegile ka ga lona ka tumelo ya lona mo tlalelong yotlhe ya rona le mo pitlaganong ya rona; ₈gonne jaanong re a phela, fa lona lo eme ka tlhomamo mo Moreneng. ₉Mme re ka leboga Modimo ka eng ka ntlha ya lona, ra lebogela boitumelo jotlhe jo re lo itumeletseng ka jona fa pele ga Modimo wa rona? ₁₀Re ntse re rapela thata thata bosigo le motshegare gore re bone difatlhego tsa lona le go tlatsa tse di tlhaelang mo tumelong ya lona.

₁₁Mme a Modimo Rraetsho ka esi le Jesu, Morena wa rona, a re siamisetse tsela ya go tla koo go lona. ₁₂A Morena a lo godise, a ba a lo totise loratong lwa go ratana le lwa go rata botlhe jaaka le rona re lo rata, ₁₃gore dipelo tsa lona di tiisiwe, di se nne molato, di nne mo boitshepong fa pele ga Modimo Rraarona, mogang Jesu, Morena wa rona, a tlang gape le baitshepi botlhe ba gagwe.