Xitsonga 1989 (TSO89)
82

Xikwembu i muavanyisi wa vanhu hinkwavo

Pisalema ya Asafa.

821Xikwembu xi tshamile ehubyeni ya le henhla-henhla,

xi avanyisa vanhu xi ri ni swivumbiwa swa le tilweni,

2xi ku: “Loko mi avanyisa timhaka, xana mi ta tshika rini ku ya hi nghohe,

ni ku yimelela lava dyoheke xana?

3Pfunani lava tsaneke ni lava pfumalaka vatswari,

mi lwela tifanelo ta lava titsongahataka ni ta swisiwana.

4Ponisani lava tsaneke ni vapfumari,

mi va vutla emavokweni ya lavo homboloka.

5“Kambe n'wina a mi na vutivi, ni ku twisisa a mi twisisi;

mi gugurhuteka emunyameni,

hikokwalaho masungulo ya misava hinkwayo ma tsekatseka.

6

82:6
Yoh. 10:34
“Ndzi vurile leswaku n'wina mi swikwembu,

ni leswaku hinkwenu mi vana va Loyi a nge henhla-henhla.

7Hambiswiritano mi ta fa kukota vanhu,

vutomi bya n'wina byi ta hela ku fana ni bya hosi yihi na yihi.”

8We Xikwembu, tana u ta avanyisa misava,

hikuva matiko hinkwawo ma le hansi ka wena.