Xitsonga 1989 (TSO89)
80

Xikwembu xi komberiwa ku pfuxa tiko ra Israele

Risimu ra Muyimbelerisi, leri hlaveleriwaka hi switende.Kumbe: hi mayimbelelele ya risimu leri nge “Ra makhon'wa” Switsundzuxo swa Asafa. Pisalema.

801

80:1
Eks. 25:22
We murisi wa Israele, yingisa,

rhiya ndleve wena u fambisaka va ka Yosefa kukota ntlhambi;

wena u tshameke exiluvelweni ehenhla ka tikerubu,

komba ku vonakala ka wena.

2Hlavutela matimba ya wena emahlweni ka va ka Efrayimi ni va ka Benjamini ni va ka Manase,

tana u ta hi ponisa.

3Tlhela u hi pfuxa we Xikwembu,

u hi amukela hi tintswalo, kutani hi ta ponisiwa.

4We HOSI Xikwembu xa matimba hinkwawo,

xana u ta hlundzuka ku fikela rini,

u ala ku yingisa swikhongelo swa hina vanhu va wena xana?

5Mahlomulo i swakudya leswi u hi phamelaka swona,

u hi nwisile mihloti hi xinwelo lexi khapaka.

6Vaakelani va hina va lwetana hi tiko ra hina,

valala va hina va le ku sandzeni.

7Xikwembu xa matimba hinkwawo, tlhela u hi pfuxa,

u hi amukela hi tintswalo, leswaku hi pona.

8U tsuvurile murhi wa vhinya etikweni ra Egipta,

u ya wu byala etikweni leri u hlongoleke vamatiko va suka eka rona.

9U khulerile xivandla u wu byala eka xona,

kutani wu mila timitsu, wu kula wu funengeta tiko hinkwaro.

10Tintshava a ti ri endzhutini wa wona;

a wu namarhela mirhi leyikulu ya mikedari,

11wu phaka marhavi ma fika eLwandle ra Mediteraniya,

man'wana ma fika enambyeni wa Yufrata.

12U tshovele yini rihlampfu ra nsimu leyi ya vhinya ke?

Vahundzi va ndlela hinkwavo va yiva mihandzu ya kona.

13Tinguluve ta nhova ta wu kandziyela,

swiharhi swa le mananga swi dya eka wona.

14We Xikwembu xa matimba hinkwawo, ha kombela, vuya!

Languta u ri etilweni, u vona leswi humelelaka;

sirhelela murhi lowu wa vhinya,

15ximila lexi u xi byaleke hi voko ra wena,Van'wana va ri: u wu lwela hikuva hi wena u wu byaleke

a nga n'wana loyi u nga tiwundlela yena.

16Valala va hina lava tsemeke ni ku hisa murhi lowu,

va tshinye u va herisa hi vukari bya wena,

17kambe u katekisa hosi ya tiko leyi u yi hlawuleke,

leyi u yi tiyiseke hi matimba ya wena,

18kutani hi nga ka hi nga ku fularheli;

tlhela u hi nyika vutomi, kutani hina hi ta gandzela wena ntsena.

19Tlhela u hi pfuxa, we HOSI Xikwembu xa matimba hinkwawo,

u hi amukela hi tintswalo, kutani hi ta ponisiwa.