Xitsonga 1989 (TSO89)
6

U nga tibohi ku hakelela van'wana emilandzu!

61N'wananga, loko u tshuka u tibohile

ku hakelela muakelani milandzu ya yena,

ni loko u hlambanyele munhu un'wana ku n'wi hakelela swikweleti,

2u tiphasile hi ku vulavula ka wena,

marito ya wena ma ku wisele entlhan'wini.

3Hikokwalaho, loko u lava ku tiponisa, endla leswi n'wananga:

Leswi u weleke emavokweni ya munhu loyi,

hatlisa u ya kombela hi matimba eka yena leswaku a ku ntshunxa;

4vurhongo a byi suke,

u nga yi eku etleleni,

5hatlisa u phonyoka, ku fana ni mhala leyi chupukelaka muhloti,Van'wana va ri: leyi chupukaka entlhan'wini

ni nyanyana leyi tsemaka rigoda.

Yana u ya xiya vusokoti, we lolo!

6Wena lolo, yana eka vusokoti,

u xiyaxiya mahanyelo ya byona, u ta tlhariha.

7A byi na hosi,

ni murhangeri kumbe ndhuna byi hava,

8kambe hi ximumu byi hlengeleta swakudya swa byona,

byi tivekela timbuva enkarhini wa ntshovelo.

9We lolo, xana u ta etlela ku fikela rini,

u ta pfuka rini evurhongweni ke?

10

6:10-11
Swiv. 24:33-34
Wena u ri: “Ndza há kú bàà, ndzi etlelanyana switsongo,

ndza ha khondlanyana mavoko, ndzi wisa.”

11Kasi hi loko vusiwana byi nghenile kukota xi-ta-xi-famba,

ni vusweti ku fana ni xigevenga.

Chava munhu wa mavunwa!

12Munhu loyi a rhendzelekaka a ri karhi a hangalasa mavunwa,

a nga pfuni nchumu, ú bihile.

13Ú famba a ri karhi a tshunyeta-tshunyeta,

a tsala-tsala hansi hi swikunwana,

a khwenuta-khwenuta vanhu;

14minkarhi hinkwayo, u le ku lukeni ka mano layo biha,

a pfuxa madzolonga.

15Hikokwalaho, ú ta wela hi khombo a nga ehleketanga,

ú ta jumiwa a wiseriwa ehansi, a nga ha pfuki.

Leswi Xikwembu xi swi vengaka

16Xana leswi HOSI Xikwembu xi swi vengaka i swilo swa 6 xana?

E-e, leswi yilaka emahlweni ka xona i swilo swa 7, swi nga leswi:

17Munhu loyi a tikurisaka,

ni loyi a vulavulaka mavunwa,

ni loyi a halataka ngati mahala,

18ni munhu wa miehleketo yo homboloka,

ni la tsutsumaka-tsutsumaka a endla leswo biha,

19ni mbhoni leyi vulavulaka mavunwa ntsena,

ni munhu la byalaka rivengo exikarhi ka vamakwavo.

Vuoswi bya dlayisa

20N'wananga, hlayisa switsundzuxo swa mina tata wa wena,

ni milawu ya mana wa wena, u nga tshuki u hambana na yona;

21swi hlayise embilwini ya wena swi tshama kona minkarhi hinkwayo,

u swi boha enhan'wini ya wena.

22Loko u ri eku fambeni, swi ta ku komba ndlela,

swi ta ku sirhelela loko u etlele,

loko u pfuka, swi ta vulavula na wena.

23Switsundzuxo i rivoni, milawu i ku vonakala,

marito yo tshinya ni ku laya ma komba ndlela ya ku hanya.

24Hi swona swi nga ta ku sirhelela eka wansati wo biha mbilu,Van'wana va ri: eka nsati wa muakelani wa wena

loyi a nga tshembekangiki, wa ririmi ro tsokombela.

25U nga tshuki u navela ku saseka ka yena,

ni ku copeta-copeta ka yena ku nga tshuki ku ku yenga.

26Munhu a nga hakela nghwavava hi xinkwa xin'we ntsena,

kambe wansati la nga ni nuna ú lava rifuwo ra wena hinkwaro.

27Loko munhu a okela ndzilo exikhwameni,

swiambalo swa yena swi ta tshwa!

28Loyi a kandziyaka makala ya ndzilo,

ú ta duvuka minkondzo.

29Swi tano ni le ka munhu loyi a etlelaka ni nsati wa un'wana;

un'wana ni un'wana loyi a khumbaka nsati wa muakelani, a nge poni.

30Khamba leri ri yivaka swakudya, leswaku ri ta miyeta nyoka,

vanhu a va ri soli,

31kambe loko ri tshuka ri kumiwile, ri ta riha ka 7,

ri humesa swilo hinkwaswo swa muti wa rona.

32Wanuna loyi a oswaka, a nga ehleketi!

Loko a etlela ni nsati wa un'wana, ú ticelela sirha;

33ú ta boxiwa timbanga, a pfumala ni ndzhuti,

a ku nga vi na loyi a nga ta n'wi susa tingana,

34hikuva loyi a nga ni rilaveta eka nsati wa yena, wa pfurha hi vukari,

kutani siku a rihiselaka, a nge tsetseleli.

35A nga ka a nga pfumeli ku riheriwa;

mbilu ya yena yi nga ka yi nga wi, hambiloko a nyikiwa tinyiko to tala!