Xitsonga 1989 (TSO89)
26

Matirhele ya swiphunta

261Ku dzunisa xiphunta a swi fanelanga,

swi fana ni gamboko hi ximumu,

kumbe mpfula leyi naka hi nkarhi wa ntshovelo.

2Nhlambha yo pfumala xivangelo, yi helela empfhukeni,

yi fana ni xindzingiri lexi nga ku tihaheleni, kumbe mbewulana leyi tirhendzelekelaka.

3Ximoko i xa hanci, tomu rona i ra mbhongolo,

kasi nhlana wa xiphunta wu fanela hi nkhavi.

4U nga tshuki u hlamula xiphunta, hi vuphukuphuku bya xona,

hikuva na wena u nga ta fana na xona.

5Xi hlamule hi ndlela leyi kombaka vuphukuphuku bya xona,

hikuva xi nga ta ehleketa leswaku xi tlharihile.

6Ku rhuma xiphunta i ku tivangela maxangu,

swi fana ni ku titsema milenge.

7Xivuriso lexi humaka enon'weni wa xiphunta,

xi fana ni milenge ya munhu wa xigono, leyi nga n'wi pfuniki nchumu.

8Ku nyika xiphunta swilo swa nkoka,

swi fana ni ku bohelela ribye exipelupelwini.

9Xivuriso lexi humaka enon'weni wa xiphunta,

xi fana ni nkhavi wa mitwa, lowu khomiweke hi loyi a pyopyiweke.

10Munhu loyi a tholaka xiphunta, kumbe vahundzi va ndlela,

ú fana ni munhu loyi a copaka vanhu hi miseve.Van'wana va ri: Munhu loyi a tholaka xidakwa kumbe xiphukuphuku, ú fana ni loyi a copaka vahundzi va ndlela

11

26:11
II Pet. 2:22
Mbyana yi tlhelela emahlanteni ya yona;

swi tano ni xiphunta, xi nga ka xi nga tshiki ku endla swa vuphukuphuku bya xona.

12Xiphunta xa antswa,

ku ri na munhu loyi a tivonaka a tlharihile.

Ta lavo loloha

13Lolo ri ri: “Ku ni nghala egondzweni!

Endleleni, ku ni dyinghala!”

14Rivanti a ri fambi ku ya kule, hi mhaka ya swikinere,swikinere, kumbe: mijakiri (dobradiças)

lolo na rona ri tano, ro vumbuluka-vumbuluka emubedweni wa rona.

15Munhu wo loloha, ú hoxa voko exinkambaneni,

kambe ku ri humesa a ri yisa enon'weni, i ntirho wo tika eka yena.

16Lolo ri tivona ri tlharihile,

ku tlula vavanuna va 7 lava nga hlamulaka mhaka hi ndlela leyi twalaka.

Swivuriso swin'wana

17Ku nyanyuka u nghenelela loko van'wana va holova,

swa fana ni ku khoma tindleve ta mbyana leyi tihundzelaka.

18-19Munhu loyi a xisaka muakelani,

kutani a ku: “A ndzo ku vungunya”,

ú fana ni munhu wa rihuhe loyi a hoxetelaka van'wana

hi swilo leswi dlayaka ku fana ni swisana swa ndzilo ni miseve.

20Loko ku ri hava tihunyi, ndzilo wa timeka;

madzolonga na wona ma kota ku hela, loko ku nga ri na munhu wo hleva.

21Tihunyi ti pfurhisa makala, ni mavivi ma pfurhisa ndzilo;

swi tano ni munhu wa tinyimpi, ú pfuxa madzolonga.

22Marito ya muhlevi, a hi ku tsokombela ka wona,

ma hatla ma nghena ma ya fika emakorhweni ya mbilu.

23Munhu loyi a fihlaka ku biha ka mbilu ya yena hi marito yo tsokombela,

ú fana ni ximbitana lexi sasekisiweke ehandle hi xikope.Kumbe: ximbitana lexi totiweke silivhere leyi nga basangiki

24Mukanganyisi ú fihla rivengo leri tateke mbilu ya yena,

hi ku sasekisa marito ya yena;

25hambiloko a nandzihisa mavulavulele ya yena, u nga kholwi,

hikuva embilwini ya yena, vubihi byi tele ku tlula mpimo.

26A nga ringeta ku fihla rivengo hi mano ya yena,

kambe vubihi bya yena byi ta paluxiwa emahlweni ka vanhu hinkwavo.

27La celaka khele, ú ta wela eka rona,

la khunguluxaka ribye, ri ta pyanya yena.

28Munhu wa mavunwa ú venga lava a va hembelaka,

marito ya yena layo tsokombela, ma lovisa.