Xitsonga 1989 (TSO89)
13

131N'wana la tlhariheke ú yingisa swiletelo swa tata wa yena,

kasi musandzi a nga twi ku tshinyiwa.

2Leswi munhu lonene a swi vulavulaka, swi n'wi vuyerisa mihandzu leyinene,

kambe vakanganyisi va navela ku endla nsele ntsena.

3Munhu loyi a nga vulavuriki ngopfu, ú hlayisa vutomi bya yena,

kasi loyi a phyaphyarhaka, ú weriwa hi khombo.

4Lolo ri fa hi ku navela, kambe a ri kumi nchumu;

munhu wa migingiriko yena, ú dya a xurha.

5Munho wo lulama ú venga mavunwa,

kasi lowo homboloka a nga nyumi ku endla swa manyala ni tingana.

6Ku lulama swi sirhelela munhu wo tshembeka,

kambe vudyoho byi lahlekisa lavo homboloka.

7Vanhu van'wana va tiendla swigwili, kasi a va na nchumu;

van'wana va tiendla swisiwana, kasi va fumile ngopfu.

8Van'wankumi va tisirhelela hi rifuwo ra vona,

kasi swisiwana a swi na mhaka na ku chavisiwa.Van'wana va ri: kasi swisiwana a swi kumi swo tikutsula ha swona

9Rivoni ra lavo lulama ri pfurha minkarhi hinkwayo,

kambe ra lavo homboloka ri ta timeka.

10Ku tikurisa, swi vanga madzolonga ntsena,

kasi vutlhari i bya lava pfumelaka ku tsundzuxiwa.

11Rifuwo leri kumiwaka hi siku rin'we,Van'wana va ri: Rifuwo leri kumiwaka hi vuxisi a ri hlweli ku dzudzeka,

kasi leri taka hi kutsongo-tsongo, ra khomelela.

12Loko munhu a nga kumi lexi a xi languteleke, ú twa mbilu ku vava,

kasi loko a kuma lexi a xi navelaka, swi fana ni loko a kumile murhi lowu nyikaka vutomi.

13Loyi a solaka switsundzuxo, ú tivangela rifu,

kasi loyi a yingisaka nawu, wa vuyeriwa.

14Dyondzo leyi humaka eka lowo tlhariha i xihlovo xa vutomi,

lexi nga ponisaka munhu entlhan'wini wa rifu.

15Munhu wa miehleketo leyinene wa tsakeriwa,

kasi vakanganyisi va lovisiwa hi mikhuva ya vona.Van'wana va ri: va hanya hi ku tikeriwa

16Loyi a ehleketaka, a nga welaweli swilo,

kambe xiphunta xi paluxa vuphukuphuku bya xona.

17Murhumiwa wo biha mbilu, ú nghenisa vanhu ekhombyeni,Van'wana va ri: ú wela ekhombyeni

kasi loyi a tshembekaka, ú tisa ku rhula.

18Loyi a alaka ku layiwa, ú tivangela vusiwana ni tingana,

kasi loyi a pfumelaka ku tshinyiwa, wa dzunisiwa.

19Loko munhu a kuma leswi a swi navelaka, wa tiphina,

kambe ku hambana ni leswo biha, swa yila eka xiphunta.

20Loyi a tolovelanaka ni lavo tlhariha, wa tlhariha,

kambe munghana wa swiphunta, ú ta wela ekhombyeni.

21Makhombo ma wela vadyohi,

kambe lavo lulama va hakeriwa hi leswinene.

22Munhu lonene ú siyela vatukulu va yena endzhaka,

kasi rifuwo ra mudyohi, ri salela lavo lulama.

23Mafusi ya swisiwana ma nga swi humesela ntshovelo lowunene,

kambe swi ta tekeriwa wona hikwalaho ka milawu leyi nga lulamangiki.

24Loyi a nga xupuliki n'wana wa yena, wa n'wi venga,

kasi loyi a rhandzaka n'wana wa yena, ú tikarhatela ku n'wi tshinya.

25Munhu wo lulama ú dya a xurha,

khwiri ra lowo homboloka rona, ri etlela ni ndlala.