Xitsonga 1989 (TSO89)
39

391“Xana wa wu tiva nkarhi lowu

timbavala ti mithaka ha wona xana?

U xiyile loko ntswele ya mhunti yi khomiwa hi switlhavi swo veleka, ke?

2Tin'hweti ta ku tika ka yona, u ti hlayile ke,

ni siku ra yona ro veleka, wa ri tiva xana,

3ri nga leri yi pavalalaka ha rona,

yi kuma ximhuntana ke?

4Ximhuntana xexo xi tikulela emananga,

kutani xi hambana ni mana wa xona, xi nga ha vuyi!

5“I mani la nyikeke timangwa ntshunxeko wa tona,

ti ntshunxiwe hi mani mapindzi ya tona ke?

6Nhova, ndzi yi endle muti wa tona,

etikweni ra makwandzasi, ti le kaya.

7A ti na mhaka ni nkitsikitsi wa miti,

a ti khahliwi hi munhu, hikuva a ti fuyiwanga.

8Madyelo ya tona ma le tintshaveni,

ti rhendzeleka kona ti ri karhi ti lava-lava swa rihlaza.

9“Xana tinyarhi ti nga pfumela ku tirhisiwa hi wena,

ti nga xwa vusiku etshangeni ra wena ke?

10Xana u nga ti tlhandleka joko, ti ku rimela,

kumbe u nga ti kokisa rihlampfu ro faya mabuwu xana?

11Leswi ti nga ni matimba lamakulu, xana u nga tshemba ku tirheriwa ha tona,

loko ntirho wu ku tikela xana?

12U nga languteli tinyarhi ku vuya ni mavele ya wena;

ti nge ma hlengeleti exivuyeni!

13“Yimbhuyimbhu, kumbe: yinca yi tlharamula timpapa yi tsakile,

kambe tinsiva ta kona i ta xiharhi xo kala tintswalo!Van'wana va ri: kambe tinsiva ta kona a hi ta gumba

14Loko yimbhu yi tshikela mandza, yi ma tshika ehansi,

ma kufumetiwa hi dyambu emisaveni.

15Yi rivala leswaku ma nga tshuka ma kandziyiwa hi vanhu,

ma phyandlasiwa hi swiharhi swa nhova.

16Yimbhu yi kurisa mavondlo ya yona hi tihanyi, onge a hi vana va yona;

hambi yi tikarhatela mahala, a yi na mhaka na swona,

17hikuva Xikwembu xi yi tsonile vutlhari,

a xi yi avelanga ku twisisa.

18Kambe loko yi pfuka yi tsutsuma,

yi hleka tihanci ni vagadi va tona.

19“Xana hanci, hi wena u yi nyikaka matimba,

kumbe ku yi mirisela ntshiva enhan'wini ke?

20Hi wena u yi thamukisaka kukota njiya ke?

Ya tikurisa, yi tshukisa vanhu hi ku rila ka yona.

21Yi phandza misava enkoveni, yi tlalamba hi matimba,

kutani yi tsutsumela enyimpini.

22A yi chavi nchumu, a yi kanakani,

yi kongoma ematlharini yi nga tlheleli endzhaku.

23Ematsheveni ya yona, ku twala vuketleketle bya miseve enkotlotweni,

ku vonaka ni matlhari yo vangama.

24Loko yi twa mhalamhala, a yi tshamiseki,

ya hiseka, yi paletela misava.

25Yi hlamula mhalamhala yi ku: ‘Aháà!’

yi nuheta nyimpi ya ha ri kule,

yi twa ku lerisa ka vafambisi, ni huwa ya mavuthu.

26“Xana khuhunu ri hahisiwa hi vutlhari bya wena,

hi wena u ri tlharamuxaka timpapa ri languta edzongeni xana?

27Xana koti ri lerisiwa hi wena ku haha ri ya henhla,

ri ya aka xisaka etintshaveni xana?

28Ri tiakela vutshamo emaribyeni,

ri tumbela emakocokocweni ya kona.

29Ri rhalarhala ri lava swo dya,

mahlo ya rona ma tlhava kule.

30Mavondlo ya rona, ri ma nwisa ngati,

laha ku nga ni mintsumbu, a ri kali.”

40

Yobo a tsandzeka ku hlamula

401HOSI Xikwembu xi engeta xi ku ka Yobo:

2“Wena muhandzi wa swihoxo, u nga kanetana na mina Xikwembu-xa-matimba-hinkwawo, ke?Kumbe: Loyi a kanetanaka ni Lowa-matimba-hinkwawo, ú ta karhala rini ke?

Ndzi hlamule, wena u phikisanaka na mina!”

3Kutani Yobo a ku ka HOSI Xikwembu:

4“We HOSI, ndzi ntsongo ngopfu emahlweni ka wena,

xana ndzi nga ku hlamula yini? Ndzi to timiyelela!

5Ndzi hlamurile kan'we kumbe kambirhi,

a ndzi nga ha engeteli nchumu.”

6Kutani HOSI Xikwembu xi engeta xi vulavula na Yobo, xi ri endzeni ka xihuhuri, xi ku:

7“Tilulamise, u yima kukota wanuna;

ndzi ta ku vutisa timhaka, wena u ndzi hlamusela tona.

8Xana u nga ndzi veka nandzu, u ndzi lumbeta,

wena u sala u ri la lulameke, xana?

9Xana u ni matimba yo ringana ni ya mina,

u nga balekisa tilo ku fana na mina ke?

10“Tiambexe vuhosi ni ndzhuti,

u ambala ku kwetsima ni ku twala.

11Chulula vukari bya wena,

languta vatikurisi hinkwavo, u va tsongahata.

12Xiyaxiya lava titshembaka, u va yisa hansi,

u kandziyela lavo homboloka lomu va nga kona.

13Hinkwavo, va funyise buwa,

u fumba mintsumbu ya vona esirheni.

14Hi kona ndzi nga ta ku dzunisa,

hikuva u ta va u tilamulele hi matimba ya wena!”

Ta mpfuvu

15“Vona mpfuvumpfuvu, kumbe: Behemoto leyi ndzi yi vumbeke kukota wena;

yona yi dya byanyi ku fana ni homu.

16Yi langute: Yi tiyile khondzo,

ni le khwirini, yi ni ntamu.

17Ncila wa yona wu fana ni kedari, a wu khotseki;

emilengeni ya yona misiha yi lo phasana-phasana.

18Marhambu ya yona i tiphuphu ta koporo,

ma fana ni tinsika ta nsimbhi.

19Exikarhi ka swivumbiwa swa mina, hi yona murhangeri,

kambe mina Muendli wa yona, ndzi nga yi dlaya.

20“Mpfuvu yi tikumela swakudya emagangeni,

laha swiharhi hinkwaswo swi tihuhelaka kona.

21Yi tilavela vutshamo emajekejekeni,

yi tumbela enhlangeni kusuhi ni mati.

22Yi wisela kona yi kuma mindzhuti,

yi sirheleriwa hi mirhi ya minengenedzi.

23Hambiloko nambu wa kona wu tala, a wu yi chavisi,

a yi vileli ni loko maboboma ya Yordani ma yi nghena non'weni.

24Xana va nga yi khoma hi ku yi dlaya mahlo,

kumbe hi ku yi hulela muhalo xana?”

41

Ta ngwenya

411

41:1
Ps. 74:14
104:26
Es. 27:1
“Xana u nga phasa ngwenyangwenya, kumbe: Levhiyatani, nyoka ya lwandle

hi xinjovo,

ririmi ra yona u nga ri boha hi ngoti ke?

2U nga yi hulela muhalo,

kumbe ku yi haka rhama hi mutwa xana?

3Xana yi nga rila eka wena yi kombela ku tsetseleriwa,

kumbe yi nga vulavula na wena hi marito yo titsongahata xana?

4Xana yi nga endla ntwanano na wena,

yi ku tirhela hilaha ku nga heriki ke?

5U nga yi khoma kukota xinyanyana xana,

u yi nyiketa eka vana va wena va xisati, va tihuhela ha yona ke?

6Lava yi phaseke, xana va nga yi xavisa,

van'wamabindzu va nga tsemelana yona ke?

7Xana u nga yi tlhava hi tlhari,

kumbe ku yi haka nhloko hi xinjovo ke?

8Loko u ringeta ku yi khoma kunene, u ta hatla u yi tshika,

u nge he engeti u lwa na yona!Hi Xiheveru, kavanyisa 41 ku sungula kwala

9La ehleketaka ku hlula ngwenya, wa tixisa,

ú ta wela hansi loko a yi vona.

10Hambiloko munhu a kanya mbilu, a nge yi pfuxi!

Loko swi ri tano, emahlweni ka mina ku nga yima mani ke?Van'wana va ri: ku nga yima mani emahlweni ka yona ke?

11

41:11
Rho. 11:35
I mani la ndzi lombeke xanchumu lexi ndzi bohekaka ku n'wi tlherisela xona ke?

Hinkwaswo leswi nga hansi ka dyambu i swa mina!

12“Ndza ha ta vula ta swirho swa ngwenya,

ni ta vunhenha bya yona, ni ku saseka ka xivumbeko xa yona.

13I mani la nga yi ahlamisaka nomo,

kumbe ku yi tela ni matomu xana?Van'wana va ri: kumbe ku boxa swisirhelelo swimbirhi swa meno ya yona, xana?

14Xana i mani la nga tiyelaka ku yi anyula tinhlaya,

leswi meno ya yona ma chavisaka xana?

15Mahakatimba enhlaneni wa yona i switlhangu swo tlhandlekelana,

ma khomana onge ma lemiwile kunene.

16Leswi ma hlanganisiweke swinene,

moya a wu ngheni exikarhi ka wona.

17Ma namarhelana ni ku khomana swin'we,

a ma namuleki nikutsongo.

18Loko yi entshemula, ku vonaka swo vangama,

mahlo ya yona ma tshwukile kukota vurhonga.

19Enon'weni wa yona, ku pfurha malangavi,

ku baleka ni tinhlahle ta ndzilo.

20Etinhompfini ta yona ku mbuluka musi,

onge i wa mati layo virisiwa, kumbe wa tinhlanga leti tshwaka.Kumbe: wa ximbitana xa mirhi ya risuna

21Ku hefemula ka yona ku pfurhisa makala,

malangavi ma huma enon'weni wa yona.

22Ntamu wa yona wu le nhlaneni,

lava langutanaka na yona va rhurhumela.

23Dzovo ra yona ri ni minkonya yo tala

leyi nga pfalekiki, onge i ya koporo leyi n'okisiweke.

24Mbilu ya yona yi nonon'hwa kukotisa ribye,

yi fana ni ribye ro sila ha rona.

25“Loko ngwenya yi huma ematini, hambi ti ri tinhenha, ta chava,

ti tsemeka nhlana, ti tlhelela ndzhaku.Kumbe: loko swi vona magandlati ya kona, swi tlhelela ndzhaku

26Hambi ti ringeta ku yi tlhava hi fumu, a ti yi vavisi,

swi tsandza ni tlhari, kumbe khava, kumbe nseve.

27Matlhari ya nsimbhi kumbe ya koporo, eka yona a hi nchumu,

i tinhlanga ntsena, kumbe mhandze leyi boleke.

28Nseve wu nge yi tsutsumisi,

ni maribye ya xipelupelu ma hundzuka sava ntsena.

29Xigombo xo va rihlanga eka yona,

yi hleka vuketleketle bya matlhari.

30Ekhwirini ra yona, ku ni swirhengele leswi tlhavaka,

yi famba hi rona endzhopeni onge i xileyi.xileyi, kumbe: trenó

31Yi virisa xidziva kukota mbita,

lwandle yi ri phuphisa khuvi.

32Laha yi hundzaka kona, ku sala ku hatima,

mati ya kona onge i timpfi.

33Ku hava xo fana ni ngwenya laha misaveni,

xivumbiwa lexi a xi chavi nchumu!

34Hi yona hosi ya swivandzana hinkwaswo,

hinkwaswo yi swi langutela hansi.”