Xitsonga 1989 (TSO89)
19

Yobo ú ri, Xikwembu xa n'wi xanisa

191Kutani Yobo a hlamula a ku:

2“Xana mi ta tshika rini ku ndzi karhata,

mi ta ndzi tlhava hi marito ku fikela rini?

3Mo tshamela ku ndzi rhuketela!

Xana a mi na tingana ku ndzi veka nandzu xana?

4Hambiloko a ndzo va ni xihoxo,

a xi ta tiva hi mina ntsena.Kumbe: Loko a ndzi ri ni xihoxo, a ndzi ta xi tsundzuka

5Hakunene, loko mi lwa na mina, ma tikurisa;

ku vaviseka ka mina, mi ri ndzi lo tivangela!

6Kambe swi tiveni: I Xikwembu xi ndzi vangelaka khombo leri,

xi ndzi khubumetile hi ritavala ra xona.

7“Ndzi ba nkalanga ndzi ri: ‘Ndza xanisekoo!’ kambe a ndzi hlamuriwi;

ndzi huwelela hi matimba, kambe a ndzi lweriwi hi munhu.

8Xikwembu xi hingakanyile ndlela ya mina,

xi yi funengetile hi xinyami, ndzi nga ha koti ku hundza.

9Xi ndzi susele ndzhuti,

xi ndzi tekela ni ku xiximeka.

10Xi le ku ndzi fayeni ku fana ni khumbi ndzi ko ndzi hela,

xi tsuvula ku tshemba ka mina tanihi murhi.

11Xi pfurhisa vukari bya xona ehenhla ka mina,

onge ndzo va nala eka xona.

12Tinhenha ta xona ta hlengeletana,

ti khoma ndlela ku ta ndzi hlasela,

ti fika ti rhendzela muti wa mina.

13“Xikwembu xi ndzi hambanisile ni varikwerhu,

va ka hina va ndzi fularhele.

14Maxaka ni vanghana va mina va ndzi tshikile,

15lava a va ri vaendzi laha ka mina, va ndzi rivele.

Malandza ya mina ya xisati ma ndzi vula muluveri,Kumbe: Maxaka ma ndzi tshikile, vanghana va ndzi rivele; vaendzi laha ka mina, ni malandza ya xisati, va ndzi vula muluveri

ndzi hundzukile xi-ta-xi-famba emahlweni ka wona.

16Loko ndzi vitana hlonga, a ri hlamuri,

hambi ndzi ri khongela kunene!

17Loko ndzi hefemula, ndzi nun'hweta nsati wa mina,

va ka hina, ndzi va hlambisa timbilu.

18Hambi va ri vana lavatsongo va ndzi sandza,

va ndzi hlekula loko ndzi ringeta ku pfuka.

19Vanghana va mina hinkwavo va ndzi hundzukele,

ndzi tshikiwa hi lava a va ndzi rhandza khale.

20Ndzi lo sala marhambu ntsena,

ni meno ya mina ma gulekile hinkwawo.Kumbe: ndzi lo pona sirha ri ahlamile. Xiheveru: ndzi lo pona ndzi ri ni nhlonge ya meno ya mina ntsena

21“N'wina vanakulorhi, ndzi tweleni vusiwana, ndzi ri, ndzi tweleni vusiwana,

hikuva Xikwembu xi ndzi bile.

22Leswi Xikwembu xi ndzi salaka ndzhaku, ndzi tshikeni,

ma ha ndzi xanisela yini ke?

23“Mawaku loko marito ya mina ma nga tsariwa,

loko ma nga mpfampfarhutiwa kunene etsalweni ra koporo,

24mawaku loko ma nga kovotliwa eribyeni hi peni ya nsimbhi,

maletere ma cheriwa ntsopfu ma nga ha suki!

25“Kambe ndza swi tiva leswaku Mulweri wa mina wa hanya,

eku heteleleni, hi yena la nga ta sala a yimile laha misaveni.Van'wana va ri: ni leswaku ndzi ta huma entshurini

26Loko vuvabyi lebyi byi ta va byi ndzi hete nhlonge,

ndza ha ta va munhu, ndzi vona Xikwembu.Van'wana va ri: ndzi ta hlalela Xikwembu ndzi nga ha ri enyameni. Xiheveru: ndzi ta vona Xikwembu hi le nyameni ya mina

27Ndzi ta xi vona hi ya mina mahlo,

mina hi ndzexe, ku nga ri un'wana!

Ndzi langutela nkarhi lowu hi mahlo-ngati.

28Loko mi vula leswaku mi lava ku engeta mi ndzi xanisa,

mi ko mi kuma xivangelo xa khombo leri ra mina,

29mi fanele ku chava fumu,

hikuva ku hlundzuka ku vanga ku biwa hi fumu,

kutani mi ta tiva leswaku Muavanyisi, ú kona!”