Xitsonga 1989 (TSO89)
7

71Loko ndzi lava ku horisa vanhu

va tiko ra Israele,

vubihi bya vanhu lava va ka Efrayimi bya tikomba,

ni ku homboloka ka vanhu va Samariya ka vonaka:

Va hanya hi ku xisana,

va tshovelana tindlu va yivelana,

va gevenga ni vanhu etindleleni.

2Kambe vona a va swi ehleketi

leswaku mintirho ya vona leyo biha, ndza yi tsundzuka hinkwayo.

Sweswi mintirho leyi ya vona yi va rhendzerile,

yi lo tlàngàndlà, emahlweni ka mina.

Swikungu swo hlunga vuhosi

3Hosi ya tiko va yi tsakisa hi vuxisi,

tindhuna tona va ti kanganyisa kunene.

4Hinkwavo va ni tihanyi:Van'wana va ri: Hinkwavo va endla vugangu

Va fana ni ndzilo lowu pfurhaka exitikweni,

lowu musweki wa xinkwa a tshikaka ku wu hlanganyeta,

ku sukela loko a ha pfuva mapa, ku kondza ma kukumuka.

5Hi siku ra nkhuvo wa hosi,

va pyopyisa tindhuna hi vhinyo leyo bava,

hosi yi ri karhi yi endla xinakulobye

ni vakanganyisi.

6Timbilu ta vona ti fana ni ndzilo exitikweni,

ti tshineta vukanganyisi kusuhi.Van'wana va ri: ti pfurha ni vukanganyisi

Vusiku hinkwabyo vukari bya vona byi vuvumela kunene,

kambe nimpundzu byi huma malangavi lamakulu.

7Hinkwavo va hisa ku fana ni ndzilo exitikweni,

va heta vafumi va vona.

Tihosi ta vona hinkwato ti wile,

kambe ku hava ni yin'we leyi kombeleke ku pfuniwa hi mina!

Vanhu va tiko ra Israele va kombela matiko ku va pfuna

8Va ka Efrayimi va hlangana-hlangana ni vanhu va matiko mambe,

va fana ni ximbhundzwa lexi vupfeke tlhelo rin'we ntsena.

9Vanhu va le handle va heta matimba ya va ka Efrayimi,

kambe vona a va voni nchumu;

va n'wan'waseriwa misisi yo basa enhlokweni,

kambe vona a va swi tivi.

10Ku tikurisa ka vanhu va tiko ra Israele ka va mangalela;

hambiswiritano, a va tlheleli eka HOSI Xikwembu xa vona,

ni ku xi lava, a va fambi va xi lava.

11Va ka Efrayimi va fana ni phuphula ra tuva

leri hahaka ri ya hala ni hala:

Va kombela va le Egipta ku va pfuna,

va hundza va ya fika ni le Asiriya.

12Ndzi ta andlala ritavala ra mina ehenhla ka vona,

loko va ri karhi va rhendzeleka ni matiko;

ndzi ta va phasa ku fana ni tinyanyana,

ndzi va ba, ndzi va bela mintirho ya vona leyo homboloka.Van'wana va ri: ndzi va khoma loko ndzi twa leswaku va hlengeletana

13Va ta weriwa hi khombo, hikuva va sukile eka mina!

Va ta xanisiwa, hikuva va ndzi tshikile!

Ku va lamulela, a ndzi ta va lamulela,

kambe va vulavula mavunwa hi mina.

14Loko va rila emasangwini ya vona,

ni loko va tixekelela, va kombela mavele ni vhinyo,

a va huweleli eka mina hi mbilu hinkwayo,

va le ku ndzi fularheleni.

15Hambileswi ndzi va leteleke ni ku va nyika matimba,

va endla makungu yo lwa na mina.

16Va hundzukela eka leswi nga pfuniki nchumu,Van'wana va ri: Va hundzukela eka va Baali. Kumbe: Va ndzi hundzukela va nga languti ehenhla

va fana ni vurha lebyi debyeke.

Tihosi ta vona ti ta dlayiwa hi fumu,

hikuva ti tikurisile ngopfu eku vulavuleni ka tona,

kutani ti ta hundzuka xihlekiso etikweni ra Egipta.