Xitsonga 1989 (TSO89)
34

Ta maribye ya vumbirhi ya milawu

(Dut. 10:1-5)

341Kutani HOSI Xikwembu xi ku ka Muxe: “Vatla maribye mambirhi ya swiphepherhele, ma fana ni layo sungula; kutani mina ndzi ta tsala kambe marito lawa a ma ri eka maribye layo sungula, lawa u ma fayeke. 2Mundzuku nimpundzu u fanele ku va u hetile; kutani loko ri xa, tlhandlukela ehenhla ka ntshava ya Sinayi, u fika u ndzi yimela kona. 3Ku nga vi ni munhu ni un'we loyi a nga ta tlhandluka na wena, naswona ku nga vi ni un'we loyi a nga ta kumiwa a ri exivandleni xihi ni xihi xa ntshava; hambi swi ri swifuwo leswikulu ni leswitsongo, swi nga tshuki swi dyela kusuhi ni ntshava.” 4Kutani Muxe a vatla maribye mambirhi ya swiphepherhele, ma fana ni layo sungula; a pfuka nimpundzu swinene, a tlhandlukela entshaveni ya Sinayi hilaha HOSI Xikwembu xi n'wi leriseke hakona, a famba a khomile maribye lawa mambirhi. 5Kutani HOSI Xikwembu xi rhelela xi ri epapeni, xi fika xi yima na Muxe kwale ntshaveni, xi twarisa vito ra xona, ra “HOSI”.Kumbe: kutani Muxe a twarisa vito ra xona ra HOSI 6

34:6-7
Eks. 20:5-6
Tinhl. 14:18
Dut. 5:9-10
7:9-10
Kutani xi hundza hi le mahlweni ka Muxe, xi ri karhi xi huwelela, xi ku: “HOSI, HOSI, Xikwembu lexi twelaka vanhu vusiwana ni ku va tsetselela, lexi hlwelaka ku kariha, lexi taleke tintswalo ni ku tshembeka, 7lexi kombaka tintswalo leti to tshembeka ku fika eka rixaka ra khume ra madzana, lexi rivalelaka milandzu, ni ku tiarisa, ni swidyoho, kambe xi nga tshikiki ku ba lava dyoheke, ku fika eka vana va vona, ni ka vatukulu va vona ku yisa erixakeni ra vunharhu ni ra vumune.” 8Kutani Muxe a korhamela hansi hi ku hatlisa, a khongela, 9a ku: “HOSI, loko hakunene u ndzi tsakela, ndzi kombela leswaku u famba exikarhi ka hina, we HOSI! Hambileswi vanhu lava va tinonon'hwisaka, hi rivalele nandzu wa hina ni xidyoho xa hina, u hi endla vanhu va wena va xiviri.”

Ta Ntwanano

(Eks. 23:14-19; Dut. 7:1-5; 16:1-17)

10Kutani HOSI Xikwembu xi ku: “Sweswi ndzi le ku endleni ka ntwanano ni Vaisraele. Ndzi ta endla swihlamariso leswikulu emahlweni ka vanhu va wena; swihlamariso swa kona a swi si tshama swi humelela emisaveni hinkwayo, kumbe erixakeni rihi na rihi. Vanhu va matiko hinkwawo lawa ya mi rhendzeleke, va ta vona leswi mina HOSI ndzi tirhaka swona, hikuva leswi ndzi nga ta mi endlela swona, swi ta chavisa ngopfu.

11“Hlayisani leswi ndzi mi lerisaka swona namuntlha. Mina ndzi ta hlongola Vaamori, ni Vakanana, ni Vahiti, ni Vaperesi, ni Vahivhi, ni Vayebusi, va suka emahlweni ka n'wina. 12Mi tivonela, mi nga tshuki mi endla ntwanano ni vaaki va tiko leri mi yaka eka rona, hikuva mhaka leyi yi nga hundzuka ntlhamu lowu wu nga ta mi phasa. 13

34:13
Dut. 16:21
Mi ta hindzimuxa tialitari ta vona, mi fayetela ni maribye ya vukhongeri bya vona bya hava, mi tsemelela ni timhandze ta Axera xikwembukazi xa vona.

14“Mi nga tshuki mi nkhinsamela swikwembu swin'wana, hikuva mina HOSI, vito ra mina hi mina Xikwembu-xa-rilaveta, ndzi Xikwembu lexi lavaka ku gandzeriwa xi ri xoxe ntsena. 15Mi nga tshuki mi endla ntwanano ni vaaki va tiko, hikuva loko va ri karhi va endla vunghwavava eku gandzeleni ka swikwembu swa vona, ni loko va swi humesela magandzelo, va nga tshuka va mi rhambile, kutani mi dya swa magandzelo ya vona, 16naswona mi nga tshuki mi lavela majaha ya n'wina evasati exikarhi ka vanhu lava, hikuva vavasati lava va ta ya emahlweni va endla vunghwavava eku gandzeleni ka swikwembu swa vona, va kokela ni vana va n'wina eka swona.

17

34:17
Eks. 20:4
Levh. 19:4
Dut. 5:8
27:15
“Mi nga tshuki mi n'okisa swilo mi tiendlela swifaniso swa swikwembu.

18

34:18
Eks. 12:14-20
Levh. 23:6-8
Tinhl. 28:16-25
“Mi ta endla nkhuvo wa Xinkwa lexo-ke-comela, hilaha ndzi mi leriseke hakona. Mi fanele ku dya xinkwa lexo-ke-comela masiku ya 7, hi nkarhi lowu vekiweke eka n'hweti ya Abibi, hikuva hi yona n'hweti leyi mi humeke ha yona etikweni ra Egipta.

19

34:19
Eks. 13:2
“Hinkwaswo leswi rhangeke ku velekiwa i swa mina; mi ndzi hlawulela ni mativula ya swifuwo swa n'wina hinkwaswo, leswikulu ni leswitsongo.Van'wana va ri: Hinkwaswo leswi rhangeke ku velekiwa i swa mina, ku katsa ni mativula ya xinuna ya swifuwo swa n'wina hinkwaswo, leswikulu ni leswitsongo 20
34:20
Eks. 13:13
Ematshan'weni ya ximbhongolwana xa xinuna xa mativula, mi ta tlhava xinyimpfana kumbe ximbutana; loko mi nga tsakeli ku tlhava nchumu ematshan'weni ya ximbhongolwana, xi tshoveni nhamu; kambe ematshan'weni ya vana va n'wina hinkwavo va xinuna va mativula, mi ta tlhava xifuwo.

“Ku nga vi na munhu loyi a taka emahlweni ka mina, a nga tamelanga nchumu.

21

34:21
Eks. 20:9-10
23:12
31:15
35:2
Levh. 23:3
Dut. 5:13-14
“Mi ni masiku ya 6 lawa mi faneleke ku tirha ha wona, kambe hi siku ra vu-7 mi ta wisa, hambiloko wu ri nkarhi wa xirimo, kumbe nkarhi wa ntshovelo.

22

34:22
Levh. 23:15-21,39-43
Tinhl. 28:26-31
“Mi ta endla Nkhuvo wa Mavhiki,Nkhuvo wa Mavhiki, kumbe: Nkhuvo wa Ntshovelo (Vonani Eksoda 23:16) mi humesa ntshovelo wo sungula wa koroni; kasi eku heleni ka nkarhi wa ntshovelo,eku heleni ka nkarhi wa ntshovelo, kumbe: eku heleni ka lembe mi ta endla Nkhuvo wo Hlengeleta.

23“Vavanuna va ka n'wina hinkwavo va fanele ku hlengeletana kanharhu hi lembe emahlweni ka mina HOSI N'wini wa hinkwaswo, Xikwembu xa Israele. 24Ndzi ta hlongola vamatiko emahlweni ka n'wina, ndzi kurisa tiko ra n'wina, kutani enkarhini lowu mi nga ta ta mi ta hlengeletana emahlweni ka mina kanharhu elembeni, a ku nga vi na munhu loyi a nga ta sala a ringeta ku mi tekela tiko.

25

34:25
Eks. 12:10
“Loko mi ndzi tlhavela magandzelo, mi nga tshuki mi katsa ngati ya xifuwo ni xinkwa lexi nga ni comela; naswona, loko mi humesa magandzelo enkhubyeni wa Paseka, ku nga tshuki ku va ni leswi nga ta tshama ku fikela nimpundzu.

26

34:26
Dut. 24:21
26:2
“Leswi mi nga ta rhanga mi swi tshovela eka ntshovelo wo sungula wa le masin'wini ya n'wina, mi ta swi tisa endlwini ya mina HOSI, Xikwembu xa n'wina.

“Mi nga tshuki mi sweka ximbutana hi masi ya mana wa xona.”

27Kutani HOSI Xikwembu xi ku ka Muxe: “Tsala marito lawa, hikuva ndzi bohile ntwanano na wena na Vaisraele, hi ku landza wona.” 28Muxe ú tshamile na HOSI Xikwembu kwale ntshaveni masiku ya 40 ni vusiku bya kona, a nga dyi nchumu, a nga nwi nchumu; kutani a tsala marito ya ntwanano, yi nga Milawu ya khume, emaribyeni ya swiphepherhele.

Ta Muxe loko a vuya hi le ntshaveni ya Sinayi

29

34:29-35
II Kor. 3:7-16
Loko Muxe a ri karhi a rhelela a ta hi le ntshaveni ya Sinayi, a khomile maribye lawa mambirhi ya Ntwanano, a a nga swi tivi leswaku mombo wa yena wa hatima, hi mhaka ya leswi a vulavuleke na HOSI Xikwembu. 30Loko Aroni ni Vaisraele hinkwavo va languta Muxe, va vona mombo wa yena wu hatima, kutani va chava ku ta kusuhi na yena. 31Kambe Muxe a va vitana, kutani Aroni ni varhangeri hinkwavo va ntshungu wa Vaisraele va ya kusuhi na yena, kutani Muxe a vulavula na vona. 32Endzhaku ka sweswo, na vona Vaisraele hinkwavo va ta kusuhi, kutani a va tivisa milawu hinkwayo leyi HOSI Xikwembu xi n'wi byeleke yona loko a ri entshaveni ya Sinayi. 33Loko Muxe a hetile ku vulavula na vona, a siva mombo wa yena hi xincekana. 34Kambe nkarhi hinkwawo loko Muxe a nghena entsongeni ku ya vulavula na HOSI Xikwembu, a a susa xincekana emombyeni, ku kondza loko a huma. Loko Muxe a suka emahlweni ka HOSI Xikwembu, a ya tivisa Vaisraele leswi xi n'wi leriseke swona, 35Vaisraele a va vona mombo wa yena wu ri karhi wu hatima;Kumbe: a va languta mombo wa Muxe, hikuva a wu hatima hikokwalaho, a a tisiva mombo hi xincekana, ku kondza loko a tlhelela entsongeni ku ya vulavula na HOSI Xikwembu.