Xitsonga 1989 (TSO89)
27

Ta ku tsariwa ka Nawu emaribyeni

271Kutani Muxe a lerisa Vaisraele a ri ni vakulukumba, a ku: “Hlayisani milawu hinkwayo leyi ndzi mi leriseke yona namuntlha. 2

27:2-8
Eks. 20:25
Yox. 8:30-32
Siku leri mi nga ta pela ha rona nambu wa Yordani mi nghena etikweni leri HOSI Xikwembu xa n'wina xi mi nyikaka rona, mi fanele ku yimisa maribye lamakulu, mi ma tota kalaka.kalaka, kumbe: mhemba 3Loko mi ta va mi perile nambu mi nghena etikweni leri khulukaka ntswamba ni vulombe, hilaha HOSI Xikwembu xa vatata wa n'wina xi mi tshembiseke hakona, mi ta tsala emaribyeni lawa marito hinkwawo ya Nawu lowu. 4Maribye lawa ndzi mi lerisaka wona namuntlha, mi ta ma yimisa entshaveni ya Ebali loko mi ta va mi perile nambu wa Yordani, mi ma tota kalaka; 5kutani le ntshaveni mi ta akela HOSI Xikwembu alitari hi maribye; maribye ya kona mi nga tshuki mi ma khumba hi mbatlo. 6Alitari leyi mi nga ta yi akela HOSI Xikwembu xa n'wina, mi ta yi aka hi maribye lama nga vatliwangiki, kutani mi ta humesela ehenhla ka yona magandzelo lama hisiwaka, mi humesela HOSI Xikwembu xa n'wina. 7Mi ta humesa ni magandzelo ya xinakulobye, mi tlhela mi dyela kwale, mi tsaka emahlweni ka HOSI Xikwembu xa n'wina. 8Marito hinkwawo ya nawu lowu, mi fanele ku ma tsala emaribyeni, mi ma tsala ma vonaka swinene.”

9Kutani Muxe a byela Vaisraele hinkwavo, a ri ni vaprista va ka Levhi, a ku: “Miyelani, mi rhiya tindleve, n'wina Vaisraele. Namuntlha mi hundzukile vanhu va HOSI Xikwembu xa n'wina. 10Hikokwalaho mi fanele ku yingisa leswi HOSI Xikwembu xa n'wina xi mi byelaka swona, mi hlayisa swileriso ni milawu ya xona leyi ndzi mi lerisaka yona namuntlha.”

Ku rhukaniwa ka lava nga yingisiki

11Hi siku rero, Muxe a byela Vaisraele a ku; 12

27:12
Dut. 11:29
Yox. 8:33-35
“Loko mi perile nambu wa Yordani, lava nga ta ya yima entshaveni ya Gerizimi va katekisa vanhu, hi lava: Va ka Simiyoni, ni va ka Levhi, ni va ka Yuda, ni va ka Isakara, ni va ka Yosefa, ni va ka Benjamini. 13Kasi lava nga ta ya yima entshaveni ya Ebali va vula marito ya ndzhukano, hi lava: Va ka Rhuveni, ni va ka Gadi, ni va ka Asere, ni va ka Zebuloni, ni va ka Dani, ni va ka Neftali. 14Kutani Valevhi va ta huwelela hi rito leri tlakukeke, va tivisa Vaisraele hinkwavo, va ku:

15

27:15
Eks. 20:4
34:17
Levh. 19:4
26:1
Dut. 4:15-18
5:8
“ ‘A a rhukaniwe, munhu loyi a tivatlelaka kumbe ku tivumbela xifaniso xa xikwembu a xi gandzela exihundleni, kasi i xilo lexi a xi endleke hi mavoko ya yena, lexi vengiwaka hi HOSI Xikwembu.’ Kutani Vaisraele hinkwavo va ta hlamula va ku: ‘Amen!’

16

27:16
Eks. 20:12
Dut. 5:16
“ ‘A a rhukaniwe, munhu loyi a sandzaka tata wa yena kumbe mana wa yena.’ Kutani Vaisraele hinkwavo va ta hlamula va ku: ‘Amen!’

17

27:17
Dut. 19:14
“ ‘A a rhukaniwe, munhu loyi a kevetlaka ndzilekana wa masimu ya vaakelani va yena.’ Kutani Vaisraele hinkwavo va ta hlamula va ku: ‘Amen!’

18

27:18
Levh. 19:14
“ ‘A a rhukaniwe, munhu loyi a lahlekisaka lowo-fe-mahlo endlela.’ Kutani Vaisraele hinkwavo va ta hlamula va ku: ‘Amen!’

19

27:19
Eks. 22:21
23:9
Levh. 19:33-34
Dut. 24:17-18
“ ‘A a rhukaniwe, munhu loyi a gombonyokisaka timhaka ta muluveri ehubyeni, kumbe ta loyi a pfumalaka vatswari, kumbe ta noni.’ Kutani Vaisraele hinkwavo va ta hlamula va ku: ‘Amen!’

20

27:20
Levh. 18:8
20:11
Dut. 22:30
“ ‘A a rhukaniwe, munhu loyi a khomisaka tata wa yena tingana hi ku etlela ni un'wana wa vasati va tatana loyi wakwe.’ Kutani Vaisraele hinkwavo va ta hlamula va ku: ‘Amen!’

21

27:21
Eks. 22:19
Levh. 18:23
20:15
“ ‘A a rhukaniwe, munhu loyi a etlelaka ni xifuwo xihi ni xihi.’ Kutani Vaisraele hinkwavo va ta hlamula va ku: ‘Amen!’

22

27:22
Levh. 18:9
20:17
“ ‘A a rhukaniwe, munhu loyi a etlelaka ni makwavo wa xisati, a nga va loyi a mameke vele rin'we na yena, kumbe loyi a hlanganaka na yena eka tatana.’ Kutani Vaisraele hinkwavo va ta hlamula va ku: ‘Amen!’

23

27:23
Levh. 18:17
20:14
“ ‘A a rhukaniwe, munhu loyi a etlelaka ni mana wa nsati wa yena.’ Kutani Vaisraele hinkwavo va ta hlamula va ku: ‘Amen!’

24“ ‘A a rhukaniwe, loyi a dlayaka munhu-kulobye exihundleni.’ Kutani Vaisraele hinkwavo va ta hlamula va ku: ‘Amen!’

25“ ‘A a rhukaniwe, munhu loyi a pfumelaka ku xaviwa leswaku a ya dlaya un'wana la nga riki na nandzu.’ Kutani Vaisraele hinkwavo va ta hlamula va ku: ‘Amen!’

26

27:26
Gal. 3:10
“ ‘A a rhukaniwe, munhu loyi a nga riki na mhaka ni leswi tsariweke eka Nawu lowu, la nga hanyiki ha swona.’ Kutani Vaisraele hinkwavo va ta hlamula va ku: ‘Amen!’