Ta Aminoni na Tamari

13¹Abixalomu n'wana Davhida a a ri ni makwavo wa xisati wo saseka ngopfu, loyi a va ku i Tamari. Aminoni mativula ya Davhida a a n'wi rhandza. ²Mhaka leyi ya ku rhandza Tamari yi n'wi karhata swinene, yi n'wi vabyisa. Tamari a a nga si tivana ni wanuna, kutani Aminoni a a swi vona leswaku swi ta n'wi nonon'hwela ngopfu ku endla nchumu eka yena. ³Kambe Aminoni a a ri ni nakulobye, loyi a va ku i Yonadabu, n'wana XimeyaXimeya, kumbe: Xama (I Sam. 16:9; 17:13) makwavo wa Davhida. Yonadabu loyi a a tlharihele tlhelo, ⁴kutani a vutisa Aminoni, a ku: “Wena n'wana wa hosi, hikwalaho ka yini u ngo tshama u hlunamile masiku hinkwawo xana? Xana a wu swi lavi ku ndzi byela ke?” Aminoni a ku: “Ndzi rhandza Tamari, makwavo wa makwerhu Abixalomu!”

⁵Yonadabu a n'wi hlamula a ku: “Hiswona, yana u ya tilata esangwini ra wena, u endla onge wa vabya; loko tata wa wena a ta a ta ku pfuxela, u ku ka yena: ‘Ndzi kombela leswaku makwerhu Tamari a ndzi tela ni swakudya; a a te a ta swi swekela kwala ka mina, ndzi ri karhi ndzi swi vona, kutani a ndzi nyika hi voko ra yena, ndzi dya.’ ” ⁶Hiloko Aminoni a ya tilata, a endla onge wa vabya; loko hosi Davhida a ya n'wi pfuxela, Aminoni a ku ka yena: “Ndzi kombela leswaku makwerhu Tamari a ta haleno, a ta ndzi swekela vuswanyana, kutani a ndzi nyika hi voko ra yena, ndzi dya.”

⁷Kutani Davhida a rhumela rito eka Tamari laha a a ri kona, leri nge: “Yana endlwini ya makwenu Aminoni, u ya n'wi swekela swakudya.” ⁸Kavaloko Tamari a ya endlwini ya makwavo Aminoni, a n'wi kuma a etlele esangwini. Kutani a teka mapa, a endla mbila, a chela embiteni, a sweka, Aminoni a ri karhi a swi vona. ⁹Kutani a phula mbita, a phama leswaku Aminoni a ta dya, kambe yena a ala ku dya, a ku ka Tamari: “Lerisa hinkwavo lava nga laha ndlwini leswaku va huma.” Kutani va huma hinkwavo. ¹⁰Aminoni a ku ka Tamari: “Tana ni swakudya kwalaha ndzi nga kona, u ndzi nyika swona hi voko ra wena, ndzi dya.” Tamari a teka vuswa lebyi a byi swekeke, a ya na byona eka makwavo Aminoni, ¹¹a swi veka kusuhi na yena leswaku a ta dya. Kambe Aminoni a n'wi khoma, a ku ka yena: “Tana makwerhu, etlela na mina!” ¹²Tamari a n'wi hlamula a ku: “E-e, u nga ndzi pfinyeleti makwerhu! Maendlele lawa ma yila swinene etikweni ra Israele; u nga tshuki u endla mhaka ya vuphukuphuku byo tano! ¹³Xana ndzi ta ya tumbela kwihi ni tingana ta mina xana? Hambi a ri wena, u ta hundzuka xiphukuphuku lexikulu etikweni ra Israele. Ndza ku kombela hi matimba leswaku u vulavula ni hosi; a ndzi tshembi leswaku a nga ala leswaku u ndzi teka.” ¹⁴Kambe Aminoni a ala ku n'wi yingisa, kutani leswi a a n'wi tlula hi matimba, a n'wi pfinya, a etlela na yena.

¹⁵Kutani Aminoni a sungula ku venga Tamari hi rivengo lero chavisa swinene; rivengo ra kona a ri tlula rirhandzu leri a a n'wi rhandza ha rona khale. Kutani Aminoni a byela Tamari a ku: “Suka, u famba!” ¹⁶Kambe Tamari a hlamula a ku: “E-e, makwerhu. Xidyoho lexi xo ndzi hlongola, xi bihile ku tlula xidyoho lexin'wana lexi u ndzi endleleke xona!” Aminoni a ala ku n'wi yingisa, ¹⁷kutani Aminoni a vitana jaha leri ri n'wi tirhelaka, a ri lerisa a ku: “Koka wansati loyi, u n'wi humesela ehandle leswaku a suka laha ndzi nga kona, kutani u goga rivanti.” ¹⁸Kutani nandza wa Aminoni a humesela Tamari ehandle, a tlhela a goga ni rivanti. Tamari a a ambarile xiambalo xo leha lexi a xi ri ni mavoko, hikuva vana va tihosi loko va nga si tekiwa a va ambarisa sweswo. ¹⁹Kutani Tamari a tichela nkuma enhlokweni, a handzulela xiambalo lexo leha lexi a a xi ambarile, a tlhandleka mavoko enhlokweni, a muka a ri karhi a rila swinene.

²⁰Abixalomu makwavo a n'wi vutisa a ku: “Xana Aminoni makwenu ú lo ku endla nsele xana? Tshika ku ba huwa makwerhu, hikuva munhu loyi i makwenu. Wena u nga ha tikarhateli swona.” Kutani Tamari a tshama eka makwavo Abixalomu, a ri ni xivundza lexikulu. ²¹Timhaka leti hinkwato ti hlundzukisa ngopfu hosi Davhida, loko a ti twa, [kambe a a nga lavi ku vavisa Aminoni mbilu, hikuva a a n'wi rhandza hileswi a a ri n'wana wa yena wa mativula].Van'wana a va tsalanga marito lawa ²²Abixalomu yena a a venga Aminoni swinene, ni ku n'wi hlamula a a nga ha n'wi hlamuli, hi mhaka ya leswi a a pfinyeletile Tamari makwavo.

Ta ku rihiseta ni ku baleka ka Abixalomu

²³Siku rin'wana, endzhaku ka malembe mambirhi, Abixalomu a va ni nkhuvo wo tsemeta voya bya tinyimpfu ta yena eBaala-Hazoro, kusuhi ni muti wa Efrayimi; kutani a rhamba vamakwavo hinkwavo, vana va hosi Davhida. ²⁴Abixalomu a ya eka hosi Davhida a fika a ku: “Vona we hosi, mina nandza wa wena ndzi ni nkhuvo wo tsemeta voya bya tinyimpfu; kutani ndza ku rhamba wena hosi ni malandza ya wena, leswaku mi famba na mina nandza wa wena.” ²⁵Hosi yi hlamula yi ku: “E-e, n'wananga, hi nga ka hi nga yi hinkwerhu, hikuva hi ta va hi ku tikisela ngopfu.” Abixalomu a phikelela, kambe hosi Davhida a ala ku ya, kutani a n'wi byela leswaku a a fambe hi ku rhula. ²⁶Abixalomu a ku: “Leswi wena u tsandzekaka, ndzi kombela leswaku makwerhu Aminoni a famba na hina.” Hosi yi n'wi hlamula yi ku: “Xana mi n'wi lavela yini Aminoni leswaku a famba na n'wina xana?” ²⁷Kambe Abixalomu a phikelela, hosi yi kondza yi pfumelela Aminoni ni vana lavan'wana va yena hinkwavo ku famba na Abixalomu.

[Abixalomu a endla nkhuvo lowukulu lowu fanaka ni wa tihosi.]Van'wana a va tsalanga marito lawa ²⁸Kutani a lerisa malandza ya yena, a ku: “Mi xiya loko Aminoni a pyopyiwile hi vhinyo, kutani loko ndzi ku ka n'wina: ‘Tlhavani Aminoni!’, mi n'wi dlaya. Mi nga chavi, hikuva hi mina ndzi mi lerisaka. Kanyani timbilu, mi komba vunhenha bya n'wina.” ²⁹Malandza ya Abixalomu ma dlaya Aminoni hilaha Abixalomu a ma leriseke hakona. Kutani vana lavan'wana va hosi va gada timeyilatimeyila, kumbe: timula ta vona hinkwavo, va suka va tsutsuma.

³⁰Loko va ha ri endleleni, Davhida a twa mahungu-ndlela lama nge: “Abixalomu ú dlayile vana va hosi hinkwavo, ni un'we a nga salanga.” ³¹Kutani hosi Davhida a suka a yima, a handzulela swiambalo swa yena, kutani a pavalala ehansi; malandza ya yena a ma yimile kusuhi na yena, ma ambarile swiambalo leswi handzuleriweke. ³²Kutani Yonadabu n'wana Ximeya makwavo wa Davhida a byela Davhida a ku: “We hosi, u nga tshuki u ehleketa leswaku va dlayile majaha ya wena hinkwawo; loyi a nga dlawa i Aminoni ntsena, hikuva Abixalomu a a n'wi pikile ku sukela siku leri Aminoni a pfinyeleteke Tamari makwavo. ³³We hosi n'wini wanga, u nga kali u yingisa mahungu-ndlela lama vulaka leswaku vana va wena hinkwavo wa dlayiwile, hikuva a hi ntiyiso; loyi a dlayiweke i Aminoni ntsena.”

³⁴Loko a ri Abixalomu, yena a a balekile. Nandza loyi a a ri eku rindzeni, a tlakusa mahlo, kutani a vona vanhu lavo tala lava a va ta hi ndlela ya Horonayimi,Van'wana va ri: ndlela ya Bahurimi va rhelela hi le tlhelo ka ntshava. [Kutani murindzi a ya tivisa hosi, a ku: “Ndzi vona vanhu va taka hi ndlela ya Horonayimi, va rhelela hi le tlhelo ka ntshava.”]Van'wana a va tsalanga marito lawa ³⁵Kutani Yonadabu a ku ka hosi: “Languta, vana va wena hosi va karhi va vuya, hilaha mina nandza wa wena ndzi vuleke hakona.” ³⁶Loko Yonadabu a ha ku heta ku vulavula, vana va hosi va fika, va tlhava mukhosi. Kavaloko hosi Davhida, ni malandza ya yena hinkwavo, na vona va tlhaveka va rila hi xiviti lexikulu.

³⁷