2 Samuweli 22

“Simakadze ulidvwala lami,

nenqaba yami, neMkhululi wami;

₃Nkulunkulu wami, ulidvwala lami

lengiphephela kulo.

Usihlangu sami sekungivikela

nemandla ensindziso yami.

Yena ungumgedze wami wekubhaca.

Usiphephelo sami neMsindzisi wami.

Etigebengwini, wena uyangisindzisa.

₄Ngikhala kuSimakadze,

bese uyangephula etitseni tami.

Akadvunyiswe Simakadze!

₅“Emagagasi ekufa angitungeleta;

tikhukhula tembhubhiso tangigabudzela.

₆Tintsambo telithuna tatingitsandzele,

tingibe tekufa tangintfonya.

₇Ngakhala kuSimakadze

ngisekudzangaleni kwami,

ngacela lusito kuNkulunkulu wami.

Waliva livi lami asendlini yakhe.

Kuncusa kwami, nekukhala kwami, nekuthandaza kwami

kwangena etindlebeni takhe.

₈“Umhlaba watfutfumela, watamatama,

tisekelo temazulu tatfutfumela, tatamatama,

ngobe Somandla abesatfukutsele.

₉Emakhala akhe akhafula intfutfu;

umlomo wakhe wakhephuta umlilo locotfulako,

kuwo kwakhehleka emalahle labovu.

₁₀Wabhobosa emazulu, wehlela phansi.

Emafu lamnyama abengaphansi kwetinyawo takhe.

₁₁Wagibela likherubhi wandiza;

wantjuza asetikwemaphiko emoya.

₁₂Wenta bumnyama baba yingubo yakhe,

watungeletwa ngemafu lahlomile, lamnyama.

₁₃Ebukhatikhatini bebukhona bakhe

kwaphambana imibane nemalahle lavutsako.

₁₄Simakadze wabhavumula asezulwini.

Losetikwako Konkhe walivakalisa livi lakhe.

₁₅Wajijimeta ngemicibisholo,

kwasakateka titsa.

Ngebumanyamanya bemibane

watidzidzitelisa tasiphuka.

₁₆Kujula kwetilwandle kwenekeka ebaleni,

tisekelo temhlaba tembuleka,

ngenca yekutsetsa kwaSimakadze,

nangenca yekufutsa kwemakhala akhe.

₁₇“Welula ingalo yakhe akulelisetulu,

wayehlisela phansi, wangibamba,

wangenyula ekujuleni kwemanti.

₁₈Wangephula esitseni sami lesinemandla,

wangephula nakulabangitondzako,

ngobe babenemandla kakhulu kunami.

₁₉Bangidvumela ngesikhatsi ngehlelwa sehlakalo;

kodvwa Simakadze waba sihlangu sami.

₂₀Wangikhiphela endzaweni lebanti;

wangephula, ngobe abejabula ngami.

₂₁“Simakadze wangiphatsa

njengekulunga kwami,

wangivuza njengebumsulwa betandla tami,

₂₂ngobe imiyalo yaSimakadze ngiyigcinile.

Angikenti lutfo lolubi,

angikamfulatseli Nkulunkulu wami.

₂₃Yonkhe imiyalo yaNkulunkulu isembikwami.

Angikagucuki etimisweni takhe.

₂₄Bengisolo ngite sici embikwakhe,

ngitigcinile ngangete ngona.

₂₅Ngako-ke Simakadze ungivuze

njengekulunga kwami,

wangivuza njengebumsulwa bami emehlweni akhe.

₂₆“Kulowetsembekile

wena utibonakalisa wetsembekile;

kulongenacala

wena utibonakalisa ucotfo.

₂₇Kulohlantekile

wena utibonakalisa uhlantekile,

kodvwa kulosigwegwe

wena utibonakalisa ulukhuni.

₂₈Uyabasindzisa labatfobekile,

kodvwa emehlo akho akulabatiphakamisako,

kuze ubatfobise.

₂₉Awu! Simakadze,

wena usibane sami,

Simakadze ugucula bumnyama bami

abente bube kukhanya.

₃₀Ngawe ngisengayidvungulula imphi.

NgaNkulunkulu wami

ngisengagalaja lubondza lwetitsa.

₃₁“Indlela yaNkulunkulu ilungile.

Livi laSimakadze letsembekile.

Yena usihlangu sabo bonkhe labaphephela kuye.

₃₂Kambe nje ngubani longuNkulunkulu

ngaphandle kwaSimakadze?

Ngubani lolidvwala

ngaphandle kwaNkulunkulu wetfu?

₃₃Nguye loNkulunkulu

longihlomisa ngemandla,

ente indlela yami icondze, ibe msulwa.

₃₄Wenta tinyawo tami

tibe lula njengetenyamatane,

angente ngiphephele ekuphakameni.

₃₅Yena wenta tandla tami

tifundzele kulwa,

kuze imikhono yami yetayele

kugoba butjoki belitfusi.

₃₆Ungihlomisa ngesihlangu sensindziso yakho;

utehlisa wena kuze uphakamise mine.

₃₇“Wentele tinyatselo tami indzawo lebanti,

kuze emacakala ami angabhinyiliki.

₃₈“Ngaticosha titsa tami, ngatifihlita,

angizange ngincandzeke, ngingakaticedzi.

₃₉Ngatiphahlata tonkhe ngaticedza.

Tatingeke tiphindze tivuke,

tawela ngaphansi kwetinyawo tami.

₄₀Wangihlomisa ngemandla ekulwa imphi.

Titsa tami watitfobisa ngaphansi kwami.

₄₁Titsa tami watidvungulula, tabaleka,

ngabacedza bonkhe labangitondzako.

₄₂Bakhala bacela lusito,

kodvwa kwabate lobasindzisako.

Bahlaba inyandzaleyo kuSimakadze,

kodvwa akazange abaphendvule.

₄₃Ngabagaya baba njengelutfuli,

baba njengelutfuli lwemhlaba.

Ngabagcobagcoba ngagidza etikwabo

njengeludzaka lwendlela.

₄₄“Wangisindzisa embangweni wesive sakitsi,

wangigcina ngaba yinhloko yetive.

Sive lengingazange sengisati sangikhotsama.

₄₅Betive beta kimi bakhasa,

batsi bangangiva, bangihloniphe masinyane.

₄₆Bonkhe baphelelwa ngemandla,

beta bachachatela,

baphuma emigedzeni yabo.

₄₇“Simakadze uyaphila!

Alidvunyiswe lidvwala lami!

Akaphakanyiswe Nkulunkulu,

Lidvwala lami, neMsindzisi wami!

₄₈UnguNkulunkulu

longiphindziselelako,

lobeka tive ngaphansi kwami.

₄₉Wangikhulula etitseni tami.

Wangiphakamisa ngaba ngetulu

kwalabo labemelene nami,

wangephula kubantfu belutfutfuva.

₅₀Ngako-ke ngiyawukudvumisa wena, Simakadze,

emkhatsini wetive,

ngikugambute ngetibongelelo teLibito lakho.

₅₁Nguwe, Nkhosi, umenti wankhulu,

inkhosi yakho uyiphe

kuncoba timphi ngetimphi,

wentele logcotjiwe wakho umusa wakho longapheli,

yebo, Davide netitukulwane takhe

phakadze naphakadze.”