2 Samuweli 10

₁Kwatsi emvakwaloko inkhosi yema-Amoni yakhotsama. Hanuni, umsa waNahashi, waba yinkhosi. ₂Davide wacabanga watsi: “Ngitakumentela bubele Hanuni, umsa waNahashi, njengobe neyise angentela bubele.” Ngako Davide watfumela titfunywa kutsi tiyewulilela Hanuni macondzana nekufa kweyise.

Tatsi letitfunywa taDavide natifika eveni lema-Amoni, ₃baholi bema-Amoni bakhuluma kuHanuni, inkhosi yabo, batsi: “Ucabanga kutsi Davide uhlonipha uyihlo ngalokutfumela emadvodza akakhe lapha kuwe kutsi atekulilela? Utsi Davide akatfumeli lamadvodza kuwe kutsi atewuhlamahlama lelidolobha, alihlole, bese ayalibhubhisa?” ₄Ngako Hanuni wawabamba lamadvodza akaDavide, wawahhula, nguleyo naleyo incenye yesilevu sayo, wahhumbula netembatfo tawo macondzana netibunu tawo, wase uyawayekela, ahamba.

₅Kwatsi kube Davide atjelwe ngaloko, wakhipha tigijimi kutsi tiwahlangabete lamadvodza, ngobe abesahlaziseke kakhulu. Inkhosi yatsi: “Hlalani eJerikho, tize tihlume kahle tilevu tenu, bese niyabuya-ke.”

₆Ema-Amoni atsi kube abone kutsi asatente aba liphunga lelibi kuDavide, ase acasha emasotja emaSiriya lati-20 000, ashuca ngetinyawo esuka eBhethi Rehobu, naseSobha; nasenkhosini yaseMakha kwaphuma emadvodza layinkhulungwane, naseThobu kwaphuma emadvodza lati-12 000.

₇Watsi kube akuve loko Davide, watfumela Jowabe, wamkhipha nalo lonkhe libutfo lemphi yetingwazi. ₈Ema-Amoni ashuca aphumela ngephandle, atihlela ekungeneni kwelidolobha. Laba labanye, emaSiriya aseSobha newaseRehobu kanye nemadvodza aseThobu newaseMakha wona atihlela ngephandle esigangeni.

₉Jowabe wabona kutsi emabutfo etitsa atamhlasela ngembili nangemuva, wase ukhetsa bokadzebona betingwazi cobo lwato temabutfo ema-Israyeli, watimisa tabhekana nemaSiriya. ₁₀Kwatsi lawa lasele emabutfo wawabeka esandleni semnakabo, Abishayi, lowawahlela nawo abhekana nema-Amoni. ₁₁Jowabe watjela Abishayi watsi: “Nawubona kutsi emaSiriya ayangehlula, ubobe sewuyeta utangelekelela, nami nangibona kutsi ema-Amoni ayakwehlula, ngitakuta ngitekwelekelela. ₁₂Cina, ube nesibindzi! Asilwe ngesibindzi silwele sive sakitsi nemadolobha aNkulunkulu wetfu. Simakadze utakwenta loko lokuhle emehlweni akhe.”

₁₃Jowabe nelibutfo lakakhe bashuca bahlasela emaSiriya. EmaSiriya ehlulwa, abaleka. ₁₄Ema-Amoni nawo atsi kube abone kutsi emaSiriya ayabaleka, nawo esuka ngematubane abalekela Abishayi, angena edolobheni. Ngako Jowabe wabuya ekuhlaseleni ema-Amoni, wabuyela ekhaya eJerusalema.

₁₅EmaSiriya atsi kube abone kutsi ehlulwe ngema-Israyeli, ahlanganisa onkhe emabutfo awo ndzawonye. ₁₆Inkhosi Hadadezeri walandza nemaSiriya labengasemphumalanga kwemfula iYufrathe, beta nabo eHelamu, baholwa nguShobaki, indvuna yemphi yenkhosi Hadadezeri waseSobha.

₁₇Davide watsi kube akuve loko, naye wabutsa onkhe emabutfo ema-Israyeli, wewela umfula iJordane wabanga eHelamu. EmaSiriya nawo aklamela abhekana naye. Imphi yabambana etulu. ₁₈Kodvwa emaSiriya abaleka embikwema-Israyeli, Davide wabulala bagibeli betincola temphi lababengema-700, nemasotja labeti-40 000, labeshuca ngetinyawo. Wachubeka wagadla nakuShobaki, indvuna yabo yemphi, wafa khona lapho. ₁₉Lawa lamanye emakhosi labengaphansi kwaHadadezeri, atsi kube abone kutsi asehlulwe ngema-Israyeli, ase enta sivumelwane sekuthula nema-Israyeli, ase aba ngaphansi kwawo.

Ngako emaSiriya esaba kuphindze asite ema-Amoni.