2 Emakhosi 25

₁Kwatsi ngemnyaka wemfica wekubusa kwenkhosi Sedekiya ngelilanga lelishumi, enyangeni yelishumi, Nebukhadnezari, inkhosi yaseBhabhulona, washuca nemabutfo akhe onkhe, wahlasela iJerusalema. Bemisa ngephandle kwelidolobha, bakha tivimbetelo letalitungeleta lonkhe. ₂Lelidolobha lahlala livinjetelwe, kwaze kwaba ngumnyaka weli-11 wekubusa kwenkhosi Sedekiya. ₃Kwatsi ngelilanga lemfica enyangeni yesine, indlala yakhungatsa lelidolobha kamatima, kangangekutsi kwaze kwabate lokwakungadliwa bantfu. ₄Lubondza-ke lwalelidolobha lwase luyafohlwa, imphi yonkhe yabhuza ebusuku seyibaleka, yaphuma ngelisango lelisemkhatsini wetibondza letimbili letatingasengadzeni yenkhosi, lite nome emaBhabhulona abelitungeletile lelidolobha. Yabaleka yabhekisa emabombo ngase-Arabha, ₅kodvwa emabutfo emaBhabhulona acosha Sedekiya, inkhosi, aze amkhandza etsafeni laseJerikho. Onkhe emasotja akhe esuswa kuye asakatwa, ₆yena wabe sewuyatfunjwa. Watsatfwa wamikiswa enkhosini yaseBhabhulona eRibla, lapho yefike yakhipha sigwebo sayo kuye. ₇Emadvodzana aSedekiya abulawa embikwemehlo akhe abukile. Emvakwaloko bakupuluta emehlo aSedekiya, bambopha ngetinketane telitfusi, bammikisa eBhabhulona.

₈Ngelilanga lesikhombisa enyangeni yesihlanu, emnyakeni weli-19 wekubusa kwaNebukhadnezari, inkhosi yaseBhabhulona, Nebuzaradani, indvuna yabomahlalesangweni benkhosi, siphatsimandla senkhosi yaseBhabhulona, weta eJerusalema. ₉Wafike wokhela ngemlilo lithempeli laSimakadze, nesigodlo senkhosi kanye nato tonkhe tindlu taseJerusalema. Watokhela ngemlilo tonkhe tindlu letibalulekile. ₁₀Yonkhe-ke imphi yaseBhabhulona, leyayingaphansi kwendvuna yabomahlalesangweni, yatidzilita tonkhe tibondza letatitungeleta iJerusalema. ₁₁Nebuzaradani, indvuna yabomahlalesangweni, wabatfumba bonkhe labantfu lababesele kulelidolobha neluntfu lonkhe lolwalusele, wabatfumba kanye nalaba lababehlubuke baya enkhosini yaseBhabhulona. ₁₂Kodvwa lendvuna yabashiya labanye lababemphofu bakulelo live, kuze batewulima tivini nemasimi.

₁₃EmaBhabhulona afohlota letinsika telitfusi, netincodlana kanye nalelibhavu lelitfusi, lokwakusethempelini laSimakadze, betfwala lelitfusi baliyisa eBhabhulona. ₁₄Batsatsa ngisho nemabhodo, nemafosholo, netijubantsambo, netingwembe, kanye nako konkhe lokwakwentiwe ngelitfusi lokwakusetjentiswa enkonzweni yekukhonta ethempelini. ₁₅Lendvuna yabomahlalesangweni yatsatsa titja tekushisela imphepho kanye netitja tekunyenyeta, tonkhe letatentiwe ngegolide lecengekile nome ngesiliva lecengekile.

₁₆Litfusi letinsika letimbili, nalelibhavu kanye naletincodlana letatakhiwe nguSolomoni, akwakhela lithempeli laSimakadze, kwakungetulu kwekukalwa. ₁₇Nguleyo naleyo nsika yayingemamitha labengaba siphohlongo kuphakama. Nguleyo naleyo ngcongwane leyayakhelwe etikwaleyo naleyo nsika yayingaba limitha nesigamu kuphakama. Kutungeleta leyo naleyo ngcongwane kwakunemhlobiso lowawusamahananadza labentiwe ngelitfusi.

₁₈Lendvuna yabomahlalesangweni yatfumba Seraya, umPhristi Lomkhulu, naZefaniya, umphristi longaphansi kwakhe ngesikhundla, kanye nebagcini beminyango labatsatfu. ₁₉Kulabo lababesesedolobheni watsatsa indvuna leyayiphetse emadvodza emphi kanye nebeluleki benkhosi labasihlanu. Watsatsa namabhalane wendvuna yekubutsekisa bantfu balelo live, kanye nemadvodza langema-60 labetfolakala edolobheni. ₂₀Nebuzaradani, indvuna yabomahlalesangweni, wabatsatsa bonkhe, wayawubetfula enkhosini yaseBhabhulona eRibla. ₂₁Lapha eRibla, eveni laseHamathi, inkhosi yafike yababulalela khona.

Ngako-ke sive sakaJuda satfunjelwa khashane nelive laso.

₂₂Nebukhadnezari, inkhosi yaseBhabhulona, yabeka Gedaliya, umsa wa-Ahikamu, umsa waShafani, kutsi abuse bonkhe labantfu lababesele kaJuda. ₂₃Tatsi kube tonkhe tindvuna temphi nemabutfo ato beve kutsi inkhosi yaseBhabhulona seyibeke Gedaliya kutsi abe ngumbusi, teta kuGedaliya eMispa. Letindvuna bekubo-Ishmayeli, umsa waNethaniya, naJohanani, umsa waKhareya, naSeraya, umsa waThanhumethi waseNethofa, naJazaniya, indvodzana yemMakha, nemadvodza abo. ₂₄Gedaliya wafunga kubo nakulamadvodza abo, watsi: “Ningatesabi tindvuna taseBhabhulona. Hlalani phansi lapha eveni, nikhonte lenkhosi yaseBhabhulona, kutawunihambela kahle.”

₂₅Ngenyanga yesikhombisa, Ishmayeli, umsa waNethaniya, umsa wa-Elishama, labewendlu yasebukhosini, weta nemadvodza lalishumi, wafike wabulala Gedaliya kanye nalamadvodza akaJuda nemaBhabhulona labenaye lapha eMispa. ₂₆Kwatsi kube kwenteke loko, sonkhe sive, kusukela kulabancane kuye kulabakhulu, kanye netindvuna temphi babalekela eGibhithe ngenca yekwesaba emaBhabhulona.

₂₇Ngemnyaka wema-37 wekudzingiswa kwaJehoyakhini, inkhosi yakaJuda, ngemnyaka lapho Evili Merodaki abekwa khona waba yinkhosi yaseBhabhulona, wakhulula Jehoyakhini ejele, mhla tingema-27, enyangeni yeli-12. ₂₈Wakhuluma kahle naye, wabe sewumnika sihlalo lesihloniphekile, lesingetulu kwaleto talamanye emakhosi labenaye lapha eBhabhulona. ₂₉Ngako Jehoyakhini wabeka eceleni labomfengeni bakhe basejele, kusukela ngalelo langa naye abedla etafuleni lenkhosi njalo nje, imphilo yakhe yonkhe. ₃₀Onkhe emalanga inkhosi yayinika Jehoyakhini imbasha nalokunye lekwakusabelo sakhe lesimile semihla ngemihla, yingci nasaphila.