2 Emakhosi 21

₁Manase abeneminyaka leli-12 budzala, nakabekwa kuba yinkhosi. Wabusela eJerusalema iminyaka lengema-55. Libito lenina bekunguHefsiba. ₂Manase wenta lokubi emehlweni aSimakadze, alandzela leto tintfo letatisinengiso letatentiwa nguleto tive Simakadze latidvungulula ngesikhatsi nakufika sive sema-Israyeli. ₃Wavusa kabusha tindzawo letiphakeme tekukhontela tithico, letatibhidlitwe nguyise Hezekiya. Waphindze wakha emalati aBhali, wakha nensika ya-Ashera, njengobe na-Ahabi, inkhosi yaka-Israyeli, abentile. Wakhotsama wakhonta tonkhe tinkhanyeti tesibhakabhaka. ₄Wakha emalati ekhatsi ethempelini laSimakadze, Simakadze labekhulume ngalo watsi: “Libito lami ngiyakulibeka eJerusalema.” ₅Kuto totimbili tibuya telithempeli laSimakadze wakha emalati ekukhonta tinkhanyeti. ₆Wanikela ngendvodzana yakhe kutsi ishiswe ngemlilo, wangenela bungoma nemilingo, wabuye watihlanganisa nalabanemadloti kanye nalabaphengulako. Wenta lokubi kakhulu emehlweni aSimakadze, wamtfukutselisa.

₇Watsatsa insika ya-Ashera labeyentile wayibeka ethempelini, lelo Simakadze labekhulume ngalo kuDavide nakuSolomoni, umsa wakhe, watsi: “Kulelithempeli naseJerusalema lengiyikhetse emkhatsini wato tonkhe tive tema-Israyeli, ngitawubeka Libito lami kuyo phakadze naphakadze. ₈Ngingeke ngiphindze ngente tinyawo tema-Israyeli tibe solomane tizulazula tisuke kulelive lengalipha bokhokho bawo, kuphela nje nangabe bangacaphela kutsi bente konkhe loko lengabayala ngako kutsi bakwente nekutsi bagcine wonkhe umtsetfo lengawunika Mosi, inceku yami.” ₉Kodvwa bantfu abazange balalele. Manase wabedukisa, ngako benta lokubi kakhulu kwendlula letive letabhujiswa nguSimakadze, ngesikhatsi nakufika ema-Israyeli.

₁₀Simakadze wakhuluma ngetinceku takhe, baphrofethi, watsi: ₁₁“Manase, inkhosi yakaJuda, wente letono letisinengiso. Wente lokubi kakhulu kwendlula ema-Amori labekhona ngaphambi kwakhe, sewuze wahola bakaJuda wayawubafaka esonweni sekukhonta tithico. ₁₂Ngako-ke naku lokushiwo nguSimakadze Nkulunkulu wema-Israyeli, utsi: ‘Ngitakwehlisela inhlekelele eJerusalema nakaJuda, kangangekutsi tindlebe talowo loyawuva ngayo tiyawuncencetsa. ₁₃IJerusalema ngiyayijezisa njengeSamariya nanjengobe ngajezisa Ahabi, inkhosi yaka-Israyeli. Ngitabashanyela bonkhe bantfu baseJerusalema, sincane sendishi lekususwe kuyo konkhe bekungekhatsi, yase ibhekiswa phansi. ₁₄Insali yelifa lami ngitayifulatsela, ngiyetfule etitseni tayo. Insali itawuphangwa ichwagwe ngito tonkhe titsa tayo, ₁₅ngobe yente lokubi emehlweni ami yangitfukutselisa, ngatfukutsela kusukela mhlazana bokhokho bayo baphuma eGibhithe kuze kube ngulamuhla.’ ”

₁₆Ngetulu kwaloko, Manase wacitsa kakhulu ingati yalabangenacala, kangangekutsi titaladi taseJerusalema tatigeleta ingati kusukela ekucaleni kuze kuyewuphuma ekugcineni. Loko wakwengetela ekwenteni sive sakaJuda kutsi sikhonte tithico, wasenta sona kuSimakadze.

₁₇Leminye imininingwane ngekubusa kwaManase, nako konkhe lakwenta, netono latenta, kubhaliwe encwadzini yemilandvo yemakhosi akaJuda. ₁₈Manase wase uyakhotsama, wafihlwa ensimini yesigodlo lekwakutsiwa yinsimi ya-Uza. Amoni, umsa wakhe, waba yinkhosi esikhundleni sakhe.

₁₉Amoni abeneminyaka lengema-22 budzala, nakabekwa kuba yinkhosi. Wabusela eJerusalema iminyaka lemibili. Libito lenina bekunguMeshulemethi, indvodzakati yaHarusi, waseJotbha. ₂₀Amoni wenta lokubi emehlweni aSimakadze, walingisa uyise Manase. ₂₁Wahamba kuto tonkhe tindlela teyise; wakhonta wakhotsamela letithico, njengobe kwenta uyise. ₂₂Walahla Simakadze, Nkulunkulu waboyise, wangete wahamba endleleni yaSimakadze.

₂₃Tiphatsimandla ta-Amoni, tamakhela luzungu tamenta silo sengubo tambulalela endlunkhulu yakhe. ₂₄Kodvwa sonkhe sive salelo live sabulala bonkhe labo bebente luzungu lwekubulala Amoni, inkhosi. Sabeka Josaya, umsa wakhe, kutsi abe yinkhosi esikhundleni sakhe.

₂₅Leminye imininingwane ngekubusa kwa-Amoni, nako konkhe lakwenta, kubhaliwe encwadzini yemilandvo yemakhosi akaJuda. ₂₆Wafihlwa ethuneni lakhe, ensimini ya-Uza. Josaya, umsa wakhe, waba yinkhosi esikhundleni sakhe.