Kwenyuselwa ezulwini kwa-Elija
1Watsi Simakadze nasatawutsatsa Elija amenyusele ezulwini ngesiwunguwungwana, bo-Elija na-Elisha babesendleleni lephuma eGilgali. 2Elija wakhuluma ku-Elisha, watsi: “Sala lapha; Simakadze usangitfumele eBetheli.”
Kodvwa Elisha waphendvula, watsi: “Ngifunga ngekuphila kwaSimakadze nangekwakho, ngitsi ngingeke ngikushiye.” Ngako bavele bewuka baya eBetheli.
3Sicumbi sebaphrofethi lesasihlala eBetheli seta ku-Elisha, safike sambuta satsi: “Uyati yini kutsi Simakadze utayitsatsa lenkhosi yakho lamuhla?”
Elisha wabaphendvula, watsi: “Yebo, ngiyati; kodvwa yekelani kukhuluma ngalendzaba.”
4Elija wakhuluma ku-Elisha, watsi: “Elisha, ngicela kutsi usale lapha; Simakadze usangitfume lapha eJerikho.”
Elisha wamphendvula, watsi: “Ngifunga ngekuphila kwaSimakadze nangekwakho, ngitsi ngingeke ngikushiye.” Ngako bahambisana bobabili baya eJerikho.
5Emadvodza labaphrofethi baseJerikho enyuka aya ku-Elisha, afike ambuta atsi: “Uyati yini kutsi Simakadze utayitsatsa lenkhosi yakho lamuhla?”
Elisha wabaphendvula, watsi: “Yebo, ngiyati; kodvwa yekelani kukhuluma ngalendzaba.”
6Elija wakhuluma ku-Elisha, watsi: “Ngicela usale lapha; Simakadze usangitfume eJordane.”
Elisha wamphendvula, watsi: “Ngifunga ngekuphila kwaSimakadze nangekwakho, ngitsi ngingeke ngikushiye.” Ngako bahambisana bobabili.
7Labanye baphrofethi lababengema-50 nabo bahamba bafike bemela bucamama, kubhekana nalendzawo lapho bekume khona bo-Elija na-Elisha ngaseJordane. 8Elija watsatsa sembatfo sakhe wasigocota, wabe sewushaya ngaso lamanti. Emanti ehlukana ekhatsi, aya ngesekudla nangesancele, lamadvodza lamabili ewela ahamba emhlabatsini lowomile.
9Batsi kube bewele, Elija wakhuluma ku-Elisha, watsi: “Ase ungitjele, ufuna ngikwenteleni ngisengakasuswa kuwe?”
Elisha waphendvula, watsi: “Ngicela kutsi ungiphe sabelo sebundlalifa semoya wakho sesiphindvwe kabili.”
10Elija watsi: “Ucele intfo lelukhuni; noko nawutangibona sengitsatfwa kuwe, kutakuya njengesicelo sakho; kodvwa nawungangiboni, kungeke kube njalo.”
11Batsi basahamba bakhulumisana bobabili, masinyane kwachamuka incola yemlilo idvonswa ngemahhashi emlilo, yabehlukanisa ekhatsi, Elija wenyuka ngesiwunguwungwana wayawushona ezulwini. 12Elisha wakubona loko wakhala, amemeta, watsi: “Babe wami! Babe wami! Incola yaka-Israyeli nebagibeli bakhe bemahhashi!” Elisha akazange aphindze ambone futsi.
Ngenca yekudzabuka kwakhe Elisha watsatsa lesembatfo sakhe wasidzabula, saba ticephu letimbili.
13Watsatsa lengubo leyayidzilike ku-Elija, wancandzeka nayo, wafike wema elusentseni lwemfula iJordane. 14Wabe sewushaya lamanti emfula ngalengubo. Wabuta watsi: “Uphi-ke loSimakadze, Nkulunkulu wa-Elija?” Watsi kube awashaye lamanti, ehlukana ekhatsi, aya ngesekudla nangesancele, wabe sewuyewela.
15Lesicumbi sebaphrofethi lesasiphuma eJerikho, sibukela, satsi: “Lomoya wa-Elija sewusetikwa-Elisha.” Bahamba bayakumhlangabeta, bafike bawa phansi embikwakhe bamkhotsamela, 16bakhuluma batsi: “Buka la; tsine, tinceku takho, sinemadvodza langema-50 lanelikhono. Kungaba njani asahambe ayewufuna inkhosi yakho, mhlawumbe Moya waSimakadze uyihlwitsile, wayibeka entsabeni letsite nome esihosheni lesitsite.”
Elisha wabaphendvula watsi: “Cha, ningawatfumeli.”
17Kodvwa achubeka amncenga, waze waba nemahloni kubalela. Ngako wabe sewutsi kubo: “Kulungile, batfumeleni.” Batfumela emadvodza langema-50, lahamba ayakumfuna emalanga lamatsatfu, kodvwa akazange amtfole. 18Atsi nakancandzeka abuyela ku-Elisha, labehlala eJerikho, watsi kuwo: “Angitsi nginitjelile kutsi ningayi?”
Kuphiliswa kwemanti
19Emadvodza alelo dolobha akhuluma ku-Elisha atsi: “Ase ubuke lapha, nkhosi, lelidolobha lisendzaweni lekahle, njengobe ubona nje, kodvwa emanti alo mabi, kantsi futsi nemasimi alo asaphuphile.”
20Wawaphendvula watsi: “Ngiletseleni sitja lesisha, bese nifaka luswayi ekhatsi kuso.” Ngako babe sebakuletsa kuye loko.
21Wahamba waya kulomtfombo, wafike wafaka loluswayi ekhatsi, watsi: “Naku-ke lokukhulunywa nguSimakadze, utsi: ‘Lamanti sengiwaphilisile. Angeke aphindze futsi ente kufa nome ente lelive liphuphe.’ ” 22Lamanti kuze kube ngulamuhla seloku elapheka, kwaya njengenkhulumo leyakhulunywa ngu-Elisha.
Kuphukutwa kwa-Elisha
23Elisha wesuka lapho waya eBetheli. Watsi asahamba ngemgwaco, bafana baphuma kulelidolobha bamphukuta bamhheletela, bamemeta batsi: “Yenyuka wena mphandla-ndzini! Yenyuka wena mphandla-ndzini!”
24Wagucuka wababuka; wamemeta, abacalekisa ngelibito laSimakadze. Kwabe sekuchamuka emabhele lamabili aphuma ehlatsini, adladlabula lababengema-42 balabo bafana.
25Elisha wachubeka waya eNtsabeni iKhameli; wesuka lapho wancandzeka wabuyela eSamariya.
