Inkhosi Hezekiya icela seluleko sa-Isaya
1Hezekiya, inkhosi, watsi kube akuve loko, wadzabula tingubo takhe wembatsa emasaka, wahamba wangena ethempelini laSimakadze. 2Watfumela bo-Eliyakimu, indvuna yasesigodlweni, naShebna, labengumabhalane, kanye nebaholi bebaphristi, bonkhe bagcoke emasaka baya kumphrofethi Isaya, umsa wa-Amose. 3Bamtjela batsi: “Naku lokushiwo nguHezekiya, utsi: ‘Lelilanga lalamuhla lilanga lenjabhiso, nekutsetsiswa nelihlazo, njenganakufika tikhatsi tekubelekwa kwebantfwana kube kute emandla ekubabeleka. 4Kungenteka kube Simakadze Nkulunkulu wakho utaweva onkhe emavi endvuna lenkhulu yemphi, letfunywe ngumphatsi wayo, inkhosi yase-Asiriya, kutsi itewuhlazisa Nkulunkulu lophilako, nekutsi yena utayitsetsisela emavi Simakadze Nkulunkulu wakho lawevile. Ngako-ke thandazela lensali lesolomane isasele.’ ”
5Tatsi letindvuna takaHezekiya natifika ku-Isaya, 6Isaya wakhuluma kuto, watsi: “Tjelani inkhosi yenu nitsi: ‘Naku lokushiwo nguSimakadze, utsi: Ningesatjiswa nguloko lenikuvile, lawo mavi ledzelelako etinceku tenkhosi yase-Asiriya letingihlambalate ngawo. 7Lalelani! Ngitawufaka kuye umoya lotamenta kutsi atsi nakeva umbiko lotsite, ancandzeke abuyele eveni lakhe, ngulapho-ke ngiyawumenta afele khona ngenkemba.’ ”
Ema-Asiriya aphindza asongela Hezekiya
8Lendvuna lenkhulu yemphi yatsi kube ive kutsi inkhosi yase-Asiriya ayisekho eLakhishi, yase iyancandzeka nayo, yakhandza inkhosi ibambene etulu neLibna.
9Senaheribi watfola umbiko wekutsi Thihakha, inkhosi yaseKushe, nayo iyashuca itewuhlasela yena. Ngako waphindze watfumela tigijimi kuHezekiya nelivi lelitsi: 10“Tjelani Hezekiya, inkhosi yakaJuda, nitsi: ‘Ungayengwa ngulonkulunkulu wakho lometsembako nakatsi: “IJerusalema ngeke inikelwe etandleni tenkhosi yase-Asiriya.” 11Angitsi sewuvile kutsi entani emakhosi ase-Asiriya kuwo onkhe lamanye emave, acotfule imbokodvo nesisekelo kuwo. Wena-ke ungaphepha kanjani? 12Labonkulunkulu betive letabhujiswa bobabemkhulu, batikhulula yini letive tabo, bonkulunkulu baseGozani, nebaseHarani, nebaseResefu kanye nebebantfu base-Edeni lababeseThelasari? 13Iphi inkhosi yaseHamathi, nenkhosi yase-Aphadi, nenkhosi yelidolobha laseSefavayimu, neyaseHena, neyase-Ava?’ ”
Umkhuleko waHezekiya
14Hezekiya watsatsa lencwadzi kuletigijimi wayifundza, wase ukhuphukela nayo ethempelini laSimakadze, wafike wayendlala embikwaSimakadze. 15Hezekiya wase uyathandaza kuSimakadze, watsi:
“Awu, Simakadze, Nkulunkulu wesive sema-Israyeli, wena lohleli emkhatsini wemakherubhi, wena wedvwa unguNkulunkulu etikwayo yonkhe imibuso yemhlaba. Wena wadala lizulu nemhlaba. 16Vula indlebe yakho! Awu, Simakadze, vani; uvule emehlo akho, Simakadze, ubone; lalela emavi latfunyelwe nguSenaheribi ekwetfuka wena, Nkulunkulu lophilako.
17“Kuliciniso kona, Simakadze, kutsi emakhosi ase-Asiriya atibhubhisile letive kanye nemave ato. 18Bajikijele bonkulunkulu bato emlilweni, bababhubhisa, ngobe bebangesibo bonkulunkulu sibili, bekutigodvo nje nematje labatwe tandla tebantfu. 19Manje-ke, Simakadze Nkulunkulu wetfu, sephule esandleni sakhe, kuze yonkhe imibuso yemhlaba yati kutsi wena wedvwa, Simakadze, unguNkulunkulu.”
Umlayeto wa-Isaya kuHezekiya
20Isaya, umsa wa-Amose, wase utfumela livi kuHezekiya, atsi: “Naku lokushiwo nguSimakadze Nkulunkulu wema-Israyeli, utsi: ‘Ngiwuvile umkhuleko wakho macondzana naSenaheribi, inkhosi yase-Asiriya.’ 21Nali-ke livi lelikhulunywe nguSimakadze lelimelene naye, litsi:
“ ‘Indvodzakati yaseSiyoni iyakwedzelela,
ikubukela phansi.
Indvodzakati yaseJerusalema igencetisa
inhloko yayo, nawubaleka.
22Ngubani lona lometfukile wamhlambalata?
Ngubani lona bewumbhodlela umetfwalela emehlo?
NguLongcwele waka-Israyeli!
23Ngetigijimi takho umpongise tindvundvuma
tetinhlamba kuSimakadze, futsi watsi:
“Ngetincola tami temphi letinyenti
ngigibele ticongo tetintsaba,
ticongo letiphakeme kakhulu taseLebanoni.
Ngijube imisedari yakhona lemidze kakhulu,
kanye netipheshula telikhetselo.
Ngifinyelele kuletikhashane tindzawo takhona,
emahlatsi akhona elikhetselo.
24Ngimbe imitfombo emaveni etive,
nganatsa nemanti ayo khona lapho.
Ngetitsendze tetinyawo tami
ngomise yonkhe imifula yaseGibhithe.”
25“ ‘Awuzange uve yini?
Ngakumisa kadzeni.
Ngakuhlela ngemalanga asendvulo,
manje sesikhatsi sekutsi kwenteke,
kutsi ugucule emadolobha latinqaba,
uwente tindvundvuma tematje.
26Bantfu bawo baphelelwe ngemandla,
badzangele, batselwa ngelihlazo.
Bafanana netihlahla tesiganga,
banjengemidvumba leluhlata yemahlumela,
emahlumela etjani lobusungula etikwetindlu,
base bubhadliswa lilanga busamila.
27“ ‘Kodvwa ngiyati kutsi uhlalaphi,
ngikwati nawungena nome uphuma,
nekutsi ungibhodlela kanjani.
28Njengobe uyangibhodlela,
nekungicoloshela kwakho
sekufikile etindlebeni tami,
ngitawufaka umkhala wami ekhaleni lakho
nelitomu lami emlonyeni wakho.
Ngiyawukuncandzekisa ngaleyo ndlela lote ngayo.’
29“Loku-ke kuyawuba sibonakaliso kuwe, Hezekiya:
“Kulomnyaka uyawudla loko lokutimilele,
ngemnyaka wesibili udle emahlumela ako.
Kodvwa ngemnyaka wesitsatfu
uyawuhlanyela uvune.
Uyawuhlanyela tivini ubuye udle emagelebisi ato.
30Insali yendlu yakaJuda iyawuphindza futsi
ifake timphandze tayo phansi,
ngetulu itsele titselo tayo.
31Ngobe eJerusalema kuyawuvela insali.
ESiyoni kuyawuvela libutfo lalabasindze ekufeni.
Kushisekela kwaSimakadze longuSomandla
kuyawukuphelelisa loko.
32“Ngako-ke naku lokushiwo nguSimakadze macondzana nenkhosi yase-Asiriya:
“Ngeke ingene kulelidolobha
nome icibishele imicibisholo kulo.
Ngeke ime embikwalo ngelihawu,
futsi ngeke yente lutfo lwekulivimbetela.
33Iyawuncandzeka ngaleyo ndlela lete ngayo.
Ngeke ingene kulelidolobha,” kusho Simakadze.
34“Ngitalivikela lelidolobha ngilisindzise,
ngenca yami nangenca yenceku yami Davide.”
35Ngalobo busuku ingilosi yaSimakadze yaphuma yabhubhisa emadvodza lati-185 000, labesenkambu yema-Asiriya. Batsi bantfu nabavuka ekuseni ngakusasa, bakhangwa lucaca lwetidvumbu! 36Ngako Senaheribi, inkhosi yase-Asiriya, wadzilita inkambu yakhe, wahamba wabuyela eNineve, wayawuhlala khona.
37Kwatsi ngalelinye lilanga aselibele kukhonta ethempelini lankulunkulu wakhe, Nisroki, kwesuka emadvodzana akhe, bo-Adrameleki naShareseri, bamjuba ngenkemba, besuka lapho babalekela eveni lase-Ararathi. Esahadoni, umsa wakhe, waba yinkhosi yase-Asiriya esikhundleni sakhe.
