1 Samuweli 25

₁Samuweli wafa, kwatsi sonkhe sive sema-Israyeli seta, sahlangana ndzawonye, satakumlilela. Wangcwatjwa ekhaya lakhe, eRama.

Davide wase uyehla waya eHlane laseMayoni. ₂Bekukhona indvodza leyayicebile eMayoni, yayinetimphahla khona lapho eKhameli. Yayinetimbuti letatiyinkhulungwane netimvu letati-3 000 leyayitifuyele eKhameli, lapho yayitihhulela khona. ₃Libito layo lendvodza bekunguNabali, kantsi umkayo bekungu-Abigayili. Lomkakhe abehlakaniphile amuhle, kodvwa lendvodza yayingumKhalebi losibheva lesibi.

₄Watsi Davide asesehlane, weva kutsi Nabali uhhula timvu takhe, ₅wase utfuma emajaha lalishumi, wakhuluma kuwo watsi: “Yenyukani niye kuNabali eKhameli, nifike nimbingelele egameni lami. ₆Nikhulume kuye nitsi: ‘Lunwele loludze kuwe! Ngikufisela imphilo lenhle wena nemndeni wakho, nako konkhe kwakho!

₇“ ‘Ngiva kutsi manje sesikhatsi sekuhhula timvu. Ngesikhatsi belusi bakho banatsi, asizange sibaphatse kabi; nangaso sonkhe sikhatsi baseseKhameli kute nome kunye lokwase kwabalahlekela. ₈Buta kuleto tinceku takho, titakutjela. Ngako-ke ngicela uwaphatse kahle lawo majaha ami, ngobe sesifike ngesikhatsi selidzili. Ngicela uphe tinceku takho kanye nendvodzana yakho Davide, loko longahle ubaphe kona.’ ”

₉Lamajaha afike ayetfula kuNabali yonkhe lenkhulumo yaDavide. Abe asayahlalahlala khona lapho.

₁₀Nabali waphendvula letinceku taDavide, watsi: “Ngubani yena loDavide? Ngubani yena lomsa waJese? Tigcili letinyenti tibalekela baphatsi bato kulamalanga. ₁₁Ngingasitsatselani sinkhwa sami, nemanti ami kanye nenyama lengiyihlabele bahhuli betimvu bami, ngikuphe emadvodza lengingawati nekutsi aphumaphi?”

₁₂Lamajaha akaDavide ancandzeka abuyela emuva. Atsi kube efike, abika konkhe lokwakukhulunywe nguNabali. ₁₃Davide wakhuluma kulamadvodza, watsi: “Hlomani tinkemba tenu!” Ngako lamadvodza avele ahloma, naDavide naye wahloma ngeyakakhe. Bekungemadvodza labengaba ngema-400 lenyuka naDavide, kwatsi lawa langema-200 wona asala agadza timphahla.

₁₄Lenye yetinceku yatjela Abigayili, umkaNabali, yatsi: “Ngesikhatsi Davide asehlane utfumele titfunywa kutsi tiletse umkhontiso kumnumzane lapha ekhaya, kodvwa yena usuke watitsela ngenhlamba. ₁₅Noko lamadvodza abesiphetse kahle. Akazange asihluphe, kuso sonkhe leso sikhatsi sisedvute nawo etsafeni, kute lokwase kwasilahlekela. ₁₆Ebusuku nasemini aba lutsango lwetfu lolwalusitungeletile, ngaso sonkhe sikhatsi siseluse timvu tetfu edvute nawo. ₁₇Ase ucabange, ubone kutsi ungahle wenteni, ngobe umnumzane wetfu lona kanye nemndeni wakhe wonkhe ulengela engotini lenkhulu. Unenkhani kangangobe kute lamlalelako, nakhuluma naye.”

₁₈Abigayili akacitsanga sikhatsi. Watsatsa tinkhwa letatingema-200 netikhumbasikhwama letimbili tigcwele liwayini, netimvu letisihlanu lesetihlinziwe, nembasha yemmbila lengemakhilogremu labengaba li-17, nemacebelengwane lalikhulu emagelebisi lomisiwe, nemacebelengwane langema-200 emakhiwa lahlutiwe, wakwekhweta etimbongolweni. ₁₉Wabe sewutjela tinceku takhe watsi: “Hambani embili; mine ngitanilandzela ngemuva.” Kodvwa akazange ayitjele indvodza yakhe, Nabali.

₂₀Watsi aseta agibele imbongolo yakhe acondze esihosheni sentsaba, wabona Davide nemadvodza akakhe behla, bacondze kuye, wahlangabetana nabo. ₂₁Davide abesacedza kutsi: “Akukasiti ngalutfo kugadzela lomuntfu timvu takhe lena ehlane kangangekutsi kwabate ngisho nakunye lokwalahleka. Ungibuyisele lokubi ngalokuhle. ₂₂Shangatsi Simakadze angangibulala, nangingakababulali bonkhe labadvuna kusengakasi lamuhla nje!”

₂₃Watsi kube Abigayili abone Davide, washesha wehla embongolweni yakhe, wakhotsama embikwaDavide abhekise buso bakhe phansi. ₂₄Watijika etinyaweni takhe, watsi: “Nkhosi yami, licala alibe setikwami. Ngicela mane uvumele incekukati yakho kutsi seyimane ikhulume; ulalele kutsi incekukati yakho itawutsini. ₂₅Shangatsi inkhosi ingete yayinaka lendvodza lekhohlakele lenguNabali. Ufanana nelibito lakhe, lelisho Silima, naye unebulima. Kodvwa mine, ncekukati yakho, angikawaboni lamadvodza labetfunyelwe yinkhosi yami.

₂₆“Njengobe Simakadze ukuphephisile wena, nkhosi yami, ekucitseni ingati kanye nasekutikhipheleni sibhongo ngetandla takho, ngifunga ngekuphila kwaSimakadze nangekwakho ngitsi, shangatsi tonkhe titsa takho nabo bonkhe labafuna kukwenta silo sengubo bangafanana naNabali. ₂₇Shangatsi lesipho lesiletfwe ngulencekukati yakho enkhosini yayo singanikwa lawo madvodza layilandzelako. ₂₈Ngicela inceku yakho uyitsetselele ngalesono lesentile, ngobe Simakadze utakwenta ube yinkhosi wena kanye netitukulwane takho, ngobe ulwa timphi takhe. Shangatsi kungabate lokubi lokutfolakala kuwe, yingci nawusaphila. ₂₉Nome ngabe kukhona lokucosha ngemuva afuna kukubulala, kuphila kwenkhosi yami Simakadze Nkulunkulu wakho utakuvikela ngekutsi akubophe inyandza kanye nalabaphilako. Kodvwa kuphila kwetitsa takho utakujikijela akulahle khashane njengelitje liphuma esidubulelweni. ₃₀Utawutsi Simakadze angentela inkhosi yami konkhe lokuhle lakwetsembisa ngayo, nasayibeke yaba yinkhosi etikwa-Israyeli, ₃₁inkhosi yami ingeke itivele inelicala enhlitiyweni yayo ngekubulala ngaphandle kwesizatfu nome ngekutikhiphela sibhongo. Utawutsi Simakadze angayinika kuphumelela inkhosi yami, bese-ke iyayikhumbula incekukati yayo.”

₃₂Davide wakhuluma ku-Abigayili, watsi: “Akadvunyiswe Simakadze Nkulunkulu wema-Israyeli lokutfume lamuhla kutsi utengihlangabeta. ₃₃Shangatsi ungabusiswa ngalomcondvo wakho lokhaliphile, nekutsi ungivimbe ngingayicitsi ingati lamuhla, nekutsi ngingatiphindziseleli ngetandla tami. ₃₄Simakadze ungigcinile, ngangete ngakulimata. Kodvwa ngifunga ngekuphila kwaNkulunkulu wema-Israyeli kutsi kube awukasheshisi waphutfuma kutengihlangabeta, bekutawutsi kudzabuka kusa lamuhla kube sekute ngisho namunye lomdvuna lophilako kulamadvodza akaNabali.”

₃₅Davide wakwemukela esandleni sa-Abigayili loko bekakuletse kuye, watsi: “Hamba ngekuthula ubuyele ekhaya. Ngiyivile lenkhulumo yakho, kantsi futsi naloko lokucelako nako sengikunikile.”

₃₆Watsi Abigayili nakaya kuNabali, wamkhandza asendlini ente lidzili lelifana nelenkhosi. Abetsakasile, adzakwe angumhlaba. Ngako kute lamtjela kona, kwaze kwaba ngusekuseni ngakusasa. ₃₇Kwatsi ekuseni Nabali asasangulukile engcondvweni, asazitsile, umkakhe wamtjela tonkhe leto tintfo. Inhlitiyo yaNabali yashaya kancane, wamane woma nje, wafanana nelitje. ₃₈Emvakwemalanga labengaba lishumi Simakadze washaya Nabali, wafa.

₃₉Watsi kube Davide eve kutsi Nabali sewufile, watsi: “Akadvunyiswe Simakadze, longiphindziselele kuNabali ngekungetfuka kwakhe. Ungigcinile, ngangete ngakwenta lokubi, kodvwa wajezisa Nabali ngenca yekona kwakhe.”

Davide watfumela livi ku-Abigayili, amsoma kutsi abe ngumkakhe. ₄₀Tinceku takhe taya eKhameli, tafike takhuluma ku-Abigayili, tatsi: “Davide usitfume kuwe kutsi sitekulandza uyekuba ngumkakhe.”

₄₁Abigayili wakhotsama abhekise buso bakhe phansi, watsi: “Nansi incekukati yakho, ilungele kukukhonta, nekugeza tinyawo tetinceku tenkhosi yami.” ₄₂Wasukuma ngekushesha wakhwela embongolweni yakhe, aphekeletelwa timphekeleteli takhe letisihlanu; wahamba netitfunywa taDavide, wafike waba ngumkakhe.

₄₃Davide abeshade na-Ahinowami waseJezreyeli, bobabili baba bafati bakhe. ₄₄Kodvwa Sawula abesatsatse indvodzakati yakhe, Mikhali, umkaDavide, wamendzisela Phaltiyeli, umsa waLayishi, waseGalimu.