1 Emakhosi 6

₁Emnyakeni wema-480 kusukela ema-Israyeli aphuma eGibithe, lekwakungumnyaka wesine inkhosi Solomoni yatsatsa sihlalo sebukhosi, ngenyanga yesibili lenguZivu, Solomoni wacala kwakha lithempeli laSimakadze.

₂Lithempeli Solomoni, inkhosi, lalakhela Simakadze lalingemamitha labengaba ngema-27 budze, nemamitha labengaba yimfica bubanti, nemamitha labengaba li-13 nesigamu kuphakama. ₃Umhubhe lokwakungenwa ngawo wawungemamitha labengaba mane nesigamu budze, ube ngemamitha labengaba yimfica bubanti, bubanti bawo babungangebelithempeli. ₄Wenta timbobo letatinciphe ngephandle tilihele etulu ethempelini. ₅Elubondzeni lwendlu lenkhulu lengekhatsi kanye nakulolo lwendzawo lengcwelengcwele lengekhatsi wakha sitezi lesasitungelete lithempeli, lapho bekunaletinye tindlu tasemaceleni ayo. ₆Siyilo sendlu lengaphansi sasingemamitha labengaba mabili nesigamu bubanti, bese kutsi salesisekhatsi sibe ngemamitha labengaba matsatfu bubanti, kantsi salengetulu kwato tonkhe sasingemamitha labengaba matsatfu nesigamu bubanti. Wenta tibondza taba lula ngenhla kunangentansi, kuze kutsi titewusima etikwalolubondza, ngaphandle kwekutsi tingodvo takhelwe kulo.

₇Ematje ekwakha lithempeli abelungiswa acotwe khona lena entsabeni, ngako akuzange kube khona umsindvo lowawungabangwa tandvo, nemashizolo nome nguluphi-ke luhlobo lwelithulusi lensimbi lapho lithempeli lalakhiwa khona.

₈Umnyango lowawungena kulesiyilo lesasingephansi wawungaseningizimu yelithempeli; bekunetitebhisi letatenyuka tingene endlini lesemkhatsini, tendlule lapho tingene endlini yesitsatfu lengetulu kwato tonkhe. ₉Walakha kanjalo-ke lithempeli, waze walicedza, walifulela ngetingodvo kanye nangemapulango emsedari. ₁₀Emaceleni kutungeleta lelithempeli wakha emakamelo. Lilinye lalamakamelo lalingemamitha labengaba mabili nesigamu kuphakama, abehlanganiswe ngetingodvo temisedari kulelithempeli.

₁₁Livi laSimakadze lefika kuSolomoni, latsi: ₁₂“Mayelana nalelithempeli lolakhako, nangabe ulandzela timiso tami, wente nemitsetfo yami, uyigcine yonkhe imiyalo yami, uyilandzele, ngiyawusigcwalisa ngawe leso setsembiso lengasinika Davide, uyihlo. ₁₃Ngiyawuhlala emkhatsini wema-Israyeli ngingasishiyi sive sami ema-Israyeli.”

₁₄Solomoni walakha kanjalo nje lithempeli walicedza.

₁₅Lubondza lwangekhatsi walwakha walwembesa lonkhe ngemapulango emsedari, kusukela phansi esiyilweni kuze kuyewufika etulu eluphahleni kusilingi, siyilo sembeswa ngemapulango esipheshula. ₁₆Likamelo lelisekhatsi, lekuyindzawo lengcwelengcwele, walakha ngemapulango emsedari endzaweni lengasemuva ethempelini, laba ngemamitha labengaba yimfica, kusuka phansi esiyilweni kuye etulu kusilingi. ₁₇Likamelo lelikhulu lelalisembikwendzawo lengcwelengcwele walakha laba ngemamitha labengaba li-18 budze. ₁₈Lingekhatsi lelithempeli lalakhiwe ngemsedari leyayibatwe yafanana nemaselwa netimbali. Konkhe kwakungumsedari, kungabonakali nalinye litje.

₁₉Lingekhatsi lelingemuva ethempelini walenta indzawo lengcwelengcwele, lapho bekutawubekwa khona libhokisi lesivumelwane saSimakadze. ₂₀Lendzawo yayingemamitha labengaba yimfica budze, nemamitha labengaba yimfica bubanti, nemamitha labengaba yimfica kuphakama. Lonkhe lingekhatsi walembesa ngegolide lecengekile. Lilati nalo walembesa ngemsedari yonkhe indzawo. ₂₁Lingekhatsi lelithempeli Solomoni walembesa ngegolide lecengekile, wavundlisa tinketane tegolide emnyango wendzawo lengcwelengcwele, kantsi nayo futsi yayembeswe ngegolide. ₂₂Ngako lonkhe lingekhatsi lelithempeli walembesa ngegolide, nelilati lelalisendzaweni lengcwelengcwele nalo lembeswa ngegolide.

₂₃Ekhatsi endzaweni lengcwelengcwele wakha emakherubhi lamabili ngelugodvo lwemncumo, lilinye laba ngemamitha labengaba mane nesigamu kuphakama. ₂₄Luphiko lulunye lwelikherubhi lwalungemamitha labengaba mabili nencenye yesine yelimitha budze, nalolu lolunye lwalungemamitha labengaba mabili nencenye yesine yelimitha budze, bese kuba ngemamitha labengaba mane nesigamu kusuka ekugcineni kwaloluphiko lolungala, kuye ekugcineni kwaloluphiko lolungale. ₂₅Likherubhi lesibili nalo lalingemamitha labengaba mane nesigamu, ngobe omabili lamakherubhi abefanana ngebukhulu nangebubanti. ₂₆Kuphakama kwalelo nalelo kherubhi bekungemamitha labengaba mane nesigamu. ₂₇Lamakherubhi Solomoni wawemisa ekhatsi nendzawo lengcwelengcwele, emaphiko awo avulekile. Luphiko lwalelinye likherubhi lwatsintsa lubondza ngala, kanjalo nelwaleli lelinye lwatsintsa lubondza lolungale, kwatsi leti letinye timphiko tawo tatsintsana ekhatsi nendzawo lengcwelengcwele. ₂₈Lamakherubhi wawembesa ngegolide.

₂₉Kulo lonkhe lolubondza lwelithempeli, emakamelweni langekhatsi nalangephandle wabata emakherubhi, netihlahla temasundvu kanye netimbali letichakazile. ₃₀Watembesa ngegolide tiyilo talamakamelo langekhatsi nalangephandle kwelithempeli.

₃₁Ekungeneni kwalendzawo lengcwelengcwele lesekhatsi wakhela sivalo lesitivalo tibili lesasakhiwe ngetingodvo temncumo letatimacalahlanu ngetulu. ₃₂Kwatsi kuletivalo letibili temncumo wabata umhlobiso wemakherubhi, netihlahla temasundvu kanye netimbali letichakazile, wembesa lamakherubhi naletihlahla temasundvu ngegolide legcotjiwe. ₃₃Ngalokufananako emnyango longenela endlini lenkhulu kwakufakwe tinsika tesivalo letatakhiwe ngetingodvo temncumo letatimacalamane. ₃₄Wenta tivalo letibili tesipheshula, nguleso naleso sigocotwa ngatibili. ₃₅Etikwato wabata umhlobiso wemakherubhi, netihlahla temasundvu, netimbali letichakazile, wase utembesa ngegolide legcotjiwe ngalokulinganako kulomhlobiso.

₃₆Wakha sibuya sangekhatsi lesasinemitsandvo lemitsatfu yematje lalolongiwe, wakha nemtsandvo munye wetingodvo temsedari letatijutjwe kahle.

₃₇Sisekelo selithempeli laSimakadze sabekwa ngemnyaka wesine enyangeni yaZivu. ₃₈Kwatsi emnyakeni welishumi namunye enyangeni yesiphohlongo, lenguBhuli, lithempeli laphela lonkhe, njengobe kwakuhleliwe. Watsatsa iminyaka lesikhombisa kulakha.