Kulwa kwema-Israyeli nemaSiriya
1Bheni Hadadi, inkhosi yaseSiriya, wahlomisa onkhe emabutfo akhe, asitwa ngemakhosi langema-32 labehamba ngemahhashi nangetincola temphi; wenyuka wayawuhlasela iSamariya, wayivimbetela. 2Watfumela titfunywa edolobheni ku-Ahabi, inkhosi yaka-Israyeli, watsi: “Inkhosi Bheni Hadadi itsi: 3‘Isiliva yakho negolide yakho kwami, kanye nebafati bakho labahle kakhulu nebantfwabakho labahle kakhulu bami.’ ”
4Inkhosi yaka-Israyeli yaphendvula, yatsi: “Kunjengobe usho, nkhosi yami, mine nako konkhe lenginako kwakho.”
5Titfunywa taphindze tabuya futsi, tafike tatsi: “Inkhosi Bheni Hadadi itsi: ‘Ngitfumele ngatsi letsa isiliva yakho, negolide yakho, nebafati bakho kanye nebantfwabakho. 6Kodvwa kusasa, ngalesikhatsi, ngitawutfumela tindvuna tami titewufunisisa lapho esigodlweni sakho nasetindlini tetindvuna takho. Titakuchwaga konkhe lokungemagugu akho, tihambe nako.’ ”
7Inkhosi yaka-Israyeli yabita bonkhe baholi belive layo yakhuluma kubo, yatsi: “Niyabona kambe kutsi lomuntfu ufuna kususa lutfutfuva! Utsite nakatfumela afuna bafati bami, nebantfwabami, nesiliva yami, negolide yami, mine angikamaleli.”
8Baholi nebantfu bonkhe baphendvula, batsi: “Ungamlaleli, futsi ungakwenti loko lakushoko.”
9Ngako Ahabi waphendvula titfunywa tenkhosi Bheni Hadadi, watsi: “Tjelani inkhosi yami kutsi ngitsi: ‘Inceku yakho itawukwenta konkhe loko lokufune kucala, kodvwa loku losewukufuna nyalo ngingeke ngikuvume.’ ” Titfunywa tatsatsa lemphendvulo tayibuyisela enkhosini Bheni Hadadi.
10Bheni Hadadi watfumela lomunye umlayeto ku-Ahabi atsi: “Ngitakuta nemadvodza lenele kutsi ngitewubhubhisa lelidolobha lakho, lamadvodza atsatse leto timvutfu ngetandla tawo. Shangatsi bonkulunkulu bangangishaya ngife, nangehluleka kukufeza loko.”
11Inkhosi yaka-Israyeli yaphendvula, yatsi: “Nibomtjela kutsi saga sitsi: ‘Lowo lotewuhlasela akatigabatisi asengakalwi, kodvwa loko ukwenta emvakwemphi asalwile.’ ”
12Lomlayeto wefika enkhosini Bheni Hadadi asanatsa nalawa lamanye emakhosi emathendeni awo. Wavele watjela emabutfo akhe watsi: “Tilungiseleleni kuhlasela.” Ngako atilungiselela kuhlasela lelo dolobha.
13Ngasona leso sikhatsi kwefika umphrofethi enkhosini Ahabi, watsi: “Simakadze utsi: ‘Uyayibona yini lemphi lenkhulu kangaka? Ngitayinikela esandleni sakho, kuze wati kutsi mine nginguSimakadze.’ ”
14Ahabi wabuta watsi: “Kodvwa ngubani lotakwenta loko?”
Lomphrofethi waphendvula watsi: “Simakadze utsi: ‘Loko kutakwentiwa tindvuna letincane letingaphansi kwetindvuna tetifundza.’ ”
Ahabi wabuta watsi: “Ngubani lotawucala kucala kuhlasela?”
Lomphrofethi waphendvula watsi: “Nguwe.”
15Ngako Ahabi wabita tonkhe tindvuna letincane letingaphansi kwetindvuna tetifundza, taba ngemadvodza langema-232, asawonkhe. Wahlanganisa lamanye ema-Israyeli, wona aba ti-7 000 asawonkhe.
16Baphuma emini kuyawuhlasela ngesikhatsi Bheni Hadadi nalamakhosi langema-32 labemsita, baselibele kutinklinkla ngetjwala emathendeni abo. 17Letindvuna letincane letingaphansi kwetindvuna tetifundza taviva tona tayawuhlasela kucala.
Bheni Hadadi abetfumele tinhloli letabuya tafike tambikela tatsi: “Kukhona emadvodza lavivako ashuca aphuma ngaseSamariya.”
18Watsi: “Babambeni basaphila, nome beta ngekuthula nome bete ngemphi.”
19Tindvuna letincane letingaphansi kwetindvuna tetifundza taphumela ngephandle kwelidolobha tilandzelwa ngemabutfo, 20ngulowo nalowo wabulala leyo ndvodza labelwa nayo. Atsi nakubona loko emaSiriya abaleka, ema-Israyeli awalandzela ngemuva awacosha. Kodvwa Bheni Hadadi, inkhosi yemaSiriya, wagibela lihhashi wabaleka nalamanye emadvodza akakhe nawo labegibele akawo. 21Inkhosi yaka-Israyeli yasondzela yabhubhisa lamahhashi kanye netincola, yawashaya yawabhuca emaSiriya.
22Emvakwaloko, umphrofethi waphindze wabuyela enkhosini yaka-Israyeli, wafike watsi: “Cinisa emabutfo akho, ubone kutsi kufanele wenteni, ngobe kulentfwasahlobo letako inkhosi yaseSiriya itawuphindze ibuye itekuhlasela futsi.”
Kuhlasela kwemaSiriya kwesibili
23Ngasona leso sikhatsi tindvuna tenkhosi yaseSiriya teluleka inkhosi, tatsi: “Bonkulunkulu babo bonkulunkulu bemagcuma. Ngiko nje babenemandla kakhulu kunatsi, badzimate basehlula. Kodvwa nasingalwa nabo sisematsafeni, nakanjani sitakuba nemandla kunabo. 24Yenta naku: Wesuse onkhe lamakhosi lapho aphetse ngakhona, bese ufaka letinye tindvuna etikhundleni tawo. 25Kufanele uphindze wakhe libutfo lelingangalelo lelakulahlekela, lihhashi ngelihhashi nencola ngencola, khona sitekulwa nalama-Israyeli ematsafeni. Nakanjani sitawuba nemandla kunawo.” Wativumela, wenta njengobe tatincomile.
26Entfwasahlobo lelandzelako Bheni Hadadi wahlomisa emaSiriya enyuka aya e-Afeki kuyakulwa nema-Israyeli. 27Nema-Israyeli atsi kube ahlome, atsatsa imiphako yawo, aphuma ayawuhlasela. Ema-Israyeli akamba aba ticumbi letimbili njengemihlambi lemibili yetimbuti abhekana nawo, kantsi emaSiriya wona abegcwele lonkhe lelo tsafa.
28Lomuntfu waNkulunkulu wefika wakhuluma enkhosini yaka-Israyeli, watsi: “Naku-ke lokushiwo nguSimakadze, utsi: ‘Njengobe emaSiriya acabanga kutsi Simakadze ungunkulunkulu wemagcuma, akasiye nkulunkulu wematsafa, yonkhe lemphi yawo ngitayinikela etandleni tenu, kuze nati kutsi mine nginguSimakadze.’ ”
29Kwaphela emalanga lasikhombisa emabutfo akambe abhekene, kwatsi ngelilanga lesikhombisa kwahlaselwana. Ema-Israyeli abulala emadvodza lahamba ngetinyawo labeti-100 000 emaSiriya ngalanga linye. 30Lawa lamanye avele abalekela edolobheni lase-Afeki, lapho atsi nakefika khona, lubondza lwalelo dolobha lwadzilikela etikwalababeti-27 000 bawo.
Bheni Hadadi wabalekela edolobheni, wafike wabhaca ekamelweni lelalingekhatsi endlini. 31Tindvuna takhe takhuluma kuye, tatsi: “Sesivile kutsi emakhosi endlu yaka-Israyeli anesihe. Asambe siye enkhosini yaka-Israyeli sivunule emasaka lapha elukhalweni sibophe tintsambo lapha etinhloko tetfu. Mhlawumbe angahle akusindzise angakubulali.”
32Ngako bavunula emasaka etinkhalweni tabo, babopha tinhloko tabo ngetintsambo, bahamba baya enkhosini yaka-Israyeli bafike batsi: “Inceku yakho Bheni Hadadi itsi: ‘Ngicela kutsi ungangibulali.’ ”
Inkhosi yaphendvula yatsi: “Usaphila yini? Phela ungumnaketfu.”
33Letindvuna taBheni Hadadi tashesha takutsatsa loko njengesibonakaliso sekwemukeleka, Ahabi nakatsi: “Yebo, Bheni Hadadi ungumnaketfu.” Ngako tasheshe tawaphindza lamavi latsi: “Yebo, Bheni Hadadi ungumnakenu!”
Ahabi wakhuluma kuto, watsi: “Hambani nimlandze.” Watsi kube Bheni Hadadi efike, Ahabi wamcela kutsi ekhwele naye encoleni yakhe.
34Bheni Hadadi wakhuluma kuye, watsi: “Ngitakuwabuyisa onkhe lamadolobha latfunjwa ngubabe kuyihlo. Nawe ungatentela timakethe edolobheni laseDamaseko, njengobe nababe atenta eSamariya.”
Ahabi waphendvula watsi: “Ngitakukhululela etikwalesivumelwane.” Ngako benta leso sivumelwane, wase uyamkhulula.
Kusolwa kwa-Ahabi ngumphrofethi
35Ngelivi laSimakadze lomunye wemadvodzana ebaphrofethi wakhuluma kulomunye umnganakhe, watsi: “Ngishaye ngalesikhali sakho,” kodvwa lomnganakhe wala.
36Ngako lomphrofethi watsi: “Njengobe ungakamlaleli Simakadze, utawutsi nawusuka lapha, libhubesi likubulale.” Yatsi lendvodza nayisuka ihamba, yakhandvwa libhubesi lelayibulala.
37Lomphrofethi wakhandza lenye indvodza lakhuluma kuyo watsi: “Ngicela ungishaye.” Ngako lendvodza yamshaya, yamlimata. 38Lomphrofethi wahamba wayakumela inkhosi eceleni kwendlela. Waphica umkhondvo ngekufaka ingadibe leyayisitselise emehlo. 39Yatsi inkhosi nayendlula, lomphrofethi wammemeta watsi: “Inceku yakho yangena ekhatsi nemphi, lomunye wase uletsa sitsa lesasitfunjiwe watsi: ‘Gadza lomuntfu, nakabaleka, loko utakukhokha ngemphilo yakho, nome-ke ukhokhe emakhilogremu langaba ngema-34 esiliva’, 40kodvwa ngenca yemisebenti bengiyenta lendvodza ibese iyanyamalala.”
Inkhosi yaka-Israyeli yaphendvula, yatsi: “Ngiso leso sigwebo sakho, sewusishito.”
41Lomphrofethi washesha wesusa lengadibe emehlweni akhe, inkhosi yambona kutsi ungulomunye webaphrofethi. 42Wakhuluma enkhosini watsi: “Naku-ke lokushiwo nguSimakadze: ‘Sewukhulule lomuntfu bengitsite akafe, ngako loko utakukhokha ngemphilo yakho, nesive sakho sitawubhujiswa ngenca yekuyekela lamabutfo akakhe.’ ”
43Inkhosi yabuyela esigodlweni sayo eSamariya idvubutekile, ikhubekile.
