1 Emakhosi 10

₁Indlovukazi yaseSheba yatsi kube ive ngeludvumo lwaSolomoni mayelana neLibito laSimakadze, yeta yatakumvivinya ngekumbuta imibuto lelukhuni. ₂Yefika eJerusalema ihamba nalolukhulu ludvwendvwe, luchuba emakamela labetfwele tinandzisi, nemidlidlimba yegolide kanye neyematje laligugu. Yefika kaSolomoni yakhulumisana naye ngako konkhe lokwakusengcondvweni yayo. ₃Solomoni wayiphendvula yonkhe leyo mibuto yayo. Kute ngisho namunye lowase waba lukhuni kakhulu enkhosini kutsi ikuchazele lendlovukazi. ₄Yatsi kube lendlovukazi yaseSheba ikubone konkhe loko kuhlakanipha kwenkhosi Solomoni, kanye nesigodlo labesakhile, ₅nekudla labekudla etafuleni lakhe, nekuhlaliswa kwetindvuna takhe, netembatfo tetinceku takhe, netebaphatsi betindzebe takhe tekunatsa, neminikelo yekushiswa labeyenta ethempelini laSimakadze, yamangala yaphela emandla.

₆Yakhuluma enkhosini yatsi: “Impela lombiko lengatjelwa ngawo ngiseseveni lami macondzana netintfo lophumelele kutenta kanye namacondzana nekuhlakanipha kwakho uliciniso. ₇Kodvwa angizange ngitikholwe tonkhe letintfo ngidzimate ngefika ngatibonela ngewami emehlo. Ngempela, angizange ngitjelwe ngisho nencenye yako konkhe loku lengikubonako; kuhlakanipha kwakho nemcebo wakho kungetulu kwaloko lengakuva ngematekelo. ₈Maye, bayajabula labantfu bakakho! Maye, tiyajabula tindvuna takakho letihlala njalo time lapha embikwakho tilalele lokuhlakanipha kwakho. ₉Akadvunyiswe Simakadze Nkulunkulu wakho, lokujabulele wakubeka esihlalweni sebukhosi baka-Israyeli. Ngenca yelutsandvo lwaSimakadze lwaphakadze lanalo nga-Israyeli, ukwente waba yinkhosi, kutsi utewubusa ngekungakhetsi nangekulunga.”

₁₀Indlovukazi yase ipha inkhosi Solomoni igolide leyayingemakhilogremu labengaba ti-4 000, nemidlidlimba yetinandzisi kanye nematje laligugu. Akuzange kuphindze kufike tinandzisi letase taba tinyenti kwendlula leto letake tetfulwa yindlovukazi yaseSheba enkhosini Solomoni.

₁₁[Imikhumbi yaHiramu leyayetfwala igolide iyitsatsa e-Ofiri, lapho yayiphindze itsatse nemitfwalo lemikhulu yetingodvo te-almugi neyematje laligugu. ₁₂Inkhosi yayisebentisa letingodvo te-almugi ekwenteni tinsika telithempeli laSimakadze netesigodlo senkhosi, nasekwenteni emahabhu nemalire ebahlabeli. Ngako tingodvo letinyenti kangako te-almugi atizange tiphindze tifike eveni nome tibonwe kusukela ngalelo langa.]

₁₃Inkhosi Solomoni yapha indlovukazi yaseSheba konkhe indlovukazi leyayikufisa naleyayikucelile, ngetulu kwaloko leyayiyiphe kona ngekwephana kwayo. Indlovukazi yase iyancandzeka ihamba nelibandla letimphekeleteli tayo yaya eveni lakubo.

₁₄Njalo nje ngemnyaka Solomoni abemukela igolide leyayingemakhilogremu labengaba ti-23 000, ₁₅ngaphandle kwemitselo yebahwebi neyebatsengisi leyayiphuma kuwo onkhe emakhosi ase-Arabiya kanye nakubabusi belive.

₁₆Inkhosi Solomoni yakha emahawu lamakhulu langema-200 ngegolide legcotjiwe; lilinye lihawu lalakhiwe ngegolide leyayingemakhilogremu labengaba matsatfu nencenye. ₁₇Inkhosi yaphindze yenta lamanye emahawu lamancane langema-300 ngegolide legcotjiwe; lilinye lalakhiwe ngegolide leyayingemakhilogremu labengaba mabili. Inkhosi yawabeka endlini yayo yeLihlatsi laseLebanoni.

₁₈Inkhosi yabe seyenta lesikhulu sihlalo sebukhosi; yasakha ngematinyo endlovu, yabe seyisembesa ngegolide lecolisakele. ₁₉Sihlalo sebukhosi sasinetitebhisi letisitfupha, kutsi lingemuva laso ngetulu libe nesihloko lesiyindingilizi. Lapha emaceleni lesihlalo sasinekwekubeka imikhono, eceleni kwaloko naloko kume libhubesi. ₂₀Emabhubesi lali-12 abeme kuletitebhisi, linye ngala linye nangale kwesitebhisi sinye. Kute lokufanana naloko lokwase kwentiwa ngisho nome ngukumuphi umbuso. ₂₁Tonkhe tindzebe taSolomoni tekunatsa tatentiwe ngegolide, kantsi tonkhe tintfo talapha endlini yeLihlatsi laseLebanoni tatentiwe ngegolide lecengekile. Kute nakunye lokwakwentiwe ngesiliva, ngobe isiliva yayingakabaluleki kakhulu ngaleto tikhatsi taSolomoni. ₂₂Inkhosi yayinelubhuzane lwemikhumbi yekuhweba elwandle, ikanye nalena yaHiramu. Kanye ngeminyaka lemitsatfu yayibuya yetfwele igolide, nesiliva, nematinyo endlovu, netinkawu kanye netimfene.

₂₃Inkhosi Solomoni yaba yinkhulu ngekunjinga nangekuhlakanipha, kwendlula onkhe emakhosi emhlaba. ₂₄Wonkhe umhlaba wawufuna kuta kutawubona Solomoni nekutawulalela inhlakanipho Nkulunkulu labeyibeke enhlitiyweni yaSolomoni. ₂₅Umnyaka ngemnyaka, wonkhe labeta kuye abefika nesipho: tintfo letentiwe ngesiliva, nangegolide, nemijiva, netikhali, netinandzisi, nemahhashi kanye neminyuzi.

₂₆Solomoni wabutsela ndzawonye tincola temphi nemahhashi; abenetincola temphi letatiyi-1 400, nemahhashi labeti-12 000, labewagcine emadolobheni etincola temphi, kanye naseJerusalema, lapho abehlala khona. ₂₇Inkhosi yenta isiliva yandza eJerusalema, yaze yafanana nelukhetse, nemisedari yayiminyenti njengetihlahla temakhiwa etsafeni. ₂₈Emahhashi aSolomoni bawatsenga eGibhithe naseKuwe; bahwebi basebukhosini babewatsenga eKuwe. ₂₉Incola yemphi leyatsengwa eGibhithe iyinye yabita emakhilogremu labengaba sikhombisa esiliva, lihhashi lilinye libita emakhilogremu labengaba mabili. Nabo baphindze bawatsengisela onkhe emakhosi emaHethi newemaSiriya.