1 Tikhronike 9

₁Bonkhe bantfu baka-Israyeli babalwa ngekwemindeni yabo, njengobe kubhaliwe encwadzini yemakhosi aka-Israyeli.

Sive sakaJuda sona sase sitfunjelwe eBhabhulona ngenca yekungetsembeki kwaso. ₂Bekucala ekubuyeni nasekucabeni etindzaweni tabo emadolobheni abo kwakungema-Israyeli labebabantfu nje, nebaphristi, nemaLevi kanye netikhonti tasethempelini. ₃Besive sakaJuda, nesakaBhenjamini, nesaka-Efrayimu kanye nesakaManase bona bahamba bayawuhlala eJerusalema:

₄Kwakubo-Uthayi, umsa wa-Amihudi, umsa wa-Omri, umsa wa-Imri, umsa waBani, umtukulu waPheresi, umsa waJuda.

₅Esiveni sakaShela labengumholi bekungu-Asaya, litubulo lakhe, akanye nalamanye emadvodzana akakhe.

₆Esiveni sakaZera labengumholi bekunguJehuweli akanye nabomnakabo. Sebabonkhe bantfu besive sakaJuda babengema-690.

₇Esiveni sakaBhenjamini bekunguSalu, umsa waMeshulamu, umsa waHodaviya, umsa waHasenuwa, ₈na-Ibhiniya, umsa waJerohamu; na-Ela, umsa wa-Uzi, umsa waMikhri; naMeshulamu, umsa waShefathiya, umsa waRehuweli, umsa wa-Ibhiniya.

₉Sebabonkhe bantfu besive sakaBhenjamini ngekwemlandvo weluhlanga lwekutalana kwabo bebangema-956. Onkhe lamadvodza abebaholi bemindeni yawo.

₁₀Baphristi lababehlala eJerusalema bekunguJedaya, naJehoyaribi, naJakhini, ₁₁na-Azariya, umsa waHilkiya, umsa waMeshulamu, umsa waSadoki, umsa waMerayothi, umsa wa-Ahitubi, labeyindvuna endlini yaNkulunkulu, ₁₂na-Adaya, umsa waJerohamu, umsa waPhashuri, umsa waMalkhiya, naMasayi, umsa wa-Adiyeli, umsa waJazera, umsa waMeshulamu, umsa waMeshilemithi, umsa wa-Imeri.

₁₃Baphristi lababebaholi bemindeni babeyi-1 760. Babenelikhono ekwenteni wonkhe umsebenti wasendlini yaNkulunkulu.

₁₄EmaLevi labehlala eJerusalema bekuboShemaya, umsa waHashubi, umsa wa-Azrikamu, umsa waHashabiya, umMerari; ₁₅naBakbakhari, naHereshi, naGalali kanye naMathaniya, umsa waMikha, umsa waZikhri, umsa wa-Asafa; ₁₆na-Obadiya, umsa waShemaya, umsa waGalali, umsa waJeduthuni, naBherekhiya, umsa wa-Asa, umsa wa-Elkhana, labehlala emitini yemaNethofa.

₁₇Bomahlalesangweni belithempeli lababehlala eJerusalema bekuboShalumi, na-Akhubi, naThalmoni, na-Ahimani kanye nabomnakabo. Shalumi abengumholi wabo. ₁₈Bonkhe laba bebahlala ngaseSangweni Lenkhosi lelingasemphumalanga, kuze kube ngulamuhla loku. Laba-ke bekubomahlalesangweni benkambu yemaLevi.

₁₉Shalumi, umsa waKhore, umsa wa-Abiyasafa, umsa waKhora, kanye nabomahlalesangweni bemndeni wakhe, emaKhora, bona umsebenti wabo bekukugadza etimphundvwini telithende, njengobe naboyise umsebenti wabo bekukugadza lisango lekungena endlini yaSimakadze. ₂₀Finehasi, umsa wa-Eleyazare, ekucaleni bekaphetse labomahlalesangweni, naSimakadze waba naye.

₂₁Zakhariya, umsa waMeshelemiya, naye abengumahlalesangweni ekungeneni kwelisango lelithende lekuhlangana.

₂₂Sebabonkhe labakhetselwa kuba bomahlalesangweni etimphundvwini kwaba ngemadvodza langema-212. Babhaliswa ngetitukulwane tabo emitini yabo lababehlala kuyo. Bekuyinkhosi Davide nemphrofethi Samuweli lebababeka kutsi babe tetsenjwa talowo msebenti. ₂₃Bona kanye netitukulwane tabo babebekwe kutsi bagadze emasango endlu yaSimakadze, lekwakutsiwa lithende. ₂₄Labomahlalesangweni babebekwe kuyo yonkhe lemihlubulo lemine: ngasemphumalanga, nangasenshonalanga, nangasenyakatfo, nangaseningizimu. ₂₅Bomnakabo lababesuka kulemiti yakubo babefika njalo nje kutawubambisana nabo kulemisebenti yekugadza ngemagema emalanga lasikhombisa. ₂₆Kodvwa bomahlalesangweni labakhulu labane bemaLevi bona bebanikwe umsebenti wekunakekela emakamelo kanye nengcebo endlini yaNkulunkulu.

₂₇Babefanele bahlale busuku bonkhe batungelete indlu yaNkulunkulu, ngobe phela bekufanele bayigadze; babephetse ngisho nesikhiya sekuyivula njalo nje ekuseni.

₂₈Umsebenti wemaLevi lamanye bekukuphatsa nekunakekela timphahla letatisetjentiswa ekukhonteni ethempelini. Letimphahla babetibala natingeniswa, baphindze batibale natikhishwa kuyawusetjentiswa. ₂₉Lamanye emaLevi umsebenti wawo bekukuphatsa letinye timphahla letingcwele, nafulaha, neliwayini, nemafutsa emncumo, nemphepho kanye netinandzisi. ₃₀Kodvwa kuhlanganisa tinandzisi bekungumsebenti webaphristi.

₃₁UmLevi lekwakutsiwa nguMathithiya, indvodzana leyayilitubulo laShalumi, umKhora, yena umsebenti wakhe bekukubhaka sinkhwa semnikelo. ₃₂Labanye bomnakabo bemaKhohati umsebenti wabo bekukulungisa sinkhwa semnikelo ngekusibeka etafuleni njalo nje ngeliSabatha.

₃₃Labo lababebahlabeli, lababebaholi bemaLevi, babehlala emakamelweni elithempeli. Bayekeliswa nalena leminye imisebenti, ngobe babehlala balindzele kubitelwa emsebentini wabo ngaso sonkhe sikhatsi, emini nasebusuku.

₃₄Lamadvodza abebaholi bemindeni yemaLevi, tonkhe tikhulu ngekwemlandvo weluhlanga lwekutalana kwato, bahlala eJerusalema.

₃₅Jeyiyeli, uyise waGibeyoni, abehlala eGibeyoni. Libito lemkakhe bekunguMakha. ₃₆Litubulo lakhe kungu-Abdoni, yena elanywa boSuri, naKhishi, naBhali, naNeri, naNadabi, ₃₇naGedori, na-Ahiyo, naZakhariya kanye naMikilothi. ₃₈Mikilothi abenguyise waShimeya. Nabo babehlala edvutane netihlobo tabo eJerusalema.

₃₉Neri abenguyise waKhishi, Khishi anguyise waSawula, Sawula anguyise waboJonathani, naMalkhi Shuwa, na-Abinadabi kanye na-Eshbhali. ₄₀Indvodzana yaJonathani bekunguMeribhali, uyise waMikha. ₄₁Emadvodzana aMikha bekuboPhithoni, naMeleki, naThareya kanye na-Ahazi. ₄₂Ahazi abenguyise waJara, Jara anguyise wabo-Alemethi, na-Azmavethi, naZimri; Zimri abenguyise waMosa. ₄₃Mosa abenguyise waBineya, Bineya anguyise waRefaya, Refaya anguyise wa-Eleyasa, Eleyasa anguyise wa-Aseli.

₄₄Aseli abenemadvodzana lasitfupha, emabito awo bekubo-Azrikamu, naBokheru, na-Ishmayeli, naSheyariya, na-Obadiya kanye naHanana. Lawa-ke bekungemadvodzana a-Aseli.