1 Tikhronike 4

₁Titukulwane takaJuda bekuboPheresi, naHesroni, naKhami, naHure, naShobali. ₂Shobali abenguyise waReyaya, Reyaya anguyise waJahathi, Jahathi anguyise wabo-Ahumayi naLahadi. Lena-ke bekungimindeni yemaSorathi.

₃Emadvodzana a-Etamu bekuboJezreyeli, na-Ishma, na-Idibashi. Dzadzewabo bekunguHaselelponi. ₄Phenuweli abenguyise waGedori, Ezeri anguyise waHusha. Leti bekutitukulwane taHure, litubulo la-Efratha. Hure abenguyise waBhetlehema.

₅Ashuri, uyise waThekhowa, abenebafati lababili, lekwakuboHela naNara. ₆Nara wamtalela bo-Ahuzami, naHeferi, naThemeni, naHahashtari; kwaba nguleto titukulwane taNara. ₇Hela wamtalela boSerethi, naSohari, na-Ethnani.

₈Khosi abenguyise wa-Anubi, naHasobeba, nemindeni ya-Ahaheli, umsa waHarumu.

₉Jabesi abehlonipheke kakhulu kunabomnakabo emndenini wakabo. Unina abemetse libito watsi nguJabesi, ngobe abetsi: “Ngimtele kabuhlungu.” ₁₀Jabesi wakhala kuNkulunkulu wema-Israyeli, watsi: “Ngicela ungibusise ungandzisele live lami! Shangatsi sandla sakho singaba nami, ungiphephise engotini, khona ngitewukhululeka ebuhlungwini.” Nkulunkulu wamupha loko labekucelile.

₁₁Khelubi, umnakaboShuha, abenguyise waMehiri, Mehiri anguyise wa-Eshtoni. ₁₂Eshtoni abenguyise waboBhethi Rafa, naPhaseya, naThehina, uyise wa-Iri Nahashi. Lawa bekungemadvodza labehlala eRekha.

₁₃Khenazi abenemadvodzana lamabili lekwakubo-Othniyeli naSeraya. Emadvodzana a-Othiniyeli bekuboHathathi, naMeyonothayi. ₁₄Meyonothayi abenguyise wa-Ofra.

Seraya abenguyise waJowabe, Jowabe abengumsunguli weGe Harashimu, loko phela kusho kutsi bantfu bakhona babetingcweti.

₁₅Emadvodzana aKhalebi, umsa waJefune, bekubo-Iru, na-Ela, naNamu. Indvodzana ya-Ela bekunguKhenazi.

₁₆Emadvodzana aJehaleli bekuboZifi, naZifa, naThiriya, na-Asareli.

₁₇Emadvodzana a-Ezra bekuboJetheri, naMeredi, na-Eferi kanye naJaloni. Lomunye webafati baMeredi watala boMiriyamu, naShamayi, kanye na-Ishbha, uyise wa-Eshtemowa. ₁₈Umkakhe waseJudiya watala boJaredi, uyise waGedori, naHebhere, uyise waSokho, kanye naJekuthiyeli, uyise waZanowa. Laba labanye bekubantfwana baBithiya, indvodzakati yaFaro, leyayingumfati waMeredi.

₁₉Emadvodzana emkaHodiya, dzadzewaboNahamu, bekunguyise waKheyila, umGami, na-Eshtemowa, um-Makha.

₂₀Emadvodzana aShimoni bekubo-Amnoni, naRina, naBheni Hanani kanye naThiloni.

Titukulwane taka-Ishi bekuboZohethi naBheni Zohethi.

₂₁Emadvodzana aShela, umsa waJuda, bekubo-Era, uyise waLekha, naLada, uyise waMaresha, nemindeni leyayeluka ilineni eBhethi Ashbeya, ₂₂naJokimi, nebantfu baseKhozeba, naJowashi, naSarafi, lababebusa eMowabi, naseJashubi Lehemi. Loku kwabhalwa endvulo.

₂₃Babebabumbi lababehlala eNethayimu naseGedera, basebentela inkhosi.

₂₄Emadvodzana aSimeyoni bekuboNemuweli, naJamini, naJaribi, naZera kanye naShawula. ₂₅Umsa waShawula bekunguShalumi, umsa wakhe kunguMibsamu, umsa wakhe kunguMishma. ₂₆Umsa waMishma bekunguHamuweli, umsa wakhe kunguZakhuri, umsa wakhe kunguShimeyi. ₂₇Shimeyi abenemadvodzana lali-16 nemadvodzakati lasitfupha, kodvwa bomnakabo babete bantfwana labanyenti; ngako lusendvo lwakabo lonkhe aluzange lwandze lube ngangelusendvo lwakaJuda.

₂₈Babehlala eBherisheba, naseMolada, naseHasari Shuwali, ₂₉naseBhala, nase-Esemu, naseTholadi, ₃₀naseBhethuweli, naseHoma, naseSikilagi, ₃₁naseBhethi Makhabothi, naseHasari Susimu, naseBhethi Bhiri, naseSharayimu. Lawa kwakungemadolobha abo kwaze kwefika sikhatsi sekubusa kwenkhosi Davide. ₃₂Imiti leyayitungelete lamadolobha bekuyi-Etamu, ne-Ayini, neRimona, neThokheni, ne-Ashani; emadolobha lasihlanu asawonkhe, ₃₃nayo yonkhe leyo miti kuze kuyewufika eBhalathi. Leto bekutabelo tabo. Babewugcina nemlandvo weluhlanga lwekutalana kwabo.

₃₄Meshobabi, naJamleki, naJosha, umsa wa-Amasiya, ₃₅naJoweli, naJehu, umsa wa-Joshibiya, umsa waSeraya, umsa wa-Asiyeli, ₃₆kanye na-Eliyoyenayi, naJakoba, naJeshohaya, na-Asaya, na-Adiyeli, naJesimiyeli, naBhenaya, ₃₇naZiza, umsa waShifi, umsa wa-Aloni, umsa waJedaya, umsa waShimri, umsa waShemaya:

₃₈Lawa-ke bekungemabito ebaholi baleto tinsendvo. Imindeni yabo yandza kakhulu, ₃₉base benabela nasemacentselweni aseGedori, ngasemphumalanga kwesigodzi, solomane bafunana nemadlelo etifuyo tabo. ₄₀Lapho bakhandza emadlelo labeneluhlata, nelive lalapho lalilikhulu linekuthula futsi lipholile. Bekuke kwahlala emaHhamu kuleyo ndzawo.

₄₁Bantfu lekwakubhalwe emabito abo befika ngesikhatsi kusabusa Hezekiya, inkhosi yakaJuda. Bahlasela lamaHhamu lapho abehlala khona kanye nemaMehuni labelapho, bawabhubhisa onkhe, njengobe nalamuhla loku kusabonakala nje. Bahlala kuleyo ndzawo yabo, ngobe bekunemadlelo lakahle etifuyo tabo. ₄₂Labanye bakaSimeyoni lababengema-500 bahlasela eNtsabeni iSeyiri, baholwa nguPhelatiya, naNeyariya, naRefaya, na-Uziyeli, emadvodzana a-Ishi. ₄₃Babulala leyo misalela yema-Amaleki leyayibalekile, solomane bahlala lapho kuze kube ngulamuhla.