1 Tikhronike 19

₁Kwatsi emvakwaloko inkhosi yema-Amoni, lekwakunguNahashi, yakhotsama. Hanuni, umsa wayo, waba yinkhosi. ₂Davide wacabanga watsi: “Ngitawumentela bubele Hanuni, umsa waNahashi, ngobe uyise wangentela bubele.” Ngako Davide watfumela titfunywa kutsi tiyewulilela Hanuni macondzana nekufa kweyise.

Tatsi letitfunywa taDavide natifika kuHanuni, eveni lema-Amoni, kutsi tiyemlilela, ₃baholi bema-Amoni bakhuluma kuHanuni, batsi: “Ucabanga kutsi Davide uhlonipha uyihlo ngalokutfumela emadvodza akakhe lapha kuwe kutsi atekulilela? Utsi lamadvodza aketeli kuwe kutawuhlamahlama lelive alihlole, bese ayalibhubhisa?” ₄Ngako Hanuni wawabamba lamadvodza akaDavide, wawahhula tilevu, wase uhhumbula netembatfo tawo ekhatsi macondzana netibunu, wase uyawayekela, ahamba.

₅Kwatsi kube kufike lomunye atewutjela Davide ngalamadvodza, Davide wakhipha tigijimi kutsi tiwahlangabete, ngobe abesahlaziseke kakhulu. Inkhosi yatsi: “Hlalani eJerikho, tize tihlume kahle tilevu tenu, bese niyabuya-ke.”

₆Ema-Amoni atsi kube abone kutsi asatente aba liphunga lelibi kuDavide, Hanuni nema-Amoni bakhokha isiliva leyayingemakhilogremu labengaba ti-34 000 ekucasha tincola temphi nebagibeli bato kubaseMesophothamiya, nakubaseSiriya kanye nakubaseSobha. ₇Bacasha tincola temphi letiti-32 000 nebagibeli bato, kanye nenkhosi yaseMakha nemasotja ayo leyeta yefike yemisa eceleni kweMedeba. Ema-Amoni wona abeshuca aphuma emadolobheni aviva, aya emphini.

₈Watsi kube akuve loko Davide, watfumela Jowabe, wamkhipha nalo lonkhe libutfo lemphi yetingwazi. ₉Ema-Amoni ashuca aphumela ngephandle, atihlela ekungeneni kwelidolobha lawo, kantsi lamakhosi labetawubasita abesatihlela ngephandle esigangeni.

₁₀Jowabe wabona kutsi emabutfo etitsa atamhlasela ngemuva nangembili, wase ukhetsa bokadzebona betingwazi cobo lwato temabutfo ema-Israyeli, watimisa watsi atibhekane nemaSiriya. ₁₁Kwatsi lawa lasele emabutfo wawashiya esandleni semnakabo, Abishayi, lowawahlela nawo abhekana nema-Amoni. ₁₂Jowabe watjela Abishayi watsi: “Nawubona kutsi emaSiriya ayangehlula, ubobe sewuyeta utangelekelela; nami nangibona kutsi ema-Amoni ayakwehlula, ngitakuta ngitekwelekelela. ₁₃Cina, ube nesibindzi! Asilwe ngesibindzi, silwele sive sakitsi nemadolobha aNkulunkulu wetfu. Simakadze utakwenta loko lokuhle emehlweni akhe.”

₁₄Jowabe nelibutfo lakakhe bashuca bayawudvumelana nemaSiriya. EmaSiriya ehlulwa, abaleka. ₁₅Ema-Amoni nawo atsi kube abone kutsi emaSiriya ayabaleka, nawo esuka ngematubane abalekela Abishayi, umnakabo, angena edolobheni. Ngako Jowabe wancandzeka wabuyela eJerusalema.

₁₆EmaSiriya atsi kube abone kutsi ehlulwe ngema-Israyeli, atfumela titfunywa kutsi tilandze emaSiriya labesangesheya kwemfula iYufrathe labeholwa nguShobaki, indvuna yemabutfo aHadadezeri.

₁₇Davide watsi kube akuve loko, naye wabutsa onkhe emabutfo ema-Israyeli, wewelela ngesheya kwemfula iJordane. Davide wahlela emabutfo akhe, ema-Israyeli aviva acondzana nemaSiriya. Imphi yabambana etulu. ₁₈Kodvwa emaSiriya abaleka embikwema-Israyeli, Davide wabulala bagibeli betincola temphi lababeti-7 000 nemasotja labeti-40 000 labeshuca ngetinyawo. Wachubeka wabulala naShobaki, indvuna yemphi yawo.

₁₉Lawa lamanye emakhosi labengaphansi kwaHadadezeri, atsi kube abone kutsi asehlulwe ngema-Israyeli, ase enta sivumelwane sekuthula naDavide, ase aba ngaphansi kwakhe.

Ngako emaSiriya akazange afune kuphindze asite ema-Amoni.