1 Tikhronike 14

₁Hiramu, inkhosi yaseThire, watfumela titfunywa kuDavide, kanye netingodvo temsedari, nebacoti bematje kanye nebabati kutsi bayewumakhela sigodlo. ₂Davide abati kutsi Simakadze sewumbeke kutsi abe yinkhosi yaka-Israyeli, nekutsi sewente umbuso wakhe waphumelela kakhulu ngenca yesive sakhe sema-Israyeli.

₃EJerusalema Davide waphindze watsatsa labanye bafati, watala emadvodzana nemadvodzakati lamanyenti. ₄Lawa ngemabito ebantfwana latalelwa bona khona eJerusalema: boShamuwa, naShobabi, naNathani, naSolomoni, ₅naJibhari, na-Elishuwa, na-Elpeleti, ₆naNoga, naNefegi, naJafiya, ₇na-Elishama, naBheliyada, na-Elifeleti.

₈Atsi kube emaFilisti eve kutsi Davide sewugcotjwe kutsi abe yinkhosi etikwawo onkhe ema-Israyeli, esusa lomkhulu umkhankhaso wekuyamfuna, kodvwa Davide weva ngaloko, wabe sewuyawahlangabeta. ₉EmaFilisti abesafike ahlasela Sigodzi semaRefa. ₁₀Ngako Davide wabuta kuNkulunkulu, watsi: “Kufanele yini ngihambe kuyawuhlasela lamaFilisti? Utakuwanikela yini esandleni sami?”

Simakadze wamphendvula watsi: “Yebo, hamba, ngobe ngitawanikela esandleni sakho.”

₁₁Ngako Davide kanye nemadvodza akhe wenyukela eBhali Pherasimu, wafike walwa nawo, wawehlula. Wakhuluma watsi: “Nkulunkulu utibhidlite ngesandla sami watehlula titsa tami, watikhukhula njengekukhukhula kwazamcolo.” Ngako leyo ndzawo yetsiwa libito kwatsiwa yiBhali Pherasimu. ₁₂EmaFilisti abesabaleke ashiya bonkulunkulu bawo khona lapho, Davide wakhipha umyalo kutsi babashise ngemlilo.

₁₃Aphindza emaFilisti eta atawuhlasela leso sigodzi. ₁₄Ngako Davide waphindze wabuta kuNkulunkulu, Nkulunkulu wamphendvula watsi: “Ungenyukeli lapho, kodvwa watungelete ngemuva, bese uwahlasela ngembili kwetihlahla tebhalisamu. ₁₅Utawutsi ungeva tigi tekushuca kwawo lena enhla nato letihlahla tebhalisamu, uphume uyewuhlasela, ngobe loko kutawube kusho kutsi Simakadze sewuhambe embili kuyawubulala emabutfo emaFilisti.” ₁₆Ngako Davide wenta loko Nkulunkulu labemyale kutsi akwente, emaFilisti bawabulala yonkhe indlela kusukela eGibeyoni kuze kufike eGezeri.

₁₇Ludvumo lwaDavide lwandza nawo onkhe lawo mave, naSimakadze wenta tonkhe tive tamesaba.