Thoko ya Ntlo ya Modimo le tshepiso ya Morena ho Davida

132¹Sefela sa ho nyolohela Jerusalema.

Morena, ako hopole Davida,

le ho hlopheha hohle ha hae,

²kamoo a neng a hlapanye,

a hlapanyetsa Morena kateng,

a ikana ho Ya Matla,

Modimo wa Jakobo,

³a re:

“Nke ke ka kena ka tlung ya ka,

kapa ka paqama diphateng tsa ka;

⁴mahlo a ka

a ke ke a fumana boroko,

le dintshi tsa ka

di ke ke tsa tutubala,

⁵ho fihlela

ke fumanela Morena sebaka,

ke fumanela Ya Matla Leaho,

Ya Matla, Modimo wa Jakobo.”

⁶Areka re e utlwetse Eferata,

ra e fumana masimong a Jaare.

⁷A re keneng ka Leahong la hae,

re itihele kapele ho yena.

⁸Tloo, Morena,

o ye sebakeng sa hao sa phomolo,

wena le areka

e bontshang matla a hao.

⁹Baprista ba hao ba apeswe ho loka,

batshepuwa ba hao ba etse ditlatse.

¹⁰Ka baka la mohlanka wa hao Davida,

o se ke wa furalla

Motlotsuwa wa hao.2 Dik. 6:41,42

¹¹Morena o ile a hlapanyetsa Davida,

a ke ke a kwenehela tshepiso,

tshepiso ena ya nnete,

a re: “E mong

wa bana ba theka la hao,

ke tla mmea teroneng ya hao.2 Sam. 7:12-16
Pes. 89:4,5
1 Dik. 17:11-14
Dik. 2:30

¹²Ha bara ba hao

ba ka boloka selekane sa ka,

ba latela ditemoso

tseo ke ba neileng tsona,

le bara ba bona ba tla dula teroneng,

teroneng ya hao kamehla.”

¹³Morena o ikgethetse Sione,

o ratile hore e be leaho la hae;

¹⁴a re: “Sena ke sebaka sa ka

sa phomolo sa kamehla,

ke tla aha mona

hobane ke ratile jwalo.

¹⁵Ke tla hlohonolofatsa Sione ka nala,

mafutsana a yona ke a fepe,

ke a fepe, a kgore.

¹⁶Baprista ba yona

ke tla ba apesa pholoho,

batshepuwa ba yona

ba etse ditlatse.

¹⁷“Teng ke tla bea setloholo sa Davida,

ke se bee hore e be kgosi e matla,

ke lokisetse

Motlotsuwa wa ka lebone.1 Dikg. 11:36

¹⁸Dira tsa hae ke tla di apesa dihlong;

athe yena hloohong ya hae

ho tla kganya mofapahlooho wa hae.”

Lerato la bana ba motho

133¹Pesalema ya Davida. Sefela sa ho nyolohela Jerusalema.

Bonang, ho hotle,

ho monate hakaakang,

ha bana ba motho

ba phedisana ka kgotso!

²Ho jwaloka ole ya bohlokwa,

ole e tlotsang hlooho,

e keleketlelang ditedung,

ditedung tsa Arone,

e lepellelang molaleng

wa seaparo sa hae.

³Ho jwaloka phoka ya Heremone,

e lalang hodima dithaba tsa Sione;

ke moo Morena a faneng

ka tlhohonolofatso ya hae teng,

e leng bophelo,

bophelo ba kamehla le mehla.

Balebedi ba Tempele ba boke Morena

134¹Sefela sa ho nyolohela Jerusalema.

Tloong, le boke Morena,

lona bahlanka bohle ba Morena,

ba emang ka Tlung ya Morena,

ba emang ka teng ka masiu wohle.

²Phahamisang matsoho a lona,

le a phahamisetse Sehalalelong,

le boke Morena.

³Morena a ke a o hlohonolofatse,

a o hlohonolofatse a le Sione,

yena ya entseng

mahodimo le lefatshe.