Sesotho 1989 (SO) (SSO89SO)
105

Botshepehi ba Modimo ha bo fetohe

1051Bokang Morena,

le rapele lebitso la hae,

le tumise diketso tsa hae,

le di tumise hara ditjhaba.

2Mmineleng, le mo roke,

le nahane dimakatso tsa hae tsohle.

3Ithoriseng ka lebitso la hae,

lebitso la hae le halalelang,

pelo tsa ba batlang Morena

di ke di thabe.

4Batlang Morena le matla a hae;

le nne le batle fahleho sa hae,

le se batle kamehla le mehla.

5Hopolang dimakatso tsa hae

tseo a di entseng,

mehlolo ya hae,

le dikahlolo tseo a di boletseng,

6lona ba leloko la Aborahama,

mohlanka wa hae,

lona bana ba Jakobo,

bao a ikgethetseng bona.

7Morena ke yena Modimo wa rona,

ke yena ya ahlolang lefatshe lohle.

8Ha a lebale selekane sa hae

le ka mohla,

tshepiso eo a e entseng,

a e etsetsa meloko e sekete;

9selekane seo a se entseng,

a se etsa le Aborahama,

le kano eo a e entseng,

a e etsetsa Isaka,Tshim. 12:7
17:8
26:3

10hore e be molao o tiileng ho Jakobo,

le lekane sa kamehla yohle

ho Iseraele,

11ha a re:

“Ke tla o nea naha ya Kanana,

e le lefa leo ke o abelang lona.”Tshim. 28:13

12Ha ba ne ba sa le mmalwana,

e le bajaki ba seng bakae naheng eo,

13ba ntse ba lelera hara ditjhaba,

ba tloha mmusong o mong,

ba eya ho o mong,

14Modimo ha a a ka a dumela,

a dumella motho hore a ba tube,

mme ka baka la bona

a kgalema dikgosi, a re:

15“Le se ke la ama

batlotsuwa ba ka,

le se ke la etsa

baporofeta ba ka hampe.”Tshim. 20:3-7

16Jwale a dihela tlala lefatsheng,

dijo tsohle tse ba phedisang

a di fedisa;Tshim. 41:53-57

17yaba o romela monna e le selelekela:

Josefa a rekiswa ho ba lekgoba.Tshim. 37:28
45:5

18Ba mo hlokofatsa

ka ho mo tlama maoto ka ditshepe,

ba mmofa ka mahlaahlela,

19ho fihlela se etsahala,

seo a se boletseng e sa le pele,

mme a pakwa

ke lentswe la Modimo.Tshim. 39:20 — 40:23

20Kgosi ya laela hore a tlamollwe,

mmusi wa ditjhaba a mo lokolla.Tshim. 41:14

21Ya mo etsa mookamedi

wa lelapa la yona,

le mmusi wa tsohle

tseo e di ruileng,Tshim. 41:39-41

22a tle a rute mahosana

ho ya ka thato ya hae,

a hlalefise baholo

ba setjhaba sa yona.Tshim. 46:6
47:11

23Yaba Iseraele o fallela Egepeta,

Jakobo a jaka naheng ya Kama.

24Modimo a ngatafatsa setjhaba sa hae,

a se ngatafatsa haholo,

a se matlafatsa ho feta dira tsa sona.

25A fetola pelo tsa tsona,

tsa hloya tjhaba sa hae,

tsa sebetsa bahlanka ba hae

ka bolotsana.Phal. 1:7-14

26A romela Moshe, mohlanka wa hae,

le Arone eo a mo kgethileng.Phal. 3:1 — 4:17

27A etsa dipontsho tsa hae ka bona,

le dimakatso tsa hae

naheng ya Kama.

28A romela lefifi, mme ha fifala;

empa Baegepeta ba hanyetsa,

ba hanyetsa polelo tsa hae.Phal. 10:21-23

29Metsi a naha ya bona

a a fetola madi,

a bolaya le ditlhapi tse ho wona.Phal. 7:17-21

30Naha ya bona

ya nyeunya dihohwana,

esita le ka matlung

a dikgosi tsa bona.Phal. 8:1-6

31A laela, ha hlaha diboba,

le menwang, naheng yohle ya bona.Phal. 8:16,17,20-24

32Bakeng sa pula a ba nesetsa sefako,

mollo wa lehadima

wa wela naha ya bona.

33A senya morara wa bona le feiye,

a roba difate tsa naha ya bona.Phal. 9:22-25

34A laela, ha hlaha ditsie,

le bookgolane bo se nang palo.

35Tsa kumola jwang bohle

ba naha ya bona,

tsa kokona tsohle

tse behwang ke naha.Phal. 10:12-15

36A bolaya matsibolo wohle

a naha ya bona,

bana ba bona ba matswathaka.Phal. 12:29

37A ntsha Baiseraele ba kakatetse,

ba kakatetse silefera le kgauta,

ho se ya tsiapaneng

hara meloko ya bona.

38Egepeta ya thabela ho falla ha bona,

hobane e ne e tshohile haholo.Phal. 12:33,36

39A phuphuthisa leru, la ba kwahela;

mollo wa ba bonesetsa bosiu.Phal. 13:21,22

40Ba kopa,

yaba o ba tlisetsa dikwekwe;

a ba kgorisa ka bohobe

bo tswang mahodimong.Phal. 16:2-15

41A petsola lefika, metsi a phorosela;

a phalla dibataolong eka ke noka.

42Ke hobane o ne a hopotse tshepiso,

tshepiso ya hae e halalelang,

ho Aborahama, mohlanka wa hae.Phal. 17:1-7
Dipa. 20:2-13

43A ntsha setjhaba sa hae ka nyakallo,

bakgethwa ba hae

ka ditlatse tsa thabo.

44Yaba o ba nea naha tsa baditjhaba,

ba ja lefa la mofufutso

wa merabe eo,Josh. 11:16-23

45hore ba tle ba boloke ditaelo,

ba boloke taelo tsa hae,

ba hlomphe melao ya hae.

Haleluja!