Tsela ya ba lokileng le tsela ya ba kgopo

1¹Ho lehlohonolo motho

ya sa lateleng dikeletso

tsa ba kgopo,

ya sa tsamayeng

tseleng ya baetsadibe,

ya sa duleng mokgatlong wa basomi;

²a mpa a thabela Molao wa Morena,

Molao oo a o nahana

motsheare le bosiu.

³Eo o jwaloka sefate se hlomilweng

pela metsi a nwesetsang,

se behang ditholwana

ka nako ya tsona,

seo mahlaku a sona a sa poneng.

Yena o atleha ho tsohle

tseo a di etsang.Jer. 17:8

⁴Ba kgopo bona ha ba jwalo;

empa ba jwaloka mmoko

o fefolwang ke moya.

⁵Kahoo ba kgopo ba ke ke

ba phema kahlolo,

baetsadibe ba ke ke

ba balellwa le ba lokileng;

⁶hobane Morena o tseba tsela

ya ba lokileng,

athe tsela ya ba kgopo

e isa timelong.

Motlotsuwa wa Modimo

2¹Moferefere ke wa eng hara ditjhaba?

Matjhaba a rerelang

ntho tsa mafeela?

²Dikgosi tsa lefatshe

di eme ka maoto;

babusi, ba le mmoho,

ba rera Morena

le Motlotsuwa wa hae, ba re:Dik. 4:25,26

³“A re itokolleng ditlamong tsa bona,

re lahleng joko ya bona.”

⁴Ya dutseng teroneng, lehodimong,

o a ba tsheha,

Morena o a ba soma.

⁵Jwale o bua le bona ka kgalefo,

ka bohale ba hae o a ba tshosa, o re:

⁶“Thabeng ya ka e halalelang,

thabeng ya Sione,

nna ke beile kgosi ya ka.”

⁷Yona e re: “A nke ke phatlalatse

taelo ya Morena.

“O itse ho nna: ‘O mora wa ka;

kajeno ke o tswetse.Dik. 13:33
Bah. 1:5
5:5

⁸Nkope, ke tla o nea ditjhaba

e be lefa la hao,

le lefatshe ka bophara ba lona

e be leruo la hao.

⁹O tla di busa ka lere la tshepe,

o di pshatle

jwaloka nkgo ya letsopa.’ ”Tshen. 2:26,27
12:5
19:15

¹⁰Jwale he, halefang, lona dikgosi;

eletsehang, lona babusi ba lefatshe.

¹¹Sebeletsang Morena ka tshabo,

le itihele maotong a hae

ka thothomelo.

¹²Ho seng jwalo o tla halefa,

mme le timelle tseleng ya lona,

hobane kgalefo ya hae

e phakisa ho tuka.

Ho lehlohonolo bohle

ba tshabelang ho yena.