Pheletso ya ba hatellang mafutsana

2¹Ho madimabe ba rerang bolotsana,

ba nahanang bokgopo

ba le diphateng tsa bona!

Ha bosiu bo esa

ba a bo phethathatsa,

hobane ba na le matla

a ho etsa jwalo.

²Ba tswela masimo a batho pelo,

ba a hape,

ba honohele matlo a batho,

ba inkele wona;

ba hatella motho

le ba lelapa la hae,

ba mo hatelle, ba je lefa la hae.

³Ka baka leo, Morena o bua tjena:

“Ke ntse ke rera koduwa,

ke e rerela tjhaba sena,

koduwa eo se ke keng

sa ba sa e phema.

Ha se ka ke sa tsamaya,

sa tsamaya ka boikakaso,

hobane e tla be e le nako,

nako ya tlokotsi.

⁴Mohla tsatsi leo ba tla le soma,

ba le binele kodi-ya-malla

ba re: ‘Re fela re faladitswe,

Morena o re amohile naha ya rona,

a e abela bathopi ba rona.’ ”

⁵Kahoo kahara phutheho,

phutheho ya Morena,

ha ho na ho ba le motho le ya mong

ya tla le arolela naha ka lotho.

Baporofeta ba bohata

⁶Baporofeta ba bohata ba re ho nna:

“Se ke wa re porofetela,

se ke wa porofeta dintho tsena;

Modimo ha a ka ke

a re hlabisa dihlong.”

⁷Na ho ka botswa ntlo ya Jakobo

ha thwe: “Ebe Morena

o feletswe ke mamello?

Na tse tjee di etswa ke yena?”

“Na polelo tsa ka

ha di tlise molemo,

di o tlisetsa ba etsang ho loka?

⁸Empa lona tjhaba sa ka

le iphetotse sera!

Motho wa kgotso

ha a feta ka tsela,

a iphetela, a sa nahane tsa ntwa,

le mo amoha kobo a e apere.

⁹Basadi ba tjhaba sa ka

le a ba leleka,

le ba leleka malapeng,

malapeng a bona a matle;

le amoha bana ba bona tlotla ya ka,

le ba amoha yona ho-ya-ho-ile.

¹⁰Emang, le tsamaye, le tlohe mona!

Baka sena hase sa lona

sa ho phomola,

ka baka la hobane se silafetse,

se senyehile,

se ke ke sa hlola se loka.

¹¹Haeba ya leshano,

ya thetsang, a ka re:

‘Ke porofeta hore veine ya lona

e tla kopotsa,

jwala ba lona

e be bo bongata haholo,’

eo e ka ba yena

moporofeta wa tjhaba sena!”

Baiseraele ba tshepiswa topollo

¹²“Ruri ke tla le phutha kaofela,

ke phuthe lona bohle

ba ntlo ya Jakobo;

ruri masalla a Baiseraele

ke tla a phutha,

ke a kgobokanye

sa nku di kena sakeng,

ke a phuthe

sa mohlape o le makgulong,

e be boiyane

bo phetheselang ba batho.

¹³Pulamadiboho e tla ba etella pele;

ba tla roba mekwallo ya kgoro,

ba itsamaele.

Kgosi ya bona

e tla tswa pele ho bohle,

ka sehloohong sa bona

Morena a itlhomme.”