UJOROMIYA 2

“ ‘Ngikhumbula ukwethembeka kwakho usesemutjha,

ithando lakho usesemlobokazi,

ungilandela erhalawumbeni,

enarheni engatjalwa litho.

₃U-Israyeli gade acwengile kuSomnini,

asilumo sakhe seenthelo zesivuno.

Boke abahlephula kiso baba nomlandu,

behlelwa yihlekelele.’ ”

Kutjho uSomnini.

₄Yizwa ilizwi lakaSomnini wena kumba kaJakopo,

noke nina nkoro zekumba ka-Israyeli.

₅Nakhu okutjhiwo nguSomnini:

“Aboyihlo bangisoleni

kobana bangabeze badede kimi na?

Badlhemadlhema ngemva kwezinto ezililize

nabo bagcina sele balilize.

₆Azange bebabuze bathi,

‘Uphi uSomnini owasikhupha eGibhide

wasirhola erhalawumbeni,

enarheni yebhudu namadonga

okuyinarha yesomiso neyethunzi elesabekako

nengahlalwa muntu na?’

₇Ngimi enganiletha enarheni evundileko,

kobana nizikholise ngeenthelo namanandi wakhona.

Kodwana nathi naningenako nasilaphaza inarhami,

nenza ilifa lami laba sinyenyiso.

₈Abaphristi azange bebabuze bathi,

‘Uphi uSomnini!’

Labo abafundisako azange bangazi,

abelusi bangihlubuka.

Abaphorofidi baphorofida ngoBhali,

badlhemadlhema ngemva kwezinto ezinganabubhadekelo.”

“Ngalokho godu ngiyanimangalela,

iye, ngimangalela iinzukulwana zenu.

₁₀Yamelani eligwini leKitimi, niqale,

thumelani eKhedari, niyelele kuhle:

Into enjengale yakhe yenzeka na?

₁₁Isizwe siyenana ngabozinyana baso,

ngitjho nanyana bangasi nguZimu wamambala na?

Kodwana abantu bami bona napa,

benana uZimu oyiphazimulwabo

ngezinto ezinganabubhadekelo!

₁₂Rareka wena zulu,

ukhene bewumangale khulu!”

Kutjho uSomnini.

₁₃“Mbala abantu bami benze

izinto ezimbi ezimbili:

Bangihlubukile mina,

iye, mina mthombo wokuphila,

bazembela imiphathamanzi,

imiphathamanzi esasambileko

engeze yamumatha amanzi!

₁₄“U-Israyeli lo ulikhoboka,

iye, likhoboka lokubelethwa na?

Alo, kubayini-ke selaphenduke ipango?

₁₅Amabhubezi abhodle phezu kwakhe,

iye, abhodle ngelizwi elikhulu.

Enze inarhakhe yaba libhudu,

imizakhe irhayiliwe, ayinabahlali.

₁₆Amadoda weMemfisi neweTarhipanirhesi

adle woke amadlelwakho.

₁₇Awukazidoseli amanzi ngomsele

lokha nawufulathela uSomnini uZimakho

nakurhola endleleni na?

₁₈Alo, uzakuzuzani endleleni eya eGibhide,

kobana uyokusela amanzi weTjhirhori na?

Uzakuzuzani endleleni eya e-Asiriya

kobana uyokusela amanzi eYufrathe na?

₁₉Ubukhohlakali bakho buzakuhlunguphaza,

ukuhlubuka kwakho kukukhalime.

Yelela-ke ulemuke

kobana kumbi begodu kumunyu

nawuhlubuka uSomnini uZimakho,

iye, nangingasakwenzi kobana ungesabe.”

Kutjho uSomnini uSomandla onguMninimandlawoke.

₂₀“Wephula ijogi lakho kade,

wadabula nemitja yakho,

wathi, ‘Angizukulotjha!’

Ngambala komunye nomunye umbundu ophakamileko

nangaphasi komunye nomunye umuthi ohlaza,

walala lapho njengengwadla.

₂₁Mina ngakutjala usidiribe sekhethelo,

uphelele usitjalo esithembekako.

Alo, uphenduke njani-ke phambi kwami

waba sidiribe sommango esinesivunda na?

₂₂Nanyana ungahlamba ngesoda,

usebenzise isibha esinengi,

ibala lecala lakho lihlala liphambi kwami.”

Kutjho uSomnini uSomandla.

₂₃“Ungatjho njani uthi,

‘Awa, mina angikasilaphali!

Akhange ngidlhemadlheme ngemva kwaboBhali’?

Qala bona bewuziphethe njani emrhobeni,

cabangisisa ngokwenzileko.

Ufana nekamela esikazi eyehla yenyuka;

₂₄iphundlukela erhalawumbeni

ifamula iimpumulo inukelele ummoya.

Ngubani ongayivimba nasele ibilelwa ziingazi na?

Zoke eziduna eziyifunako azidingi ukuzikhathaza:

Ngesikhathi sayo sokuzekwa

ziyifunyana ngobuduze.

₂₅Mina ngathi,

‘Ungagijimi bewudatjukelwe manyathelo,

nomphimbakho bewome.’

Kodwana wena wathi, ‘Akusizi ngalitho!

Awa, mina ngizithandela abatjhili

nje-ke kumele sengidlhemadlheme ngemva kwabo.’

₂₆“Njengesela elineenhloni nalibanjiweko,

injalo nekumba ka-Israyeli yaba neenhloni,

yona, amakhosayo neenkhulu zayo,

abaphristi kanye nabaphorofidi bayo.

₂₇Bathi esigodweni, ‘Wena ungubabami’,

elitjeni bathi, ‘Wena wangibeletha’.

Bangifulathele, bangifihlela ubuso babo.

Kodwana ngesikhathi sesizi labo

bathi, ‘Yewize usisindise!’

₂₈Baphi-ke abozinyana owazenzela bona

wena Juda?

Abeze phela nakube bangakusindisa

ngesikhathi sesizi lakho!

Angithi wena unabozinyana abanengi

njengamadorobhakho, Juda.

₂₉“Kubayini ningisola?

Noke nina ningihlubukile.”

Kutjho uSomnini.

₃₀“Ngimadlhe phasi abantwabenu ngelize,

azange bamukele ukusolwa.

Isabulenu irhiribidele abaphorofidi benu

njengebhubezi elidabudabulako.”

₃₁Isizukulwaneso ngini!

Nje-ke, yelelani ilizwi lakaSomnini nalithi:

“Ngibe lirhalawumba ku-Israyeli,

namkha inarha enobumnyama obukhulu na?

Ngitjho ngombana abantu bami bathi,

‘Awa, kwanjesi sesifikile

asizukubuyela kuwe erhalawumbeni.’

₃₂Intombi vane kheyikhohlwe ubuphaziphazi bayo

nomlobokazi ivunulwakhe yomtjhado na?

Kodwana napa abantu bami bangikhohliwe,

bekwaba malanga angabalekiko.

₃₃“Maye, unekghono lokufuna ithando!

Ngitjho neengwadla zingafunda kuwe!

₃₄Ezambathweni zakho

kufunyanwa iingazi zabamsulwa, abadududu.

Azange ubabambe bagqekeza,

kodwana phezu kwakho koke lokhu

ube nesandla.

₃₅Nokho uthi, ‘Awa, mina anginamlandu,

itukuthelo kaZimu ikude nami.’

Qala-ke, ngizakugweba

ngombana uthi, ‘Mina anginasono.’ ”

₃₆Kubayini ugwilike lula na?

Uzakudaniswa yiGibhide

njengombana udaniswe yi-Asiriya.

₃₇Godu ukusuka lapho

uzakuphuma uthwele imikhono ehloko

ngombana uSomnini ubalahlile labo othembele kibo;

angeze waphumelela.