Sepedi 2000 (NSO00)
3

Boitshwaro bja Mokriste

31O gopotše badumedi gore ba ikokobetše go balaodi le babuši, ba ba theeletše, ba ikemišetše go dira tše dibotse ka mehla, 2ba se senye motho leina, ba se rumolane, e be ba botho, mme ka mehla ba bonale e le ba boleta go bohle. 3Gobane le rena re kile ra ba mašilo, ra ba le lenyatšo, ra aroga, ra laolwa ke ditumo le mathabo a mehutahuta. Re be re phela bokgopong le lehufeng; re be re hloilwe, le rena re hloyane. 4Eupša e rile ge botho bja Modimo, Mophološi wa rena, le go rata batho ga gagwe di bonala, 5a re hlakodiša. E be e se ka lebaka la mediro ye e lokilego ye re e dirilego, eupša e be e le ka lebaka la kgaugelo ya gagwe ge a re hlakodiša. O re hlakodišitše ka go hlatswiwa ga rena ra tswalwa lefsa, ra ba ra fiwa bophelo bjo bofsa ka Moya wo Mokgethwa. 6Modimo o re tšhetše Moya wa gagwe ka bontši ka Jesu Kriste, Mophološi wa rena, 7gore ka kgaugelo ya gagwe re tle re lokafatšwe gomme re rue bophelo bjo bo sa felego bjo re bo holofetšego. 8Moo ke nnete.

Ke rata gore taba tše o di bolele o tiišitše, gore ba ba dumelago go Modimo ba kgothalele go dira mediro ye mebotse ye e loketšego gape e holago mang le mang. 9O kgaogane le dikgang tša botlaela, le mananeo a borakgolokhukhu, le diphapano, le dintwa mabapi le melao ya Moshe. Tšohle tšeo ga di na mohola, ke tša lefeela. 10Moaroganyi o mo kgale gatee goba gabedi, e be o mo tlogela ka seripa. 11O a tseba gore motho yo mobjalo o arogile, gomme ka sebe seo sa gagwe o a itahla.

Ditaelo tša mafelelo

12

3:12
Dit. 20:4
Baef. 6:21-22
Bakol. 4:7-8
2 Tim. 4:12
Ge ke romile Artemase goba Tigikose go wena, o itlhaganele o tle go nna kua Nikopolise, ka gobane ke ikemišeditše go yo jela marega gona. 13
3:13
Dit. 18:24
1 Bakor. 16:12
O leke ka mo o ka kgonago ka gona go thuša Tsenase, ramangwalo, le Apolose go tšea leeto la bona, gomme o bone gore ba na le tšohle tše ba tlago di nyaka. 14Batho ba gaborena ba swanetše go itlwaetša go dira mediro ye mebotse, gore ba tle ba kgone go thuša ka tše di tlogago di nyakega; ba se ke ba phela bophelo bjo bo se nago mohola.

15Ka moka ba ba nago le nna mo ba a go dumediša. O dumediše badumedikarena ba ba re ratago.

A Modimo a le gaugele bohle.