Sepedi 2000 (NSO00)
84

Go hlologela ngwako wa Modimo

Go tsebišwa moopediši gore e opelwe e letšwa ka diletšo. Ke pesalome ya Bakorage.

841Ke rata Tempele ya gago bjang,

wena Modimo Ramaatlaohle!

2Ke a duma ebile ke hlologetše kudu

go ba ka kgorong ya Tempele ya Morena.

Ke hlabela Modimo yo a phelago mekgolokwane ka pelo ya ka ka moka.

3Ešita le diphorogohlo di agile dihlaga,

le dipeolane di na le magae;

di fepa mafotwana a tšona ka go ona kgauswi le dialetare tša gago,

wena, Morena Ramaatlaohle,

Kgoši ya ka le Modimo wa ka.

4Go lehlogonolo ba ba phelago Tempeleng ya gago;

ba ba dulago ba go reta gona. Sela

5Go lehlogonolo ba o lego maatla a bona,

ba ba fišegelago go tšea leeto

la go yo go direla thabeng ya Sione.

6Ge ba tshela moedi wa Mekgokgopha84:6 “moedi wa Mekgokgopha” E be e le felo mo go omilego. wona o phulega methopo;

pula ya tsheola e a o talafatša.

7Ba tia maatla ba tieletše leetong la bona;

ba tla hlaga pele ga Modimo kua Sione.

8Kwaa thapelo ya ka,

Morena Modimo Ramaatlaohle.

E theetše, wena Modimo wa Jakobo!

9Hlokomela mošireletši wa rena, hle, Modimo;

eba yo botho go kgoši ye o e beilego ye.

10Go hlwa tšatši le tee ka kgorong ya Tempele ya gago

go phala go hlwa matšatši a sekete mogongwenyana.

Nka upša ka ema mojako wa Modimo wa ka,

go na le gore ke dule malapeng a bakgopo.

11Morena ke Mophediši le Mošireletši wa rena;

o a re gaugela,

a dira gore re hlomphege.

Badiraboloki ga a ba kone tše botse.

12Modimo Ramaatlaohle,

go lehlogonolo bao ba go botago!