Sepedi 2000 (NSO00)
79

Go rapela Modimo gore a phološe setšhaba sa gagwe

Ke pesalome ya Asafo.

791

79:1
2 Dikg. 25:8-10
2 Dikr. 36:17-19
Jer. 52:12-14
Modimo,

baditšhaba ba šwahletše ka nageng ya gago;

ba hlompholotše Tempele ya gago ye kgethwa;

Jerusalema ba e fetotše mašope.

2Ditopo tša bahlanka ba gago ba di lahletše manong;

ba gafetše ditopo tša babotegi ba gago dibata.

3Madi a bona a etša meetse go dikologa Jerusalema,

gomme wa go ba boloka a hlokega.

4Re segwa ke ditšhaba tše di agišanego le rena,

re fetogile dikwero le dikgegeo go ba ba bapilego le rena.

5O tla re galefela go fihlela neng, Morena?

Na e tla ba go ya go ile?

Kgane bogale bja gago bo tla no fela bo re tukela boka mollo?

6Kgalefo ya gago e thenolele

godimo ga ditšhaba tše di sa go dumelego,

le mebušo ya ba ba sa go rapelego.

7Gobane ke bona ba go re fediša,

rena ditlogolo tša Jakobo,

mme ba senya naga ya gaborena.

8O se re otlele dibe tša borakgolokhukhu ba rena;

re šokele, gobane re feletšwe ke tshepo.

9Re thuše, hle, Modimo,

Mophološi wa rena,

gore re tle re go godiše;

re phološe, o re swarele dibe tša rena,

ka ge o le Modimo wa lešoko.

10Baditšhaba ba reng ba re botšiša ba re:

“Modimo wa lena o kae?”

Re bone ge o ba tsebiša gore o lefeletša bahlanka ba gago ka ge ba ba bolaile.

11Nke o ele dillo tša mathopša hloko,

gomme ba ba ahloletšwego lehu o ba phološe ka maatla a gago a magolo.

12Ditšhaba tše di agišanego le rena o di lefiše gašupa nyefolo ye ba go nyefotšego ka yona, Morena.

13Ke mo rena, setšhaba sa gago,

mohlape wo o o dišago,

re tlago go leboga go iša le go iša,

ra anegela ditlogolo le ditlogolwana tša rena ka mo o swanelwago ke go tumišwa ka gona.

80

Setšhaba se rapelela go atlwa gape

Go tsebišwa moopediši gore ke pesalome; e opelwe ka modumo wa kopelo “Matšoba”. Ke bohlatse bja Asafo.

801

80:1
Eks. 25:22
Re hlwaele tsebe, hle,

Modiša wa Israele.

Wena wa go etetša ditlogolo tša Josefa boka mohlape,

wena o dutšego godimo ga bakerubi,

iponatše ka letago

2go ba kgoro ya Efraime,

le ya Benjamene,

le ya Manase.

Utolla maatla a gago o tle o re thuše.

3Boela o re atle, hle, Modimo,

o re edišetše sefahlego,

ke mo re tlago phologa.

4Morena, Modimo Ramaatlaohle,

na o tla re galefela go fihlela neng,

rena setšhaba sa gago se se go rapelago?

5Etse o re file meokgo ya ba dijo tša rena,

wa re noša yona ka bontši.

6O re fetotše sebakwa sa ditšhaba tše di bapilego le rena;

re kodutlwa ke manaba a rena.

7Boela o re atle, hle,

Modimo Ramaatlaohle,

o re edišetše sefahlego,

ke mo re tlago phologa.

8O epolotše morara Egepeta,

wa tla wa o bjala mo o bego o rakile ditšhaba gona.

9Wa o kgorela lebala mo o bego o o bjala gona,

medu ya swara,

gomme wa tlala naga.

10Dithaba tša apešwa ke moriti wa wona,

mesedere ya go letla ya pipša ke dikala tša wona.

11Wa letla dikala tša fihla lewatleng,80:11 “lewatleng” Ke go re lewatleng la Mediteraniene.

mahlogedi a wona le wona a fihla nokeng.80:11 “nokeng” Ke go re nokeng ya Yufratese.

12O reng o kgerešitše morako wa wona,

gore bafeti ba tsela ba tle ba o kge dikenywa?

13Dikolobe tša naga di a o senya;

o lewa ke diphoofolo tša lešoka.

14Re boele, hle,

Modimo Ramaatlaohle;

okamela mono fase o le legodimong,

o bone morara wo,

mme o boele o o babalele.

15Šireletša se o se bjetšego ka seatla sa gago.

16Ba ba o remilego mme ba o fiša

o ba tomolele mahlo o ba fediše.

17Šireletša setšhaba se o se kgethilego,

sona setšhaba se o itiišeditšego sona,80:17 “Šireletša ... sona” goba “Šireletša yo o mo kgethilego, yo o itiišeleditšego yena”

18ke mo re ka se sa go furalelago.

Re lote re phele,

ke mo re tlago go rapela.

19Boela o re atle, hle, Morena,

Modimo Ramaatlaohle;

o re edišetše sefahlego,

ke mo re tlago phela.

81

Koša ya monyanya

Go tsebišwa moopediši gore ke pesalome ya Asafo; e opelwe e letšwa ka diletšo.

811Hlalalelang Modimo,

yena e lego maatla a rena;

gobelang Modimo wa Jakobo megobo.

2Kgerešang koša,

le pidinyeng meropa;

letšang koša ye bose ka dikgapa le diharepa.

3

81:3
Num. 10:10
Kgabubudišang phalafala ge ngwedi o dutše le ge o ile swiswing –

mohla wa monyanya wa rena.

4Gobane ye ke taelo mo go Baisraele,

ke molao wa Modimo wa Jakobo.

5Modimo o o beetše ditlogolo tša Josefa e le taelo

mola a hlasela naga ya Egepeta.

Ke kwa lentšu le ke sa le tsebego le re:

6“Ke le rotše morwalo magetleng,

seroto sela la kgona go se bea fase.

7

81:7
Eks. 17:7
Num. 20:13
Mola le tlaletšwe le be le ntelela,

mme nna ke le hlakodiša.

Ke ile ka le araba ke iphihlile ka lerung la mekidimetšo.

Ke ile ka le leka kua meetseng a Meriba. Sela

8Lena tšhaba sa ka,

theeletšang ge ke le laya.

Lena Baisraele,

nke nkabe le ka theeletša!

9

81:9
Eks. 20:2-3
Doit. 5:6-7
Le se khunamele medimo ye mengwe;

le se obamele medimo e šele.

10Ke nna Morena Modimo wa lena yo ke le ntšhitšego nageng ya Egepeta.

Ke tla le fa tše le di hlokago.

11“Fela setšhaba sa ka sa se ntheeletše,

Baisraele ba gana go nkwa.

12Ka gona nna ka ba lesa ba gogwa ke bonganga bja bona.

13Nke nkabe tšhaba sa ka se ntheeletša,

nke nkabe Baisraele ba phetha thato ya ka!

14Ke be ke tla potlaka ka hlasela bahloi ba bona,

ka kokobetša manaba a bona.

15Bantlhoi ba be ba tla ithapeletša go nna,

eupša kotlo ya bona e be e ka se fele.

16Tšhaba sa ka sona ke be ke tla se fepa ka dijo tše dibotse,

ka ba khoriša le todi,

setšwamaswikeng.”