Sepedi 2000 (NSO00)
64

Thapelo ya go kgopela tšhireletšo

Go tsebišwa moopediši gore ke pesalome ya Dafida.

641Hle, Modimo,

nkwe ge ke go llela;

ke tšhaba lenaba,

ntšhireletše ke se bolawe.

2Ntšhireletše ge bakgopo ba ntakane,

ge badiratšempe ba tsoša mašata.

3Ke bona ba go lootša maleme boka ditšhoša,

ba hlaba ka mantšu a bohloko a nkego mesebe.

4Ba thuntšha mohlokabosodi ba mo laletše;

ba mo thuntšha ka potlako ba sa boife.

5Ge ba loga maanomabe ba a hlohleletšana;

ba lakana go thea difu ba sa bonwe, ba re:

“Re64:5 Diphetolelo tše dingwe tša kgale di re “Re” Seheberu se re “Di”. tla bonwa ke mang?”

6Ba a lakana ba re:

“Re logile maanomaano.”

Ruri, tša ka monaganong le tša ka pelong ya motho ga di tsebje.

7Fela Modimo o ba thuntšha ka mesebe,

mme ba ikhwetša ba gobetše.

8Ba itahla ka tše ba di bolelago,

mme bohle ba ba ba bonago ba šikinya dihlogo ba kgotsa.

9Batho bohle ba tla gakgamala,

ba bega ditiro tša Modimo,

mme ba kwešiša gore o di diretšeng.

10Baloki ba tla thabela tše di dirilwego ke Morena mme ba tšhabela go yena;

bohle ba dipelo tše di lokilego ba tla mo reta.