Sepedi 2000 (NSO00)
27

Morena ke Mošireletši wa ka

Ke pesalome ya Dafida.

271Morena ke seetša sa ka le Mophološi wa ka –

nka se boife motho.

Morena ke botšhabelo bja ka –

nka se tšhoge motho.

2Ge batho ba babe ba ntlhasela gore ba mpolaye,

e lego bona batlaiši le manaba a ka, go thetšwa bona ba wa.

3Le ge madira a ka ntikanetša,

nka se ke ka boifa;

le ge manaba a ka ntlhasela,

ke tla no fela ke botile Modimo.

4Ke selo se tee se ke se kgopetšego Morena,

seo ke sona ke tlago se nyaka:

ke go ba ka ngwakong wa Morena bophelo bja ka ka moka,

go bogela botho bja gagwe,

le go kgahlwa ke bjona.

5Mohla wa matshwenyego o tla ntšhireletša ka ngwakong wa gagwe,

o tla nkutamiša ka Tempeleng ya gagwe ka bolokega;

o tla nkuka a mpea godimo ga lerako.

6Ka gona ke tla fenya manaba a a ntikologilego;

ke tla duduetša mekgolokwane ke dira dihlabelo Tempeleng;

ke tla opela ke tumiša Morena!

7Ntshekegele tsebe, Morena,

ge ke go llela,

nkgaugele o nkarabe!

8Ke gopola taelo ya gago ye e rego:

“Tlaang le nkhunamele.”

Ka gona ke tletše go go khunamela,

wena Morena.

9O se ke wa nkhutela, hle!

O se ke wa nthaka o nkgalefetše,

nna, mohlanka wa gago.

O hlwa o nthuša;

hle, se ntlogele, se ntahle,

wena Modimo, Mophološi wa ka!

10Le ge tate le mme ba ka ntahla,

Morena yena o tla mpabalela.

11Nthute ditsela tša gago, Morena,

mme o ntlhahle tseleng ya polokego,

gore manaba a ka a se atlege.

12Hle, se nkgafele thatong ya manaba a ka,

gobane dihlatse tšeo tša maaka di nkemetše ka maoto,

di ntsošetša mpherefere.

13Ge nkabe ke se ka dumela gore ke tla bona botho bja Morena

mo bophelong bjo nkabe ke hwile.27:13 “nkabe ke hwile” Seheberu ga se ne mantšu a.

14Bota Morena! O se ke wa tlalelwa!

Ee, bota Morena.

28

Thapelo ya go kgopela thušo

Ke pesalome ya Dafida.

281Morena, wena Montšhireletši,

ke a go bitša, o se nkhomolele.

Ge o sa nkarabele,

ke tla ba bjalo ka ba ba theogelago bodulabahu.

2Hle, o nkwe ge ke go llela ke nyaka thušo,

ke phagamišeditše matsogo Felong mo Gokgethwakgethwa ga Tempele ya gago.

3O se mpheleletše le bakgopo,

batho ba ba dirago tše mpe,

ba ba bolelago gabotse le bangwekabona,

etšwe pelo tša bona di tletše bobe.

4

28:4
Kut. 22:12
Ba otle ka lebaka la tše ba di dirilego,

ka lebaka la mediromebe ya bona.

Ba otle ka lebaka la ditiro tša bona;

ba dire se se ba lebanego.

5Ga ba šetše ditiro tša Morena, goba tše Morena a di hlodilego;

ka gona yena o tla ba fediša,

a se sa ba tsoša.

6A go retwe Morena!

O nkwele ge ke mo llela ke nyaka thušo.

7Morena o mpha maatla,

ebile ke kotse ya ka.

Ke botile yena, o a nthuša;

ka gona ke a gobela,

ke mo reta ka sefela.

8Morena o fa setšhaba sa gagwe maatla.

Motlotšwa wa gagwe o tšhabela go yena mme a phološwa.

9Phološa setšhaba sa gago, Morena,

o šegofatše bao e lego ba gago.

Eba modiša wa bona,

o ba babalele go ya go ile.

29

Modumo wa Morena ka gare ga ledimo

Ke pesalome ya Dafida.

291

29:1-2
Pes. 96:7-9
Retang Morena,

lena dibopiwa tša legodimong!

Mo reteleng letago la gagwe le maatla a gagwe!

2Retang Morena wa letago ka mo go mo lebanego.

Obamelang Morena

le apere diaparo tše dikgethwa!

3Modumo wa Morena o kwala godimo ga mawatle;

Modimo wa letago o a duma;

Morena o duma ka godimo ga phamphamadiba.

4Modumo wa Morena ke wo maatla;

modumo wa Morena ke wa borena.

5Modumo wa Morena o robaganya mehlare ya mesedere,

Morena o robaganya le mesedere ya Lebanone.

6O kganakgantšha dithaba tša Lebanone boka namane;

Sirione29:6 “Sirione” Le ke leina la thaba ya Hermone ka Sefenikia. o e tlolatlodiša boka pholwana ya nare.

7Modumo wa Morena o gadimiša dikgadima.

8Modumo wa Morena o reketliša lešoka;

o reketliša lešoka la Kadeshe.

9Modumo wa Morena o tswadiša tshephe;29:9 “o tswadiša tshephe” Diphetolelo tše dingwe tša kgale di re “o tšokotša meeike”.

o hlobodiša mehlare ya šala e le fela.29:9 Diphetolelo tše dingwe di re “o hlobodiša ... e le fela.” Seheberu se re “o folotšiša dipudi.”

Mola Tempeleng ya gagwe bohle ba re:

“A go tumišwe Modimo!”

10Morena o buša phamphamadiba;

o buša e le kgoši go ya go ile.

11A Morena a fe setšhaba sa gagwe maatla,

a se šegofatše a dire gore se iketle.