Tšohle ke lefeela ge di sa šegofatšwe ke Morena

Ke sefela sa ge go iwa Tempeleng Jerusalema go rapela. Ke sa Solomone.

127¹Ntlo ya se agwe ke Morena,

baagi ba yona ba itapišetša lefeela;

motse wa se šireletšwe ke Morena,

baleti ba wona ba o letela lefeela.

²Ke lefeela ge le itapiša ka tša go iphediša,

le tsoga e sa le bošego,

le diega go robala;

gobane Morena, bao a ba ratago,

o ba direla ba ntše ba robetše.

³Gape bana ke mpho ya Morena;

dikgohlwana ke moputso wa go tšwa go yena.

⁴Barwa bao motho a ba tswalago e sa le yo mofsa

ba swana le mesebe atleng sa mogale.

⁵Go lehlogonolo monna wa kgotlopo ye e tletšego mesebe ya mohuta woo.

A ka se boife ge a rerišana le manaba kgorong ya motse.

Morena o šegofatša ba ba mmoifago

Ke sefela sa ge go iwa Tempeleng Jerusalema go rapela.

128¹Go lehlogonolo bohle ba ba boifago Morena,

ba ba sepelago ka tsela tša gagwe.

²Wena o tla ja tše o di šometšego;

o yo lehlogonolo gomme o tla atlega.

³Mosadi wa gago o tla etša morara wo o enywago ka lapeng la gago;

bana ba gago ba tla swana le mahlogedi a mohlware ge ba potapotile tafola ya gago.

⁴Ruri, motho yo a boifago Morena o tla šegofatšwa ka tsela yeo.

⁵Morena a go šegofatše a le Sione!

Nke o ka bona katlego ya Jerusalema mehleng yohle ya ge o sa phela.

⁶O phele go fihlela o bona ditlogolwana tša gago.

Israele a go rene khutšo!

Thapelo ya gore Modimo a otle manaba a Israele

Ke sefela sa ge go iwa Tempeleng Jerusalema go rapela.

129¹Manaba a ka e sa le a ntshwara gasehlogo go tloga bjaneng bja ka –

a Baisraele ba realo, ba re:

²“Manaba a ka e sa le a ntshwara gasehlogo go tloga bjaneng bja ka,

fela ke ba paletše.

³Mokokotlo wa ka ba o kgathile,

ba o fetoša boleme.

⁴Morena o lokile,

o ntokolotše go bakgopo.”

⁵A bahloi bohle ba Sione ba segišwe batho,

ba bušetšwe morago.

⁶A ba etše bjang bjo bo metšego tlhakeng,

bjo bo ponago bo sešo bja gola.129:6 Mohlomongwe go swanetše go balwa “bo sešo bja gola” Seheberu ga se kwagale gabotse.

⁷Ga bo be le mosegi,

ga bo be le wa go bo bofa digola.

⁸Ga go mofeti yo a tlago ba dumediša a re:

“Morena a le šegofatše!

Re le šegofatša leineng la Morena.”