Thapelo ya go kgopela go lokollwa bothopša

Ke sefela sa ge go iwa Tempeleng Jerusalema go rapela.

126¹Mola Morena a re bušetša Sione re etšwa bothopša,

e be nke re a lora.

²Re be re sega re gobela;

ke ge baditšhaba ba re:

“Morena o ba diretše tše dikgolo.”

³Le bjale, Morena o re diretše tše dikgolo,

gomme ra thakgala.

⁴Morena, re bušetše nageng ya gaborena,

go etša ge o bušetša meela leganateng.

⁵Ba ba bjalago ba lla,

ba tla buna ba gobela.

⁶Yo a yago mašemong a lla a rwele peu,

o tla boa a gobela a rwele puno.