Sepedi 2000 (NSO00)
114

Mehlolo ya mola Baisraele ba etšwa Egepeta

1141

114:1
Eks. 12:51
Ge Baisraele ba tloga Egepeta,

ge ditlogolo tša Jakobo di tloga morafeng wola wa go bolela leleme le šele,

2Juda e ile ya ba tšhaba se sekgethwa sa Modimo,

Israele ya ba mmušo wa gagwe.

3

114:3
Eks. 14:21
Josh. 3:16
Lewatle le rile go di bona la tšhaba,

Jordane ya katakata ka sa morago.

4Dithaba tša tsheletshela boka dikgapa,

meboto ya kganakgana boka dikwanyana.

5Wena lewatle, o tšhabelang?

Wena Jordane, o reng o katakata?

6Lena dithaba,

le reng le tsheletshela boka dikgapa?

Lena meboto,

ke eng le kganakgana boka dikwanyana?

7Wena lefase,

thothomela ge go etla Mong wa gago,

ee, ge go etla Modimo wa Jakobo,

8

114:8
Eks. 17:1-7
Num. 20:2-13
yena a fetolago leswika mogobe wa meetse,

legakabje a le fetola sediba.