Sepedi 2000 (NSO00)
2

21“Bjale, lena baprista, ke a le laya ke re: 2Ge le sa ntheeletše, le sa ikemišetše go ntlhompha, gona ke tla le tlišetša madimabe. Ke realo, nna, Morena Ramaatlaohle. Ditšhegofatšo tše ke le filego tšona le tšona ke tla di fetoša madimabe. Gabotsebotse ke šetše ke di fetošitše madimabe, ka gobane ga se la ikemišetša go ntlhompha. 3Ke tla le hlokiša ditlogolo, ka le phetša difahlego ka mošwang wa diruiwa tše le dirago dihlabelo tša menyanya ka tšona, gomme le tla lahlwa le wona. 4

2:4
Num. 3:11-13
Ke gona le tlago tseba gore taelo ye le e filwe ke nna, gore kgwerano ya ka le baprista, ditlogolo tša Lefi, e se lahlwe.

5

2:5
Num. 25:12
“Ka kgweranong ya ka ke ba tshephišitše bophelo le boiketlo, gomme ke tšona dilo tše ke ba filego tšona, gore ba tle ba ntlhomphe. Ba be ba ntlhompha, ba bile ba mpoifa. 6Ba be ba ruta batho tše di lokilego, e sego tše di fošagetšego. Ba be ba phela le nna ka khutšo; ba be ba ntlhankela ka dipelo tša bona ka moka, le gona ba thuša batho ba bantši go tlogela tše mpe. 7Go ruta batho gore ba ntsebe gabotse ke modiro wa moprista. Batho ba swanetše go ya go yena ge ba nyaka go tseba se e lego thato ya ka, ka gobane ke yena motseta wa ka, nna, Morena Ramaatlaohle.

8“Eupša bjale, lena baprista, le tlogetše tsela ya nnete. Tše le di rutago batho di kgelošitše ba bantši tša ba diriša diphošo. Le lahlile kgwerano yela ke e dirilego le Lefi. Ke realo, nna, Morena Ramaatlaohle. 9Ka gona, le nna ke tla dira gore setšhaba ka moka se le nyatše, se le kokobetše, ka gobane ga le phethe thato ya ka, gomme ge le ruta batho ga le ba sware go swana.”

Setšhaba ga se botegele Modimo

10Kgane Tatagorena ka moka ga se o tee? Na ga se ra bopša ke Modimo o tee? Bjale re reng re lahletšana le gona re nyatša kgwerano ye Modimo a e dirilego le borakgolokhukhu? 11Batho ba Juda ba lahlile kgwerano ya Modimo le bona, ba dira bohlola Jerusalema le nageng ka moka ya Israele. Ba tšhilafaditše Tempele ye Morena a e ratago. Banna ba nyetše basadi ba ba khunamelago medimo e šele. 12Monna yo a dirago taba tša mohuta wo a Morena a tloše ditlogolo tša gagwe ka moka setšhabeng sa Israele, le ge a ka neela Morena Ramaatlaohle dikabelo.2:12 Ka Seheberu temana ye ga e kwagale gabotse.

13Taba ye nngwe ye le e dirago še: Le thapiša aletare ya Morena ka meokgo, le lla le golola ka ge yena a se sa na taba le dibego tša lena, goba a di amogela. 14Le botšiša gore Morena o reng a se sa di amogela. Ke ka lebaka la ge a tseba gore le be le sa botegele basadi ba le ba nyetšego le sa le masogana, etšwe e be e le balekani ba lena ba e tlilego ya ba basadi ba lena, mola le ba holofetša gore le tla ba botegela. 15Kgane Modimo ga se a le kopanya la ba nama e tee le moya o tee?2:15 “Kgane ... moya o tee?” Seheberu ga se kwagale gabotse. Se o be a se direlang? E be e le gore le be le bana ba e lego setšhaba sa Modimo. Ka gona, le hlokomeleng gore go se be le o tee mo gare ga lena yo a sa botegelego mosadi wa gagwe yo a mo nyetšego e sa le lesogana, 16gobane Morena Modimo wa Israele o re: “Tlhalo ke e hloile. Ke hloile yo a dirago mosadi wa gagwe sehlogo se sebjalo. Le hlokomeleng gore le botegele basadi ba lena.”

Letšatši la Kahlolo le batametše

17Le lapišitše Morena ka dipolelo tša lena. Fela le a botšiša le re: “Re mo lapišitše ka eng?” Le mo lapišitše ka go re: “Morena o bona badiradibe bohle e le ba ba lokilego; le gona o a ba rata,” goba ka go botšiša la re: “O kae Modimo yo go thwego o ahlola ka toka?”