Sepedi 2000 (NSO00)
13

Morena o tla otla Baisraele a ba feleletša

131Mehleng ya kgale e be e re ge ba kgoro ya Efraime ba bolela, ba dikgoro tše dingwe ba šie. Ba be ba hlompšha ke Baisraele ba bangwe. Fela ba ile ba ikobela molato ka go khunamela Baale, gomme ka lebaka la sebe seo ba hwa. 2Le gonabjale ba sa iša pele le go dira dibe ka go ipopela medimo ya diswantšho, diswantšhobopša tša silibera tše ba di bopago ka mo ba di bonago ka gona, tšohle di bopša ke bakgoni ba bona. Ke moka ba re: “E hlabeleng didimo!” Aowii, batho ba napile ba khunamela medingwana ya manamane ba e atla! 3Ke ka lebaka leo ba tlago timelela bjalo ka kgodi ya masa, bjalo ka phoka ye e timelelago ge le hlaba. Ba tla etša mooko wo o tšewago ke phefo seboeng, ba swana le muši wo o tupago ka lešoba.

4Morena o re: “Ke bile Morena Modimo wa lena go tloga mola le le Egepeta. Ga le na Modimo yo mongwe ntle le nna. Ntle le nna ga go Mophološi yo mongwe. 5

13:5-6
Doit. 8:11-17
Ke ile ka le hlokomela kua lešokeng, nageng yela ya go omelela. 6Ka le fepa la khora, mme ya re ge le sosometše la ikgogomoša, la ntebala. 7Ka gona ke tla le hlasela boka tau. Ke tla le lalela tseleng bjalo ka nkwe. 8Ke tla le tsogela go etša bere ye e hlakotšwego bana, ka le gagola. Ke tla le kgabutla ka bjako boka tau; ka le rathaganya bjalo ka sebata.

9“Ke tla le fediša, lena Baisraele, gomme le tla hlakodišwa ke mang?13:9 Phetolelo ye nngwe ya kgale e re “le tla hlakodišwa ke mang?” Seheberu se re “mohlakodiši wa lena ke nna”. 10

13:10
1 Sam. 8:5-6
Bjale kgoši ya lena e kae e tle e le hlakodiše metseng yohle ya lena? Ba kae babuši ba lena ba le kilego la kgopela Samuele la re: ‘Re fe kgoši le baetapele!’ 11
13:11
1 Sam. 10:17-24
15:26
Ka gona ka le fa kgoši ke galefile, ka ba ka le amoga yona ke galefile.

12“Sebe sa Baisraele le molato wa bona ke di ngwadile, mme mangwalo a gona ke a lotile. 13Baisraele ba sa na le sebaka sa go phela, fela ba šilofetše mo ba sa bonego mohola wa go se šomiša – ba swana le ngwana yo a lego kgauswi le go belegwa, yo a ganago go tšwa ka popelong ya mmagwe. 14

13:14
1 Bakor. 15:55
Na nka nama ka ba hlakodiša bodulabahu? Nka ba phološa lehung? Hee, lehu, tliša13:14 Diphetolelo tše dingwe tša kgale di re “tliša” Seheberu se re “ke tla ba”. mauba a gago! Tliša lebolela la gago, wena bodulabahu! Setšhaba se nka se sa se šokela. 15Le ge Baisraele ba atlega bjalo ka lehlakanoka ke tla ba romela phefo ya bohlabatšatši ya go tšwa lešokeng, gomme e tla pšheša didiba tša bona le methopo. E tla ba hlakola tšohle tše bohlokwa.