Sepedi 2000 (NSO00)
22

Modimo o laela Abrahama go dira sehlabelo ka Isaka

221

22:1-13
Bah. 11:17-19
Ka morago ga lebaka Modimo a leka Abrahama; a mmitša a re: “Abrahama!” Yena a araba a re: “Ke nna yo!”

2

22:2
2 Dikr. 3:1
Modimo a re: “Tšea morwa wa gago, yo e lego yena a nnoši, Isaka, yo o mo ratago kudu, o ye nageng ya Moria. Fao o ntirele sehlabelo sa go tšhungwa ka moka ka yena thabeng ye ke tlago go laetša yona.”

3Ka le le latelago e sa le bošego Abrahama a phapha dikgong tša sehlabelo, a saletša pokolo ya gagwe, gomme a tloga le Isaka le bahlanka ba babedi. Ba leba felo fao Modimo a mmoditšego gona. 4Ka letšatši la boraro Abrahama a bona felo fao a sa le kgojana. 5Ke moo a itšego go bahlanka: “Šalang mo le pokolo ye. Nna le mošemanyana re tla fetela mola go yo rapela, mme ka morago ra boela mo go lena.”

6Abrahama a rweša Isaka dikgong tša sehlabelo, gomme yena a swara thipa le magala a go gotša mollo. Ge bobedi bja bona ba swere tsela mmogo, 7Isaka a re go tatagwe: “Tate!”

Tatagwe a araba a re: “Eye, ngwanaka.”

Isaka a mmotšiša a re: “Mollo le dikgong šedi, kwanyana ya sehlabelo yona e kae?”

8Abrahama a mo fetola a re: “Modimo o tla inyakela yona, ngwanaka.” Gomme bobedi bja bona ba fela ba swere tsela mmogo.

9

22:9
Jak. 2:21
Ge ba fihla felo fao Modimo a mmoditšego gona, Abrahama a aga aletare, gomme a beakanya dikgong godimo ga yona. A tlema morwa wa gagwe gomme a mmea aletareng godimo ga dikgong. 10Ke moka a tšea thipa gore a mmolaye. 11Eupša morongwa wa Morena a mmitša a le legodimong a re: “Abrahama, Abrahama!”

Yena a araba a re: “Ke nna yo.”

12Morongwa a re: “O se gobatše mošemanyana yoo goba wa mo dira selo. Bjale ke a tseba gore o boifa Modimo, ka gobane ga se wa gana go mo neela morwa wa gago a nnoši.”

13Abrahama ge a lebelela a bona kgapa e tantšwe ka sethokgwaneng ka dinaka. A ya a e tšea mme a dira sehlabelo sa go tšhungwa ka moka ka yona legatong la morwa wa gagwe. 14Abrahama a rea felo fao leina la “Morena o a fa.”22:14 “fa” goba “bona” Gomme le lehono batho ba sa re: “Thabeng ya Morena o a fa.”22:14 “fa” goba “bonwa”

15Morongwa wa Morena a bitša Abrahama la bobedi a le legodimong a re: 16

22:16-17
Bah. 6:13-14
“Morena o re: ‘Ke ena ka nna mong gore ka ge o dirile taba ye gomme o se wa ntima morwa wa gago a nnoši, 17
22:17
Bah. 11:12
ke tla go šegofatša kudu, ka go fa le ditlogolo tše ntši bjalo ka dinaledi tša legodimo goba dithorwana tša lešabašaba lebopong la lewatle. Ditlogolo tša gago di tla fenya manaba a tšona. 18
22:18
Dit. 3:25
Ditšhaba tša lefase ka moka di tla nkgopela go di šegofatša bjalo ka ge ke šegofaditše ditlogolo tša gago,22:18 “Ditšhaba ... gago” Bapetša le Gen. 12:3. ka gobane o phethile taelo ya ka.’ ” 19Abrahama a boela go bahlanka ba gagwe, gomme ba tloga mmogo ba ya Beresheba, mme Abrahama a dula fao.

Ditlogolo tša Nahoro

20Ka morago ga lebaka Abrahama a kwa gore le Milka o belegetše Nahoro, ngwanabo, bana: 21Utse, wa mathomo, le Buse, ngwanabo, le Kemuele, tatagoAramo, 22le Kesede le Haso le Pildashe le Jidelafo le Bethuele, 23tatagoRebeka. Milka o belegetše Nahoro, ngwanaboAbrahama, barwa bao ba seswai. 24Reuma, motlabo wa Nahoro, yena o belege Tebage le Gahama le Tahashe le Maaka.