Sepedi 2000 (NSO00)
16

Hagare le Ishmaele

161Mosadi wa Abramo, Sarai, o be a se a belegela Abramo bana. Fela o be a na le lekgoba la mosetsana la Moegepeta leo leina la lona e bego e le Hagare, 2ka gona Sarai a re go Abramo: “Nna Morena o ntimile thari. O reng o sa robale le lekgoba la ka la mosetsana? Mohlomongwe a ka mpelegela ngwana.” Abramo a dumela kgopelo ya Sarai. 3Ka gona Sarai a mo neela Hagare gore e be mosadi wa gagwe. Ke ge go fetile mengwaga ye lesome Abramo a dutše nageng ya Kanana. 4Abramo a robala le Hagare, mme Hagare a ima. Ge a lemoga gore o imile, a thoma go nyatša Sarai.

5Ke moo Sarai a itšego go Abramo: “Ke molato wa gago ge Hagare a nnyatša.16:5 “Ke molato wa gago ge Hagare a nnyatša” goba “Anke o tlaišege ka lebaka la molato wo o ntirilego wona” Ke nna ka bonna ke go neetšego yena, gomme e sa le go tloga mola a lemogago gore o imile o a nnyatša. A Morena a ahlole gore nna le wena wa phošo ke mang.”

6Abramo a mo fetola a re: “Go lokile, ke lekgoba la gago mme o laolwa ke wena; dira se o se ratago ka yena.” Ke moka Sarai a swara Hagare gasehlogo, Hagare a ba a tšhaba.

7Morongwa wa Morena a gahlanetša Hagare mothopong kua lešokeng tseleng ya go ya Shure, 8gomme a re: “Hagare, lekgoba la Sarai, a o tšwa kae, mme o ya kae?”

A mo fetola a re: “Ke tšhabela mong wa ka, Sarai.”

9Morongwa a re: “Boela go yena gomme o ikokobetše go yena.” 10Ke moo a itšego: “Ke tla go fa ditlogolo tše ntši mo e lego gore ga go yo a ka di balago. 11O tlile go ba le morwa mme o mo ree Ishmaele,16:11 “Ishmaele” Leina le ka Seheberu le ra go re “Modimo o a kwa”. ka gobane Morena o kwele sello sa gago sa tlaišego. 12Fela morwa wa gago e tla ba monna wa go se tlwaetšege, a etša pitsi; o tla lwa le mang le mang, mme mang le mang o tla lwa naye. O tla phela a hloile meloko ya gabo ka moka.”

13Hagare a ipotšiša a re: “Na e ka ba ruri ke bone Modimo mme ka fela ke phela?”16:13 Mohlomongwe go swanetše go balwa “ke bone Modimo mme ka fela ke phela?” Seheberu ga se kwagale gabotse. Ka gona a rea Morena yo a boletšego le yena leina la “Modimo yo a bonago”. 14Ke ka lebaka leo batho ba bitšago sediba seo se lego gare ga Kadeshe le Berede “Sediba sa Mophelaampona”.

15

16:15
Bag. 4:22
Hagare a belegela Abramo morwa, mme Abramo a mo rea leina la Ishmaele. 16Abramo o be a na le mengwaga ye masome a seswai le metšo ye e selelago ka nako yeo.