Kgoši Usia wa Juda

(2 Dikr. 26:1-23)

15¹Ngwageng wa masome a mabedi le metšo ye e šupago wa pušo ya Kgoši Jeroboamo wa Israele, Usia, morwa wa Amatsia, e ile ya ba kgoši ya Juda ²a na le mengwaga ye lesome le ye e selelago, gomme a buša a le Jerusalema mengwaga ye masome a mahlano a metšo ye mebedi. Mmagwe e be e le Jekolia wa Jerusalema. ³O be a dira tše di kgahlago Morena, go no swana le tatagwe. ⁴Eupša dintotoma tšeo go tšona go bego go khunamelwa medimo ya diswantšho a se di phušole, gomme batho ba no tšwela pele le go dira dihlabelo le go tšhuma diorelo fao. ⁵Morena a otla Usia ka bolwetši bja letlalo bja go mo tšhilafatša bjo bo ilego bja mo swara go fihlela a ehwa. O be a dula ka ngwakong wa thokwana a lesišitšwe mediro ka moka ya bogoši, Jotamo, morwagwe, e le mohlokomedi wa mošate, a bile a buša naga.

⁶Tše dingwe tše Usia a di dirilego di ngwadilwe mo go Ditaba tša magoši a Juda. ⁷

Kgoši Sakaria wa Israele

⁸Ngwageng wa masome a mararo a metšo ye seswai wa pušo ya Kgoši Usia wa Juda, Sakaria, morwa wa Jeroboamo, ya ba kgoši ya Israele, gomme a buša a le Samaria dikgwedi tše di selelago. ⁹Yena, go no swana le ba ba bušitšego pele ga gagwe, a dira dibe pele ga Morena. A se ke a tlogela dibe tša Kgoši Jerobeamo, morwa wa Nebate, yo a dirišitšego Baisraele dibe. ¹⁰Shalume, morwa wa Jabeshe, a loga maanomabe a go bolaya Kgoši Sakaria, gomme a mo hlasela a mmolaya kua Jibleamo,15:10 Phetolelo ye nngwe ya kgale e re “kua Jibleamo” Seheberu se re “pele ga batho”. mme a mo hlatlama bogošing.

¹¹Tše dingwe tše Sakaria a di dirilego di ngwadilwe mo go Ditaba tša magoši a Israele.

¹²

Kgoši Shalume wa Israele

¹³Ngwageng wa masome a mararo a metšo ye senyane wa pušo ya Kgoši Usia wa Juda, Shalume, morwa wa Jabeshe, ya ba kgoši ya Israele, gomme a buša a le Samaria kgwedi e tee.

¹⁴Menaheme, morwa wa Gadi, a tloga Tirtsa a ya Samaria, a hlasela Shalume a mmolaya, gomme a mo hlatlama bogošing. ¹⁵Tše dingwe tše Shalume a di dirilego, gotee le ditaba tša maanomabe a gagwe, di ngwadilwe mo go Ditaba tša magoši a Israele. ¹⁶Ge Menaheme a le tseleng a etšwa Tirtsa, o ile a thuba motse wa Tapuage15:16 Phetolelo ye nngwe ya kgale e re “Tapuage” Seheberu se re “Tifsage”. a fediša badudi ba wona, a ba a senya naga ye e o dikologilego, ka gobane motse woo o ile wa se ke wa ineela go yena. A ba a phula baimana ba gona ka moka dimpa.

Kgoši Menaheme wa Israele

¹⁷Ngwageng wa masome a mararo a metšo ye senyane wa pušo ya Kgoši Usia wa Juda, Menaheme, morwa wa Gadi, ya ba kgoši ya Israele gomme a buša a le Samaria mengwaga ye lesome. ¹⁸A dira dibe pele ga Morena, a se ke a tlogela dibe tša Kgoši Jerobeamo, morwa wa Nebate, yo a dirišitšego Baisraele dibe. Mehleng ya gagwe ¹⁹Tiglate-Pilesere, kgoši ya Asiria, a hlasela Israele, gomme Menaheme a mo neela silibera ya dikilokramo tše dikete tše masome a mararo gore a mo thuše go tiiša mmušo wa Menaheme mo nageng. ²⁰Menaheme a kgobokanya tšhelete yeo ka go gapeletša mohumi yo mongwe le yo mongwe wa Israele go ntšha dipapetlana tša silibera tše masome a mahlano. Ka gona Tiglate-Pilesere a ipoelela nageng ya gabo.

²¹Tše dingwe tše Menaheme a di dirilego di ngwadilwe mo go Ditaba tša magoši a Israele. ²²O ile a ithobalela le botatagwe, gomme morwa wa gagwe, Pekagia, a mo hlatlama bogošing.

Kgoši Pekagia wa Israele

²³Ngwageng wa masome a mahlano wa pušo ya Kgoši Usia wa Juda, Pekagia, morwa wa Menaheme, ya ba kgoši ya Israele, gomme a buša a le Samaria mengwaga ye mebedi. ²⁴A dira dibe pele ga Morena, a se ke a tlogela dibe tša Kgoši Jerobeamo, morwa wa Nebate, yo a dirišitšego Baisraele dibe. ²⁵Molaodi wa madira a Pekagia, e lego Pekage, morwa wa Remalia, a loga maanomabe, a hlasela Pekagia ka sebong sa ka gare sa mošate15:25 Seheberu mo se tlaleletša ka mantšu a mabedi ao go sa tsebjego gabotse gore a ra eng. kua Samaria, a thušwa ke banna ba masome a a fetšago seatla ba Gileade, a mmolaya, gomme a mo hlatlama bogošing.

²⁶Tše dingwe tše Pekagia a di dirilego di ngwadilwe mo go Ditaba tša magoši a Israele.

Kgoši Pekage wa Israele

²⁷Ngwageng wa masome a mahlano a metšo ye mebedi wa pušo ya Kgoši Usia wa Juda, Pekage, morwa wa Remalia, ya ba kgoši ya Israele, gomme a buša a le Samaria mengwaga ye masome a mabedi. ²⁸A dira dibe pele ga Morena, gomme a se ke a tlogela dibe tša Kgoši Jerobeamo yo a dirišitšego Baisraele dibe.

²⁹Ke ge Pekage e le kgoši ge Tiglate-Pilesere, kgoši ya Asiria, a thopa motse wa Iyone, le wa Abele-Bethe-Maaka, le wa Janoage, le wa Kedeshe, le wa Hatsore, le naga ya Gileade le ya Galilea le naga yohle ya Naftali, gomme a thopa batho ba moo a ba iša Asiria.

³⁰Ngwageng wa masome a mabedi wa ge Jotamo, morwa wa Usia, e le kgoši ya Juda, Hosea, morwa wa Ela, a logela Kgoši Pekage maanomabe, a mo hlasela, a mmolaya, gomme a mo hlatlama bogošing. ³¹Tše dingwe tše Pekage a di dirilego di ngwadilwe mo go Ditaba tša magoši a Israele.

Kgoši Jotamo wa Juda

(2 Dikr. 27:1-9)

³²Ngwageng wa bobedi wa pušo ya Pekage, morwa wa Remalia, Jotamo, morwa wa Usia, ya ba kgoši ya Juda ³³a na le mengwaga ye masome a mabedi a metšo ye e fetšago seatla, gomme a buša a le Jerusalema mengwaga ye lesome le ye e selelago. Mmagwe e be e le Jerusha, morwedi wa Tsadoko. ³⁴Jotamo a dira tše di kgahlago Morena, go no swana le Usia, tatagwe. ³⁵Eupša dintotoma tšeo go tšona go bego go khunamelwa medimo ya diswantšho a se ke a di phušola, mme batho ba no tšwela pele le go dira dihlabelo le go tšhuma diorelo moo go tšona. Ke Jotamo yoo a ilego a aga kgoro ye e lebeletšego leboa ya Tempele.

³⁶Tše dingwe tše Jotamo a di dirilego di ngwadilwe mo go Ditaba tša magoši a Juda. ³⁷Mehleng ya gagwe Morena o ile a romela Kgoši Retsine wa Siria le Kgoši Pekage, morwa wa Remalia, go tlo hlasela Juda. ³⁸Jotamo a ithobalela le botatagwe, gomme a bolokwa mabitleng a bona motseng wa Dafida, mme morwa wa gagwe, Ahase, a mo hlatlama bogošing.